SURI

SURI PART 4

SURI
TUSUN 4
DIKARANG DARA MELANJAN

      Nurun Suri ari tanju Tuai Rumah iya nadai merati ka bisi orang meda iya. Orang nya lalu belanda landa ari bilik pansut ka ruai. Datai di ruai iya lalu nusi ka sida iya serumah Suri bisi nurun ari tanju Tuai Rumah. Ninga Tudah Indai Janin tu tadi iya lalu Angkat nurun ngagai baruh rumah.. Tuai Rumah nadai mih nemu ulah bala rayat iya ka ngipa Suri ari puting rumah. Suri laban ka enda ngadang bisi orang ngipa laban ka nyau petang. Iya lalu mansut ja diri ari baruh rumah..

    "Tu pengawa dik nih, belalai dik kitu!!" Ku Indai janin.Tekenyit tudah Suri tadi meda Indai Janin enggau bala bukai ka bisi dia. "Ampun ibu, aku datai mina ka bebeli barang, ukai ngiga salah enggau kita" ku Suri nyaut. Iya sigi enda madah ka diri datai bejual kia laban sida nya mih ka meli ikan enggau burung iya. "Aku udah madah dik enda tau sekali nunjah rumah panjai tu, dik nya mai penyial kitu!!" Ku Indai Janin. "Jamah iya alai kitai, nadai jera iya enti enda di jamah, enti iya kitu ukai ka datai manah iya nya, ngacau laki kitai!!" Ku Indai Lika bejaku..

     Ninga sida iya deka nyamah Suri. Suri nyau takut. "Enda aku ibu, enda ngacau laki kita aku" ku Suri nyaut. "Eh!! Enggai kemulak ka dik kami tu! Dulu kami makai garam, nemu bungai dik ka nipu!!!" Ku Indai Lika. Indai Janin laban sigi begedik ka Suri, iya nadai bepadah padah jamah Suri mansang iya lalu di tampar di gugut iya buk.Dia dih bala ka bukai ngenat ka kaki enggau jari Suri. Indai Janin enggau Indai Lika nyamah penyamah. Suri ke nyerauh minta di lepaska nadai di pending.

     Udah puas ka nyamah Suri nyau setengah mati, sida iya lalu mulai ka diri. "Puas ati aku" ku Indai Janin. "Aram pulai kitai tinggal ka anak ampang tu ditu" ku Indai Lika mai sida iya. Suri nyau setengah nyawa di binsai ka sida iya. Pia ka iya nyamai ngumpul barang ka di beki iya tadi, pia ka iya ngenat ka pemedis tubuh udah di jamah. "Pedis amat mih aku di gaga baka tu, nama mih salah aku bangat enda di pebasa ka baka tu, ukai ku bisi ngacau sida iya" ku Suri nyabak mulai ka diri. Tuai Rumah enggau bini iya nadai mih nemu ulah sida iya serumah..

    Bedau bangat jauh iya bejalai dia iya bisi ninga nyawa orang ngagau. "Suri, oh Suri nganti aku dulu" ku Nyawa orang nya. Suri enda ngetu iya neruska pejalai. Bendar diri laki nya ngagai iya. "Suri nganti aku, enda aku ngacau dik" ku Laki nya. Malik iya peda iya Janin. "Nam utai ka bangat ka padah ka dik Janin, cukup mih ka nyamah ka medis ka aku" ku Suri sambil mulir ai mata. "Suri, duduk dulu dik, kitu kih aku ngubat telih dik nya dulu, aku malut kaki dik nya" ku Janin.

    "Minta ampun aku Suri, ketegal aku deka ngambi dik ka bini, dik di jamah di keji ka orang" ku Janin mulir ai mata. Janin tu sigi ka ke Suri. Tang Suri enggai laban ka malu ka pendiau diri. "Ukai salah dik Janin, Salah aku, ketegal aku enda nerima dik aku bulih ungkup, tulah aku, laban aku anak ampang" ku Suri lalu angkat mulai ka diri. Janin ka meda iya enda ulih nyagang Suri mupuk laban ka nyau jauh malam. Datai Dino enggau Jugam belanda nitihka Janin. "Titih ka kitai iya Janin, kasih iya bejalai ka diri pedis baka nya, ari jauh kitai ngemata ka Suri" ku Jugam

