SURI

SURI PART 17

SURI
TUSUN 17
DIKARANG DARA MELANJAN

Pemulai iya ari Sepital Janin duduk sepiak Suri. Mata iya bekuring meda Suri tang mulut semampai tuchum ngambi ka enda berupai pemechi iya ngagai Suri. "Sekali aku udah enggai meda sampai ila mih aku enggai, diatu aku meseti ngaga diri manah enggai ka but aku pansut" ku Indai Janin. Nadai mih sida ka bukai nemu ulah Indai Janin ka enggai meda Suri di kumbai sida iya amai badu mih Indai Janin enggai meda Suri.

Tang Bini Tuai Rumah enda ulih di kelalai ka iya, siku nya sigi nemu akal jai iya. "Taja orang enda nemu aku nemu ulah dik Indai Janin, ari perening mata dik ngaga diri aku udah nemu, nadai ngawa aku meda baka ni ulah dik, diatu enda dik ngayan ka iya ujung ujung ila tepantai but dik" ku Bini Tuai Rumah ga bejaku ka diri. Datai sida iya ba tengah laman. Suri lalu di iring Indai Jugam. Begau sida iya serumah meda Suri datai. Bedau tepeda ka Indai Janin sida iya.

Pansut siku nya ari Van. Meda Indai Lika lalu bejaku. "Nyin gila udah datai" ku Indai Lika. Nya mih orang nyau betelai pangan diri meda tudah Indai Janin. "Nai pansut gila nya pia, parai kitai serumah di biar ka iya enggau duku ila" ku bala sekeda bejaku. "Ohh Indai Janin Gila udah baik dik?" Ku Indai Lika ngaga ka Indai Janin. Ninga ka ngagau ka iya Gila amai angat asai pending tudah. "Sabar aku enggau dik nya bisi enda temu orang dik ila Indai Lika" ku Indai Janin berandau dalam ati.

Ba Sibu
Lemai nya pemulai Mikai ari endur kereja iya lalu ngambi madik iya Lenta. "Tumu abang pulai" ku Lenta enda ga tudah Mikai nyaut. Ati iya ingatka Suri di sapik Janin. "Temenung jauh sapa di ingat ka dik abang, Suri pia" ku Lenta. "Sengapa nadai aku ka ngerebut ambai orang" ku Saut Mikai. "Aik kemaya Suri nya bisi ambai, ketemu aku Suri nya mih enda rinduka orang laki sengapa" Ku Lenta. "Sapa agi Pangan iya Janin nya" ku Mikai nyaut. "Hahaha abang abang tentu dik salah sangka enggau Suri tu, Janin nya petunggal Suri baka ni iya enda mentas enggau siku nya, asai dik abang enti menyadi tauka petunggal dik mentas baka Janin mih dik" ku Lenta. Lama Mikai enda bebunyi iya ngenang tudah Suri. Nyau mamau tudah meda Suri ka pulai ngagai menua.

Seminggu asai ka setahun tudah Mikai ngenat kediri lelenggau ka Suri. "Eehh indai nama mih utai asai tu, chukup lelenggau asai rinduka Kumang Ati peremban dalam" ku Mikai natuk pen ba atas mija. Kin kia pengawa tudah nadai di kereja iya. Nyau enda ulih gawa tudah bai kelalu mamau ka Suri. Malik Mikai ngagai jam peda iya udah pukul 5 adu ka iya barang ka terabur ba mija iya lalu nyapai beg kereja enggai kunchi kereta. Mupuk iya ngambi menyadi iya Lenta pulai.

Datai ba endur siku nya gawa iya lalu nyangkai ka kereta nganti siku nya ka pulai. Udah tembu nusun utai nutup kedai Lenta lalu nuju abang iya. "Hai bujang, nama berita, Udah makai dik tadi abang?" ku Lenta nanya Mikai. "Hai adi sayau aku bedau aku makai aram makai dulu tua" ku Mikai. Lenta pan tama ka kereta seduai iya lalu mupuk ngiga kedai makai. Ba kedai makai seduai iya lulu ngoder pemakai.

