SURI

SURI Part 5

SURI
TUSUN 5
DIKARANG DARA MELANJAN

     Dani Suri pagi nya, dia Suri tekenyit laban ka meda diri tinduk di peninduk "Ukai ka aku tinduk di luar demalam kati tau tinduk di bilik" ku Suri betelai kediri. Aki enggau Ini iya agi di dapur laban ke ngirup kupi, seduai sigi enda ngerak Suri laban nemu Suri agi pedis di jamah Indai Janin enggau Indai lika. Angkat Suri gadai gadai ngirit kaki iya ke dapur. "Aki Ini, nama seduai enda ngerak aku tadi" ku Suri alu duduk tisi Ini iya. Malik Aki iya ngagai Suri nyau Ngilik pala Aki iya. Mata kembai mulut kembai mua nyau ukai Suri agi bai kelalu balat di jamah sida iya serumah.

    "Sigi enda ngerak dik tadi uchu nemu dik agi pedis" ku Ini iya nyaut. "Aki Ini sapa ngatung aku pulaika bilik demalam?" Ku Suri nanya. "Aki dik uchu meda dik nyau tinduk di luar iya angkat kemi ka tanju" ku Ini iya Ngemulaka Suri. Ninga ka saut Ini iya munyi nya Suri lalu badu nanya. Lama sida iya tiga enda memunyi, Suri semina ngerising ngenat ka kaki iya ngentun.. "Suri, legi pulai ka rumah panjai kitai, aki bisi utai ka kerandau enggau Aya dik Tuai Rumah" ku Aki iya. Lama Suri enda bebunyi takut ka Aki iya nemu sapa ka nyamah Iya..

    "Au mih Aki, legi aku ngadu ka perengka di bai pulai ke rumah ga" ku Suri. "Nibuh uchu udah di adu ka Ini magang tadi" ku Ini iya nyaut. "Au mih enti kenya pemai seduai ga aku" ku Suri nyirut ka kupi. Udah tembu semua sida iya tiga pan mupuk mulai ka diri ke rumah panjai. Suri laban ka pedis suah iya nuduk kediri. "Aki nibuh laju amai kitai, ngentun kaki aku" ku Suri rerauh ari belakang. Ninga uchu iya ka mai ngetu, Aki enggau Ini iya alu ngetu nudukka diri..

    "Ngetu dulu mih kitai tiga uchu, enti kaki dik enda ulih di irit, nadai ga utai di rumban kitai tiga" ku Aki iya madah. "Enda ulih Aki, pedis amai tu" ku Suri. Bisi setengah jam mih sida iya udah ngetu, sida iya tiga lalu nerus ka pejalai. Bisi sejam sida iya bejalai nya baru datai di simpang, Suri udah mupuk irau ka sida iya serumah. "Kati mih aku tu legi, kada orang enda nganu aku baru" ku Suri. Puas ka bejalai nyau datai sida iya tiga ba ujung Rumah..

    Enda nengah tanju sida iya tiga, nengah tanah aja, laban tengah ari, nadai entu orang duduk di ruai, Sida Indai Dino enggau Indai Jugam aja di ruai. Niki sida iya tiga ke tanju alu nuju bilik laban bilik Indai Dino enggau Indai Jugam takah sepintu meda seduai iya. Angkat alu mansang ngelawa sida iya tiga. "Apu yie nama gamal dik baka nya anak, sapa ka medis ka dik ngudu nya?" Ku Indai Dino nanya. Nyadi Indai Dino enggau Indai Jugam sigi enda sekaki enggau Indai Janin laban ka enda sepenemu. Nyadi indai Jugam enggau Indai Dino diri menyadi, sigi nadai rinduka Indai janin laban ka udu bejai orang kin kia.

     "Tama dulu mih endu, enggai nyadi aku nyebut ka seduai di ruai tu, ukai seduai enda nemu pemanah kitai serumah" ku Aki Suri. Udah ka tama, sida iya nuduk ka diri Suri alu ka dapur manduk ai kena ngelumai kupi. "Nama ga mua endu yie nya baka nya apai?" Ku Indai Jugam nanya. "Kemarik Endu pulai ka rumah laban ka bejual ikan Enggau burung, udah ka tuai rumah abis bejual iya alu mulai ka diri, laban ka enda ngadang, dia dih iya di saup ka Indai Janin, Indai lika enggau kitai serumah ka keji ka enda rindu ka endu" ku Aki Suri nusi. "Apu apai, anang neju ka endu yie nya baka nya, legi enti dik terenah betemu enggau tuai dik apai, enda ulih enda ukum seduai iya, nyau seduai iya ka ngulu ka kitai serumag enggai bepeda" ku Indai Dino.

