SURI

SURI PART 7

SURI
TUSUN 7
DIKARANG DARA MELANJAN

     Sekumbang Suri ka sakit sida iya tiga diau di rumah panjai, labanka Tuai Rumah enda ngasuh mai ngirit Suri bejalai. Bisi seminggu Suri udah gerai, Suri pan pansut ka ruai deka mandi ka pendaie nuchi gari sida iya tiga. Selabuh nya orang nadai di ruai mina indai Lika enggau Indai Janin aja ka di ruai. "Wai, peda dik anak ampang nyin, aram tua nitih ka iya" ku Indai Janin mai Indai Lika nurun nitihka Suri.. Nadai mih Suri nemu diri di titih ka seduai iya.

     Datai di pendaie dia dih Suri nyepik pala iya pedis di palu orang ari belakang. Sempat ga iya malik ka mua tang mata iya enda meda sapa ka malu iya ketegal ka nyau apas apas di peda ngejungka iya luput dia. "Sepik asai dik Anak ampang!, anang ngumbai diri nyamai dik diau ditu!!" Ku Indai janin. "Aram pulai tua, kapa enda ditu, legi peda orang tua" ku Indai Lika..Seduai iya pan mupuk mulai ka diri baka ka enda ngaga penyalah.

    Di rumah Ini Suri ngiga Uchu iya, laban Suri ka nadai madahka diri deka mandi ka pendaie sida iya. "Wai, ni uchu tua, lama amai ga iya nadai pulai, nyau tengah ari, ari tu bedau ga iya di peda" ku Ini Suri. "Engka iya ba ibu iya setak din" ku Aki iya nyaut. "Engka amai ga, legi pulai mih iya" ku Ini Suri. Enda agi mih Ini iya kiruh agi, nyumai mih Ini iya, udahka tembu semua dia dih Ini Suri ngasuh Aki iya ngagai sida Tuai Rumah ngagau ka Suri. AKi Suri nadai beleman iya lalu angkat pansut ka ruai nuju bilik Tuai Rumah.

     Datai di ruai tuai rumah, baru ka muka Pintu Tudah Aki Suri, peda pansut Bini Tuai Rumai. "Nai dik tadi apai ni endu udah gerai?" Ri Bini Tuai Rumah. "Nadai ditu Suri pia? Baru ka ngagau ka iya aku tu tadi. Ari pagi tadi iya nadai di bilik" ku Aki Suri madahka Bini Tuai Rumah. "Nai kini ka iya dah apai, nadai iya ngagai aku kitu, bah aram ngagai ka apai wat dulu bai ngiga iya" ku Bini Tuai rumah.. Benung Seduai iya ka betalat ka Ngiga Suri. Pansut ga tudah Apai Janin enggau Janin ka ruai..

    "Nama ga seduai dik apai?" Ku Apai Janin nanya. "Suri wat, alu nadai ari pagi tadi kumbai aku ba sida ibu iya ditu nadai ga" ku Aki Suri. Janin alu nyima ati Suri nadai sigi ketegal Indai iya. Janin lalu tama ka bilik ngiga Indai iya ka dapur.. "Indai, padah ka aku!! Dini Suri!!" Ku Janin. Pedis ati Indai iya ninga anak iya munyi nya. "Dik dom! Mimit penyalah Suri aku di sangka dik!! Aku tu indai dik dom, anang nyau kelalu dik ngaga aku baka nya!!" Ku Indai Janin ngaga diri nyabak. Janin sigi enda puas ati iya sigi nemu nya pengawa indai iya. Sebedau iya pansut iya bejaku. "Enti aku nemu nya dik indai, asuh ku buru apai enggau Aya Tuai Rumah dik!!" Ku Janin ringat lalu pansut..

     "Nadai Anak ampang kitak nya nemu nya pengawa aku, udah luput iya nya tadi hahaha!" Ku Indai Janin ketawa. "Mati tau mih Anak ampang nya, nusah ka orang aja, lapa mih tadi aku enda muai ngagai ai ambi sangka mati lemas, jugau endar" ku Indai Janin alu mulaika diri ngagai bilik besai. Janin udah ka pansut iya lalu nuju sida Tuai Rumah laban ka begiga ka Suri. "Dini kitai ngiga Suri dah tuai, ari tu nyau majak ka silau, kin Tuju kitai dulu ba ujung setak ili bebagi mih kitai tuai, sekeda ngagai Ujung ulu, bisi begiga ngagai pendaie kin pama temu ngagau ka pangan diri kitai" ku Apai Janin. Tuai Rumah nadai mayuh leman setuju enggau penemu Apai Janin..

