SURI

SURI PART 12

SURI
TUSUN 12
DIKARANG DARA MELANJAN

   Lebuhka Suri ngeleda dia dih iya nyepik semua tubuh iya asai ka di pulas asai ka di tetak pedis magang. Peda iya ga jari nyau kembai menais telih. Keberai ai mata iya nyabak ngenat ka pemedis jari iya. "Aki Ini ka pulai aku merinsa amai aku baka tu, pedis aku Aki" ku Suri nyabak. Angkat iya begadai gadai nguji ka bediri nyau tejelepik kaki iya laban ka agi pedis isi. "Merinsa aku Akiiii, ambi aku Aki enggai aku diau ditu" ku Suri bendar agi nyabak.

      Ngerunsur ga iya ngirit diri ngambi ka ulih bepaut angkat, dia iya nguji diri bediri ba pemegai pintu. Nguji iya deka muka pintu enda ga ulih. Laban pintu di kunchi ari luar "Apu baka ni mih aku mansut ka diri ari rumah tu, mati aku enti lama diau ditu" ku Suri ngedas ai mata. Palik kiba palik iya ga kanan nadai ga meda jalai pansut. "Merinsa mih aku deh Aki, baka ni mih aku ngidupka diri enti asai tu, nyamai aku mati ari idup merinsa di jamah di ulun di beri jaku jai baka tu" ku Suri nyabak baru.

     Pemuas iya ka nyabak dia dih iya terundingka cermin ba bilik mandi dalam bilik nya. mansang iya ngagai bilik mandi bepegai sebelah dinding datai iya ba bilik mandi cun amai ga segeman tubuh iya. "Nasib mih Cermin tu jalai aku" ku Suri mansang baru ngagai endur iya tadi ngambi beg. Pulai baru ga iya ngagai bilik mandi berunding ga iya baka ni niki nya laban nadai endur iya berindik. Gining gining iya meda bilik nya dia dih iya tepeda ka tangga. Gaga mih ati iya laban ulih pansut ari rumah nya.

      Udah iya ngambi tangga, begadai gadai niki, ngurul ka beg iya ka luar. Udah nya iya niki cermin nya pan baka nya. Jari iya ka telih menais nadai di asai iya agi bai ati iya ngerunding diri deka lari.muai diri iya ari mua cermin nya ke baruh dinga beraup labuh ka baruh. Lama Suri ngenatka diri pedis. Bisi lima minit baru iya ngerayap lari ka diri ngagai pagar. Ari jauh iya meda bisi Lenta bediri tisi kereta. "Apuu idup mih aku nasib seduai iya bedau pulai" ku Suri ngerap bendar agi.

     "Abang abang, bisi meda senaya orang dik?" Ku Lenta malik ka rumah Indai Leya.
"Ni bisi orang anang mayuh mulut dik, lama amai kaban dik nadai aku ulih nganti iya, pagila aku gawa" ku Abang Lenta. "Ish sabar ka mih, ni nemu ea pansut legi, engka ibu iya bedau tinduk" ku Lenta ga nyaut. Pemuas seduai iya gining gining nilik ka dalam rumah nya, nya mih seduai iya sama meda baka bisi senaya orang. Bendar seduai iya merati sapa orang nya. Iya ka buyan agi udah sedia migai pintu kereta. Enti antu tinggal mih Lenta kenu ko ati iya.

      Makin semak makin di kelala Lenta, "Apu abang Suri nyin kasih amai iya nyau ngerayap iya, aram abang nulung iya tua" ku Lenta. Nya mih Abang Lenta nyau engkecit Niki pagar laban ka enda tinggi. Mansang iya ngagai Suri lalu di katung iya. Enda beilap ilap tudah Suri meda Abang Lenta. "Uihh kitu dik nama gaga dik dia sambut iya" ku Abang Lenta nyerauh tang enda besai. Berumban tudah Lenta nyambut Suri Ari sepiak nasib mih Lenta tu tinggi serta besai nyamai endur iya nyambut suri. Udah ka nyuak ka Suri Abang iya pan nikal baru ngambi beg Suri ka labuh. Tiki iya baru pagar sida iya tiga tama kereta..

