SURI

SURI PART 30

SURI
TUSUN 30
DIKARANG DARA MELANJAN

5bulan udah nya..

Nyau 5 bulan tudah Lika jadi enggau Mikai. Tang 5 bulan nya Mikai nadai sekali begulai enggau Lika. Tiap lemai Mikai pulai gawa suah laun. Tiap nya Mih asi lauk di panduk Lika enda kala di pakai iya enda ka di empa iya. Lemai nya tumu Mikai pulai laban deka pulai ka rumah panjai. Meda tumu tutudah Lika lalu nanya. "Wai tumu dik pulai, ka makai dik?" Ku tanya Lika. "Tumu salah laun salah nadai utai ka betul, peneka aku mih ka tumu tauka laun pulai, dik sapa ka merintah aku!" Ku Saut tudah Mikai sambil merak tudah Lika.

Ninga saut Laki iya ngerenjan nya Lika lalu badu memunyi semina ai mata iya aja keberai iya lalu angkat deka ka dapur laban ka nyumai. Baru ka angkat tudah dia iya di tagang tudah Mikai. "Nibuh nyumai dik, aku deka pulai ka rumah panjai laban ka nyenguk sida aki ini aku di menua tambah mega sida entua aku, ingat datai di rumah panjai dik anang mayuh utai di tusi anang mayuh utai di sebut enti enggai meda aku gila!!" Ku Mikai. Lika semina nyagun ka pala aja iya lalu niki ka bilik ngadu ka gari di bai pulai.

"Nama dik ka jadi enggau aku Mikai enti asai dik enggai ka aku nama salah aku wai laki dik ngaga aku bakatu" ku Lika mulir ai mata. Selabuh maya nya Mikai benung niki tangga. "Minta ampun aku Lika, aku jadi enggau dik ukai ke deka ukai indu di kesayau ka aku, aku mina nyelamat ka dik ari indai dik enggau malas semua penyai indai dik munuh bini aku" ku Mikai bejaku lalu pulai ka bilik iya empu.

Pengudah tembu beradu seduai iya mupuk pulai ka menua. Seduai sama nadai memunyi nadai bejaku. Meda Mikai nadai nanya Lika. Dia Lika lalu mejam ka mata. Baru mejam ka mata tudah Lika dia iya bemimpi betemu enggau Niang Umang. "UMANG, UMANG LELENGGAU AKU KA DIK, SAMPAI ATI DIK UMANG NINGGAL KA AKU" Ku Lika dalam mimpi peda iya Niang Umang nyabak sambil mata iya bekuring meda Lika. Lika nyau takut di pering tudah Niang Umang nyau baka deka munuh iya. "SAMPAI ATI INDAI DIK LIKA MUNUH AKU INGAT LIKA DIK JADI ENGGAU LAKI AKU UKAI KETEGAL PENGERINDU TANG MIH KETEGAL DENDAM. INDAI DIK SIGI MATI LIKA SIGI MATI DI BALAS AKU!! ANANG SENANG PENGIDUP DIK ENGGAU INDAI DIK UDAH NGERAMPAS PENYAYAU LAKI AKU!!!" ku Niang Umang baka deka ngerekam iya.

Nyau tedani tudah Lika nyerauh dalam kereta. Mikai nyau brek ngenyit ninga nyawa tudah Lika. "Nama dik gila tinduk ngigau nyerauh baka nya kati enti sidin tadi sapa ka salah ku dik uji ta sekang mata dik nya bangat enggai enda tinduk!!" Ku Mikai merak. "Minta ampun ku Mikai minta ampun laban ngasuh dik tekenyit" ku Lika nundukka pala iya sambil mulir ai mata iya laban ingat ka mimpi iya tadi. "Ingat datai di rumah panjai gaga baka tua nyadi laki bini, dik ngagau ka aku sayau aku ngagau ka dik Sulu, ingat anang sampai kitai serumah nemu lebih lebih agi Apai nuan!!" Ku Mikai.

Lika mina nyagun ka pala seduai iya pan lalu neruska pejalai. Semak seduai iya ba simpang peda seduai iya bisi ayas orang bediri ba simpang. Makin semak makin di peda sapa nya. "Nama nyin indai aku dih?" Ku Lika. Lama Mikai merening jari iya begenggam. ati iya sigi deka bebalas tang di sabar iya. Gadai gadai seduai iya sangkai. Peda pansut Lika ari kereta ngelawa indai iya. "Indaiiii, lelenggau aku indai lelenggau amai ka dik" ku Lika merap indai iya. Mula  mula deka di tampar iya Lika tang Mikai pansut ari kereta. "Nenama seduai dik begulai ari ni seduai?" Ku Indai Lika.

Lama Lika enda nyaut iya merening Mikai. Takut ka siku nya. Tagun ka Mikai pala baru Lika bejaku. "Indai tua Mikai udah jadi melaki bini diatu indai Mikai mih menantu dik badu mih dik bedendam enggau orang agi" ku Lika bejaku sambil mulir ai mata nyabak semuti ka te sebut ka jaku nya. Laban 5 bulan seduai iya jadi Mikai sigi enda kala ngasuh iya ngambu Mikai nyadi ka Laki..