     Berengkah mih sida iya begiga. Janin, Dino enggau Jugam ngiga sebelah pendai. Iya ka bukai begiga ka setak iti enggau ulu..Beterauh mih sida iya ngagau nadai ga Suri nyaut.. Datai sida iya tiga ba endur Suri di palu, peda barang abis teberayan. "Apuu kada enda lemas endu Suri tu Janin, peda dik barang iya tu, kangau ka tuai rumah ke atas kin Dino" ku Jugam. Dino alu belanda landa ke atas ngiga tuai rumah ke atas. "Baka ni tu kih, selam tua tu" ku Jugam nanya Janin. "Anang guai, nganti tuai dulu tua" ku Janin nyaut. Lama seduai iya enda bebunyi, bakani begiga ka Suri. "Kini ka penunga dik kumang, anang mih ngasuh ati aku irau, taja dik enggai ka aku enda mih aku ngemana ka iya, anang mih ngasuh Aki Ini dik irau" ku Janin betelai dalam ati...

     Udah ninga Dino bekangau ke atas, sida tuai rumah pan nurun ka pendai, datai di pendai peda barang Suri bisi, tang tubuh nadai. "Baka ni tu tuai, giga kitai sebelah tu mih iya, kada ka agi tampak" ku Apai Janin. "Au, giga kitai mih, ni bala ka nemu nyelam, selam dulu engka bisi enda jauh ari tu" ku Tuai Rumah.Aki Suri udah nadai daya meda Uchu iya nadai temu iya nyau nuduk ka diri ba sentang barang Suri ka di temu. "Kini dik uchu, iga ga dik enda kasih ka tua Ini dik tusah ati irau ka dik" ku Aki Suri.

    Bedau bulih 5 minit Sida iya begiga ka Suri dinga nyawa apai Dino enggau apai Lika rerauh ari babas. "Tuai oh tuai, tu endu ditu iya" ku Seduai iya ngagau. Ninga ka Suri di temu berumban Aki iya angkat nuju Apai Dino enggau Apai Lika ka rerauh tadi, sida tuai rumah pan pia. Janin enggau bala ka bukai baru ka nurun nyelam nyau enda nyadi sida iya pan belanda landa nuju Sida Apai Lika. Peda Pala suri balut darah. Janin laban sigi ka lancat, iya lalu mansang ngatung Suri ka endur iya dipalu tadi.

     "Ambi ai din dulu kena mesik mua iya" ku Janin. Beruban ga Tuai rumah ngauk ka ai alu sua iya ngagai Janin. Pesik pesik Janin mua Suri enda ga ngeleda. Ni ka tempik iya mih mua Suri ambi ngeleda. Bisi setengah Jam mih sida iya ngidup ka Suri, orang indu ka bisi dia nadai enda beterauh nyabak ngumbai Suri mati. Indai janin enggau indai lika pan dia ngaga diri nyabak. Pemuas ka ngidup ka Suri, nya baru Suri ngeleda. "Idup dik endu" ku Aki Suri nanya. "Dini aku aki, nama kita mayuh amai tu?" Ku Suri. "Nibuh mayuh tanya dik endu, bah bai niki Suri nya katung iya Dom" ku Tuai Rumah.

    Datai dirumah Suri lalu di galik ka Janin. "Kini dik tadi nyau luput ba pendai din endu?" Ku ibu Indai Dino. "Ka mandi aku tadi ibu, meda daun jambang manah amai, ka matah ka iya alu, baru ka matah sepik ku peguk aku pedis asai ka bisi orang malu ari belakang, sempat aku nguing ka belakang tang enda dipeda aku laban ka apas apas di peda ngejung ka aku luput" ku Suri. Sida iya lalu malik Indai Janin enggau Indai Lika. "Ukai pengawa seduai dik nya!!" Ku Bini Tuai Rumah merak seduai iya. "Ehh nadai aku tu oansut ari tadi aku tu di bilik" ku Indai janin. "Aku kenya mih nadai pansut bai ka enda dapat demalam" ku Indai Lika nyaut. "Enti nya seduai dik asuh ku buru tuai rumah seduai dik!!" Ku Apai janin enggau Apai Lika. Mayuh mayuh orang siku aja meda ulah seduai iya. Ka iya bejaku enda kempang, di lalai iya sinu ga meda Suri di perinsa seduai iya. "Pagila mih ku madah" ku Indai tuai nya alu cecakuk mulai ka diri ke setak....