SURI

SURI PART 24

SURI
TUSUN 24
DIKARANG DARA MELANJAN

Dani Indai Janin ari mabuk, dia iya ingat ka diri deka nanya Lenta lemai nya. Nyau angkat ngenyit iya mulai ka diri ka dalam bilik ninggal ka Bini tuai rumah. Datai di bilik iya lalu ngagau ka anak laki iya. "Ohh apai wai ni seduai dik dom" ku iya ngagau nadai ga seduai nya nyaut iya. Meda nadai orang nyaut iya ka dapur, ngiga seduai nya ka dapur. Nadai ga di peda. "Kini ka penunga dua iku tu nadai diau di bilik" ku iya bejaku lalu nyingkau pulai ka bilik besai..

Meda nadai seduai nya, iya lalu pansut baru, peda iya orang benung betunggung mayuh ba ruai sida Aki Suri. Mansang iya ngagai sida nya peda iya laki enggau anak iya bisi. "Nai, udah angkat dik tadi Indai Janin ni Indai Umang dah angkat" ku Tuai rumah. "Eh agi galik di ruai nyin iya tuai, nama kitak betunggung ngemayuh tu?" Ku Indai Janin. "Nai nanya ka menantu dik mih kami, nadai ngasuh dik mabuk lalu enda ingat ka pengawa diri" ku Apai Janin nyaut. Ninga ka nanya ka menantu iya, Indai Janin alu ngenuduk ka diri. Perening iya Lenta tetuchum. "Baka ni dih nerima endu nyadi ka menantu aku dih wai" ku Iya nanya laki iya Apai Janin.

Apai Janin ka nundi iya. "Eh enggai orang ka menantu entua udu gila udu belaya udu mangah udu ngirup" ku Apai Janin. Ninga ka saut Apai Janin munyi nya, nyau melut tudah anak Mata iya. "Apuu nadai aku tu gila mangah gila mabuk dih Wai iga ga Endu Lenta enggai ka anak Tua" ku Iya nyaut mata iya lalu bekuring. "Eh nibuh sibuk dik, alai bai Indai Umang nyin Ngirup" ku Tuai Rumah nyaut ari tisi. "Bah kati aku enda Sibuk tuai, anak aku ka di ke enggai orang nya ukai anak dik" ku Indai Janin nyaut.

Sida ka dia meda iya nyau pansut bulu siga lalu ketawa. "Ipak kitai ngirup sigi nadai nemu utai di kerandau ka orang" ku Indai Dino. "Padah ka dia mih nama jaku Endu Lenta tadi" ku Indai Janin merak. Suri laban ka enda tan ati meda iya di tundi dia Suri lalu nyaut. "Udah ibu, nerima Endu anang memangah mali nyau udah ka bisi menantu da dik nya" ku Suri madah ka iya. Ninga Suri nyaut munyi nya panjai tuchum orang menua dih. Iya lalu angkat lalu merap Lenta.

"Terima kasih Endu terima kasih laban udah nerima anak aku" ku Iya angkat iya lalu belanda ngerak Bini Tuai Rumah. "Wai ohh Indai Umang angkat dik lapa dik merinsa nya alu enda dani iya dik enda angkat legi sengayuh ku palu ngagai dik" ku Indai Janin. Laban ka udah lama dani mina enda dapat angkat, nyau angkat ngenyit mih Bini tuai Rumah nya tadi. Tuk!! Ku kening indai Janin semetuk tekung Bini tuai rumah.

"Agi dik ngenyit ka aku, makin pala tu agi ngelu di tambah ka dik ka gila nya ngerak lalu ka malu aku ngena sengayuh, nya nama tai ka bangat enda teranti ka aku dani begerak gerak" ku Bini tuai rumah nganu. "Aram ngirup baru tua ba Aki Suri dedin bulih manuk Indu ku" ku Indai Janin. Ninga Manuk indu dia dih Bini tuai rumah ngenung. "Nama utai ku dik gila" ku Bini tuai rumah. "Dik nya baru gila lalu enda nemu utai ku orang, bulih aku nanya menantu nemu dik gila aram ngirup tua" ku Indai Janin. Seduai iya lalu bebai ngagai setak..

Ba Langkau bukit Indai Lika.

Sepengelama indai Lika ka udah di anjung ka Langkau Bukit. Iya semampai nyimpan ati biking ngagai Sida iya serumah. Pemendis ati iya nadai endur nyeliah. Iya sigi deka ngulih ka Mikai nyadi ka menantu iya. Laban ka enggai meda Suri jadi enggau Mikai, laban iya ka enda nemu Suri enggau Mikai nya diri menyadi. "Aku meseti ngiga jalai baka ni mai Apai Lika pulai ka Rumah Panjai, aku meseti ngambi Mikai nya nyadi ka menantu.

Mansang iya ngagai Apai Lika ka benung ngeraut wi ba tanju. "Apai Endu, pulai mih kitai sida endu ka rumah nadai aku nemu diau ditu ngelama tu ditu" ku Indai Lika. "Eh enda aku, aku nemu dik ukai ka pulai manah dik pulai ka ngenyati orang aja" ku Apai Lika. Apai Lika nemu nama ulah iya laban niting malam pama Apai Lika sereta Lika tinduk iya angkat ngidup ka Kemenyan. Kena iya ngidup ka semua utai  ka di ibun iya. Nya mih siku nya enggai di Bai pulai..

"Ehh nadai aku tu ka munuh kitai tu serumah nadai aku tu ngemedis ka orang nyau tetengguk ka pulai ukai nyamai fiau di puak kampung tu!" Ku iya merak Apai Lika. "Enda belik enda dadak aku tu indai Endu, kumbai dik bangat enda meda pengawa dik nya aku! Aku tu laki dik anang nyau kelalu dik ningkah ka penemu aku!" Ku Apai Lika angkat lalu mulai ka diri Ka bilik. Lika ka ninga lalu enda nyadi angkat ari peninduk takut meda apai enggau indai iya belaya.

"Bisi maya dik nya ku bunuh ila, anang dik nyagang aku" ku Indai Lika bejaku ka diri ba tanju. Iya lalu angkat tama ka bilik. "Nya angkat Lika anang ka tinduk aja, nadai orang laki ka ke kitai kelalu buruk!! Enggai ka dik ku pantap legi " Ku iya nganu siku nya. Nyau Lika ka di anu iya endur iya mantup ka pedis ati. Duduk iya semak dapur kayu sida iya ati iya semampai ngiga cara baka ni ka mai laki iya mulai ka diri. Nyau puas ka berunding dia iya bulih akar kena iya mai seduai nya mulai ka diri. "Manah ku ngaga diri Sakit raya ngambi seduai iya enda ulih mai aku ditu, ngambi kami pulai" ku Indai Lika.