Seraya ka nganti pemakai dia dih Mikai madah ka Lenta. "Adi nemu rumah Suri dik?" Ku Mikai nanya. "Nadai aku nemu abang enda ga aku kala nanya iya di rumah panjai iya" ku Lenta nyaut. Nya mih gamal tudah Mikai nyau Sinu ngenati ka diri enda nemu rumah Suri. "Nama abang ninga iya enda betah pia, sabar mih enti seduai bisi kaul nadai iya pegi jauh" ku Lenta.

Puas Mikai ka berunding ngiga alai rumah panjai Suri dia dih ya ingat ka Indai Lenta. "Mang jampat agi dik makai aram enggau aku ka balai" ku Mikai. Nya mih Lenta nyuap penyuap asi laban ka Mikai ngasuh jampat. Enggai iya mayuh utai di tanya laban ka takut di anu siku nya. Udah tembu makai Mikai lalu bebayar ka pemakai seduai iya. Mupuk seduai iya lalu nuju balai alai Mikai ka gawa. Datai seduai iya din Mikai lalu tama ngagai opis iya. Lalu ngiga surat riport Suri. Peda iya bisi alai rumah panjai Suri.

Udah tembu iya nyalin Rumah Suri iya lalu beguai guai tama kereta. Mupuk seduai iya nuju alai Rumah Panjai Suri. Lenta nadai nemu pengawa abang iya. Meda ka enda nuju Rumah seduai iya nya mih Lenta lalu nanya. "Kini tua bai di abang, nama tu ukai jalai ka rumah?" Ku Lenta. Enda ga siku nya nyaut utai tanya Lenta. Datai seduai iya ba simpang Rumah Panjai orang nya mih Lenta nemu nya Rumah Panjai Suri..

Laban ka nyau lemai nadai entu mayuh orang pansut ka ruai. Cun endar ga indai Lika pansut laban ka nutup pintu Ruai. Malik iya meda dua iku nya gining gining. Sigat nembiak laki nya, sapa giga seduai iya, enti Jadi enggau Lika untung aku bemenantu ka iya "ku Indai Lika bejaku ka diri lalau kaki iya nyingkang ka tanju."Sapa giga seduai dom, nama seduai nyau gining gining? "Ku Indai Lika." Ni rumah Suri ibu, kami duai iya deka ngabas iya "ku Lenta. Ninga ka nama Suri lama tudah Indai Lika enda bebunyi." Kada enda pangan Suri laki nya, enda ulih Suri jadi enggau laki nya, iya sigi menantu aku ila "ku Indai Lika betelai ka diri.

"Au din rumah iya tama mih seduai kitu lalu dom lalu mang" ku Indai Lika ngelalau ka seduai iya niki. "Abang Udah tetemu ka Suri, legi dik empu madah ka isi Ati dik" ku Lenta nyelai abang iya.Ningq tudah Indai Lenta tadi nyau begengam jari iya ninga laki nya ka Ke Suri. "Bisi maya di Suri anang ngumbai diri senang dik, pama ku madah Dom nya nyadi ka menantu aky dik sigi enda tau" ku Indai Lika. Datai ba ruai sida Suri. Indai Lika lalu ngaga diri manah.

"Suri bisi dia kita sebilik" ku Indai Lika ngagau. Peda di buka pintu cun Suri empu ga pansut. "Suri, lama amai aku enda ninga berita dik, lelenggau Asai iya" ku Lenta merap Suri. "Baka ni seduai nemu rumah aku?" Ku Suri nanya. "Nya ah ambai dik nya ngiga aku enda mih nemu dini iya bulih" ku Lenta nunjuk ka Abang iya, Nya mih mua Indai Lika mirah ngenat ka diri ka nganu Suri tang di tat iya enggai ka Seduai nya nemu iya enggai meda. "Pagila lusa dik Suri anang dik ka bepangan enggau iya" ku Indai Lika bejaku. Iya lalu madah diri pulai ka bilik diri.. chukup mih penyai kitai mensia pama kepapas ka orang idup menyana. Baka nya mih indai Lika kumbai berubah ngasuh jai agi...