      Suri pan datai ngelumai kupi. "Kitu Endu ibu meda mua dik nya" ku Indai Jugam. Mansang Suri peda iya abis mua Suri kembai, nyau enda berasau seduai iya nyau labuh ai mata. "Kasih mih anak, ari mit ga dik merinsa, nyau besai agi, balat agi pemerinsa di tapik dik siku" ku Indai Jugam merap Suri. Tepeda ka betis Suri, Indai Dino tadi meda kain kena nanchang telih betis iya. "Buka kaki dik nya sayau, ibu meda iya" ku Indai Dino.

     Silak ka Suri kaki iya lalu di buka iya balut betis nya, dinga nyau ngampu meda telih Suri nyau dedilak. "Apuuu sayau ibu, intan ibu, kasih mih anak di gaga baka tu" ku Indai Dino. "Ditu dulu mih kita, aku Ngagai bilik tuai dulu" ku Aki Suri. Angkat iya lalu nuju bilik tuai Rumah. Nasib nadai  mensia ka duduk dedunga ba sebelah ruai. Ketuk iya pintu, dia tuai rumah ngasuh tama. Tama Aki Suri malik tuai rumah..

     "Apu apai, kemaya dik datai pulai kitu?" Ku Tuai rumah merap Aki Suri. "Baru datai tu wat, nyadi aku bisi utai padah ka dik" ku Aki Suri. "Nama utai nya apai" ku tuai Rumah. "Nyadi baka tu wat, pulai endu ari seduai demalam iya di jamah sida indai Janin" ku Aki Suri. "Apuu kasih mih Endu Suri nya dih apai" ku Tuai Rumah. "Nyadi baka tu wat, aku ka lemai legi dik nyesau kitai serumah alu deka minta ukum laban seduai iya udah ngemedis uchu aku, enti agi ka ngumbai iya anak tu nya uchu aku tu enda aku ka bejaku tang tu sampai sanggup ngemediska iya" ku Aki Suri.

     "Wai, nemu dik tengah ari tadi asai ka bisi meda Aki Jugok aku, kada enda Anak Ampang nya bisi ditu wai?" Ku Indai Lika. "Au wai, aku tadi meda Indai Dino enggau Indai Jugam pansut ari bilik sida iya, asai ku sigi bisi dia Anak Ampang nya" ku Indai Tuai siku. Ninga ka Suri bisi di rumah panjai ati Indai Janin berasai gi pedis. "Nadai guna!! Berani rani kita pulaika rumah tu!! Legi sepi kita tiga aku bunuh magang!!" Ku Indai Jan besai nyawa. Selabuh nya Bini Tuai rumah pansut ninga mih iya utai ku Indai Janin alu di timbal iya. "Apu nih wai, nyamai munuh orang baka ka munuh anak manuk, uji te Rekung seduai dik Indai Lika nya pulas ka ambi mati badu meda orang litan ka jai beulat enggai meda orang senang!!!" Ku bini tuai rumah nimbal sida iya ka duduk betugung bala banyak. Bini tuai rumah alu tama ka bilik..

     "Chukup chukup Indai janin enggau indai Lika nya nadai guna seduai nya diau di rumah tu!! Ngembuan ati biking ati jai!!" Ku Bini Tuai Rumah kekucau. "Ya lapa dik wai, nyau baka munyi burung semalau nadai ngetu ka kucah tama ke bilik?" Ku Tuai Rumah. "Eh orang ke jai lintan jai atau nya mih ka enggai meda pengidup orang, kumbai iya baka ka mulas ka pala manuk ka munuh orang" ku Bini iya nyaut. Nyau ngilik pala Tuai Rumah meda bini iya nyau mangah..

     Indai Janin nyau Angat ninga jaku bini Tuai Rumah ka munyi nya. "Cii te sibuk ka pendiau orang!!, bisi dik ila palu aku enggau sengayuh ngambi pahai enda temu orang" ku iya dalam ati. Sida ka bukai sama enda bebunyi ninga jaku bini Tuai Rumah te renjan. Angkat sida iya alu mulai ka diri ke bilik diri empu magang tinggal mih Indai Janin aja agi di ruai. Janin enggau apai iya ngilik pala meda ulah indai enggau bini iya makin nyadi. "Tusah indai dik nya dom, kelalu padah ka legi kitai di empa iya enda betulang" ku Apai Janin tama baru ka bilik nyau malu ninga jaku Bini tuai rumah....