     "Abang baka ni tua enggau Suri, anjung tua dulu iya ka sepital?" Ku Lenta. Enda ga abang iya nyaut. Ta di bai ia aja kereta nuju balai polis. "Apu nama kitai kitu? Pulai kitai" ku suri "Dik ka pulai alai pulai ka rumah ibu dik peda dik gamal dik nya setengah mati nya! Dik di dera nemu dik!!!" Ku Abang Lenta merak Suri. Tekenyit tudah Lenta ninga abang iya mangah merak Suri. Seumur idup iya enda kala meda abang iya baka nya. Engka bai iya polis kini iya enggai meda kenu ko ati Lenta.

Ba tinting melanjan

    Indai janin majak rerauh  minta di lepas orang nyau nadai senadai duduk di ruai labanka malam mayuh api ruai udah di padam tinggal berapa pintu aja mih bedau padam. "Janin ohh Janin lepas ka aku antu lepas! Bunuh aku seduai dik meapai ila enti aku lepas!" Ku Indai janin ngagau. "Ooohh ni kita antu sebayan pansut kita buka kerepau tu!!" Ku Indai Janin merak sida iya serumah. Nyau enggai nyadi tinduk ninga iya ka durah durah ba ruai. Sekali pansut bini tuai rumah ngemai kain perecak mit siti mansang iya ngagai Indai Janin.

    "Nya nya sepik asai dik! Ngeragak nya dik ka gila nya kami ka tinduk ninga nyawa dik!" Ku bini tuai rumah ngegul ka Kain perecak ngagai nyawa Indai Janin. Ketawa diri Bini tuai rumah meda Indai Janin enda dapat bejaku laban segul perecak nya ka dalam nyawa. "Tulah nya gaji dik jai nya isa dik" ku bini tuai rumah. Ari jauh Indai Lika pansut meda ulah Bini tuai Rumah ngelesey ka Indai Janin enda dapat bejaku. "Ke agi jai gi dik ila ku nangkup dik enggau pemansai, manah Janin nyibal ka jala. Uji aku tadi nyibal dik enggau sengayuh ngambi dik badu dadak" ku bini tuai rumah pulai ka bilik baru..

   Mansang Indai Lika ngagai Indai Janin. "Tulah dik wai laban ati dik jai, lintan dik jai ka agi badu dik berulah badu dik ngerasut orang kin kia" ku Indai Lika ninggal ka iya ka diri. Tutup api ruai tinggal enggau sida iya aja bedau. Nya mih capan (ukui) sida iya ngalik ka diri sepiak iya. "Ila kita nganti ku ulih ngelepas ka diri sigi ku pantap, ku bunuh kita!" Ku Indai Janin bejaku dalam ati. Ba bilik Janin enggau apai iya ba dapur. "Dom, kati penemu dik enggau indai dik nya keni tua enggau iya nya?" Ku Apai Janin. Lama Janin enda bebunyi iya nyau tusut runding..

     "Entah mih Apai, pemai dik aja, nya ku dik nya ku aku" ku Janin nyaut pemuas iya enda bebunyi. "Ba penemu aku anak, ka enggai di gaga ka tua langkau siti mih iya endur ngurung iya nganti ka suman" ku Apai Janin. "Baka mih Apai, ka enggai nadai ga cara bukai, nganti berandau enggau aya tuai dulu pagila" ku Janin. Seduai iya pan angkat mulai ka diri ngagai bilik besai. Tilik Janin indai iya benung mangum perecak mit. "Kasih dik indai ketegal aku enda jadi enggau Suri dik baka tu" ku Janin lalu ngalik ka diri. Apai iya pan sama ninduk ka diri...