    Sida iya tiga nitih ka Suri ngelaban jalai petang tegayam. Nadai di peda jalai laban sida iya tiga enda bebai  ka picit semina Jugam enggau Dino aja bebai ka duku. Dia Suri ngentu asai ka bisi orang nitih palik iya ka belakang nadai ga iya meda senera orang. Laban sida tiga nya belalai. Iya mih Suri ngepun ka pejalai sida iya pan nitih baru.. sampai ka Suri nyau datai ba simpang pendai sida iya agi nitih. Peda sida iya Suri enda alu niki ka langkau. Di perati ka sida iya tiga Pengawa Suri peda nuju ka pendai masuk tubuh iya ka kamah. Udah nya peda sida iya tiga Suri matah ka daun kena ngirup ai..

   Udah ka tembu Suri lalu angkat ngambi perengka ka dibai Suri tadi niki ke bukit. Tang Suri enda alu tama, Suri semina duduk ba tanju alu ngalikka diri dia. "Kasih mih Suri enti tinduk di luar dia legi" ku Jugam. "Nama iya enda ngerak Aki enggau Ini iya muka pintu nya?" Ku Dino. "Syhhh anang ragak seduai, peda aja" ku Janin. Sida iya tiga pan lalu duduk nunga ka mua ngagai tanju langkau sida Suri..

      "Keni mih aku mantai ka mua ba Aki  enggau Ini pagi pagila, meseti seduai iya nanya nama kebuah mua aku belitan baka tu" ku Suri. Puas ka berunding Suri enda berasai telelap tetinduk dia. Meda Suri udah jenak tinduk, Janin lalu mai seduai iya niki ka atas, "aram niki ka atas kitai tiga" ku Janin. "Nai nama kitai niki, legi temu Suri kitai niki" ku Jugam. "Enda iya nemu, kitai meseti madah ke Aki enggau Ini, enggau ka enda nemu penusah Suri" ku Janin.Sida iya tiga lalu Mansang begadai gadai Alu ngetuk pintu..

    "Aki, buka pintu, aku tu Janin" ku Janin laban ka Aki Suri sigi lansik iya lalu angkat muka pintu. "Apu uchu nama kitai nyau tengah malam ka kitu" ku Aki Suri.. "syhh Aki ancau dulu peninduk Suri kami tiga ngatung iya dulu" ku Janin.. Aki Suri lalu ngancau peninduk Suri.. Suri lalu di galik ka sida iya tiga. Udah ka ngalikka Suri, sida iya duduk nunga Aki Suri. "Nama Suri nyau tinduk ba luar dom, lama iya udah datai tadi?" Ku Aki Suri nanya sida iya. "Lama aki, kami tiga nitih ka iya tadi ketegal iya ka pedis udah di jamah indai aku, enggau indai Lika, aku minta Ampun Aki ketegal Aku, Suri di perinsa kitai serumah" ku Janin nunduk ka pala iya..

      Lama Aki Suri enda bebunyi uchu iya di jamah di saup ka sida iya serumah. Begengam mih jari iya ngenang Indai Lika enggau Indai Janin ka nyamah Uchu iya. "Minta Ampun Aku Dom, aku Meseti ke rumah panjai pagila aku meseti bejaku enggau Tuai, makin di biar makin nyadi ulah seduai iya indai Lika" ku Aki Suri. Sida iya tiga enda bebunyi. Semina nagun ka pala aja.

      "Bemalam mih kita Uchu udah jauh amat malam tu" ku Aki Suri. "Enggai nyadi kami bemalam aki, Suri enda nemu kami nitih ka iya ari belakang tadi, enggai ka iya nemu nganu iya" ku Jugam nyaut. "Enti pia, bejimat ga kitak tiga pulai" ku Aki Suri. Sida iya tiga lalu mupuk mulai ka diri. Aki Suri enggau Ini Suri sama enda bebunyi. Pemuas iya Aki Suri lalu bejaku. "Wai, pagila kerumah panjai kin Kitai tiga, enda ulih di awak ka aja pengawa sida iya baka nya, kitai meseti ngagai tuai" ku Aki Suri. "Aku pemai dik aja wai, kasih uchu aku ari mit ka merinsa" ku Ini Suri nyabak malik ngagai Suri, seduai iya lalu ngalik ka diri lalu nyambung tinduk baru...