"Amai anak amai Dom, amai menantu aku dik" ku Indai Lika gaga ngusak tadan bau Lika. "Amai indai aku mih menantu dik aku jadi enggau Lika nitih ka peminta dik" ku Mikai tang mata iya enda malik seduai nya mindai iya semina nguing ka mua. Lika laban nemu iya semina tunduk nyabak. "Kasih dik indai nadai nemu pekara ka amai, enda ngawa aku merinsa jadi enggau Mikai asal mih dik indai enda ngaga ulah agi" ku Lika bejaku..

Sida iya tiga pan mupuk tama ka simpang rumah panjai. Nadai ga lama amai sida iya sebuat nyau datai ga ba tengah lama. Indai Lika dulu pansut. Lika enggau Mikai dudi agi. Dia dih Mikai bejaku. "Ingat nama utai di pesan aku, enti dik enda mending aku sigi munuh indai dik enggau pengambis ati jai, ingat Lika anang sampai kitai serumah nemu!!" Ku Mikai. Lika alu nyagun ka pala iya lalu pansut muka belakang kereta laban ka ngambi kantung gari.

Pansut tudah Mikai ari kereta iya lalu ngambi kantung gari ari Lika iya ngaga diri nyambut jari Lika di pigai iya sampai pintu ruai. Laban ka indai Janin enggau Bini tuai rumah benung ngirup dia seduai iya meda Indai Lika tama. "Wai wai nyin peda dik ukai indu gila nyin nama nya nyau pulai enggau menantu dik wai" ku Indai Janin nyelai. "Au dom aku nyin nama indu gila nyin bisi, bah angkat tua aram bai sengayuh enggau pemansai tua, enda sabar aku nganti penatai iya, 5bulan udah!!" Ku Bini tuai rumah. Suri enggau Lenta ka meda semina ngilik ka pala ka iya nyagang enda ulih laban seduai nya benung mabuk.

Mansang seduai iya gadai gadai laban ka indai Lika benung melakang enda mih iya ngadang di tangkup Indai Janin ngena pemansai peda te dedat penedat tudah Bini tuai Rumah ngena sengayuh ka engkuda enda ulih laban di pasung tudah Indai Janin. Nyau begau sida iya serumah meda seduai nya nyamah indai Lika. Nyau Luput tudah tuai di palu ngemalat nya. Tang Indai Janin enggau Bini Tuai rumah enda ngelengka ka indai Lika.

"Nya sepik dik mati dik mati dik kenya dik ngaga anak aku baka nya aku ngaga dik berani rani dik munuh anak aku!! tu berani dik mulaika diri ka rumah panjai kitu indu enda nemu malu puiii" ku Bini tuai rumah malu ngena sengayuh nyau patah batang sengayuh pa pemendar iya malu siku nya. Tuai Rumah ka masung bini iya enda ulih di pasung tubuh iya nyau belenying baka ka di sapu minyak. nyau baka ka ngantu diri iya nyamah tudah Indai Lika.

Belanda tudah Lika lalu merap kaki Bini tuai rumah. "Umbas ibu umbas badu nyamah indai aku ibu kasih ka aku" ku Lika Nyabak. Mikai anang ka ngelara ngasuh iya tetuchum belalai meda indai Lika di jamah. Siku nya nadai mih nemu utai laban ka luput. "Aku sigi enda nemu badu seagi pemati anak aku enda di balas!!" Ku Bini tuai rumah. Nya mih Lika nyabak agi minta kasih Bini tuai Rumah. Enggai ka berupai gaga dia Mikai lalu mansang.

"Indai umbas nya, badu ngenang utai udah  umbas mih nya" ku Mikai merap Bini Tuai rumah. Baru ka nyaut Entua iya. Dia iya lalu nelai. "Anang dik malas indai biar aku empu, aku bisi chara aku empu kena ngemedis ka iya" ku Mikai nyelai entua iya. Nya baru Bini tuai rumah tendur laban ninga jaku Mikai. Tang ati iya bedau puas ngereja indai Lika. Baru di tarit tudah  tuai rumah enggau anak iya Jawan , peda belanda iya nikal baru lalu di sipak iya pala Indai Lika. Nya baru iya pulai ka ruai iya..

Seduai iya indai Janin ngirup baru. "Umbas indai Umang badu dik mayuh ulah bakatu, ati dik ka pedis tat ka anang nyau kelalu, seduai dik iya ukum aku pama agi mayuh ulah" ku Tuai rumah. "Alai dik kin jadi enggau iya. Utai ka jai nya munuh anak dik nya di saup dik aku tu bini dik deka ukum dik nyin alai kin dik ngatung iya" ku Saut Bini tuai rumah pedis ati mata iya nyau bekuring. Ambi iya tajau tuak mit lalu di lagak iya.nya mih indai Janin nyau melut mata.lalu ngerampas tajau. "Ehh dik tu wai nganu tau nganu anang enda ingat ka kaban aku tu ka mih ngirup anang nyau ngelagak kediri dik!!"ku Indai Janin nganu..nya lapa dih agi dik Indai Lika nganjung diri ngagai nyawa baya.sapa ngasuh dik pulai ipak dik palu enggau sengayuh.pemenchi orang anang di umba laban sigi bedendam..

Pengajaran: anang sekali kali jai ati laban dendam orang enda tekala nya pansut. Tua enda ingat tang orang ingat. Maya tua ilap orang sigi bebalas..