SURI

SURI PART 14

SURI
TUSUN 14
DIKARANG DARA MELANJAN

  Ngelebuh sida Janin ka bepasung ka Indai iya tama ka dalam, Suri di bai misi pansut ngagai ward ke atas. Aki Suri labanka tuai nyau enda dapat nitih laju. Dia dih iya tepeda ka baka gamal Uchu iya Suri. "Nama nya ta baka uchu aku, nyamai aku ngagau ka nembiak laki nya" ku Iya bejaku ka diri "Dom ohh dom anang guai, nganti aku dulu" ku Aki Suri. Malik Tudah Mikai labanka ngasai bisi orang ngagau ka iya.

    "Dik ngagau ka aku tadi aki?" Ku tanya Mikai. "Au uchu aku ngagau ka dik tadi, sapa nembiak indu ka di bai indu misi nya uchu?" Ku Aki Suri. Lama Mikai enda nyaut perening iya amai gamal aki Suri. "Kaban menyadi aku aki, iya di perinsa ibu iya ka enggau iya diau ditu, lari demalam iya ari rumah di ambi kenduai madi aku" ku Saut Mikai. "Sapa nama iya uchu nemu dik" ku Aki Suri ga nanya. "Enti enda salah silap aku menyadi aku ngagau ka iya Suri aki, demalam iya di anjung aku ngaga ripot pulis asal menua Tinting Melanjan" ku Mikai nyaut.

     "Apu uchu aku nya, patut aku asai ka ngelala meda iya di tarit misi tadi, kasih mih uchu aku deh deh" ku Aki Suri nyabak teduduk "Uchu dik Suri nya pia aki? Enti baka nya aram mih nitih ka aku dik, tang anang enda madah ka bala dik dulu" ku Mikai. Angkat tudah Aki Suri gadai gadai "Au uchu nganti aku ngagau ka bala aku dulu ditu dik nganti aku anang lari" ku iya lalu mansang ka dalam. Datai iya di dalam iya lalu ngagau ka Janin enggau Tuai rumah.

     "Dom Janin, wat kitu seduai, bisi utai ka di padah aku" ku Aki Suri. Mansang seduai nya ngagai iya lalu nanya tudah Janin meda mua Aki Suri baka ka baru nyabak. "Nama ga dik nyabak aki, nama sakit dik, enti sakit alu nganjung diri kitu kala ka sigi ditu" ku Janin. "Dom, uchu Suri bisu di sepital ditu, aku tepansa ka orang ngemai iya tadi" ku Aki Suri madah ka Tuai Rumah. "Nai nama pemedis endu nya apai, nama nadai meda Indai Leya ga" ku Tuai Rumah.

    "Panjai jerita iya legi seduai pinta tusi ka Wat di luar din" ku Aki Suri. Sida iya tiga lalu pansut peda Mikai agi nganti Sida iya. "Tu Wat ka mai Uchu Suri tadi Dom" ku Aki Suri. "Nama amai Suri ka ditl tusi dik ka aku tadi akih?" Ku Janin nanya. "Au Suri mih iya ka di jamah Ibu iya empu di rumah, baka ka tusi aku ngagai dik tadi Aki, malam tadi iya ngelari ka diri labanka puas di perinsa ibu iya" ku Mikai. "Apu aram mih kitai ngusung iya kin, tinggal ka dulu Apai dik Dom" ku Tuai rumah.

     Nyau mih sida iya empat betunda udi nitih ka pangan diri. Datai ba ward sida iya empat lalu tama. Gining gining mih ka ngiga katil Suri. Nyau sida iya nanya indu misi ka mija penanya. "Misi, dini uchu aku benama Suri, kati ni iya" ku Aki Suri.. "oh pesakit nama Suri belakang Nyin aya, iya dalam bilik, bah aram aku nganjung kita" ku Misi nya alu angkat, sida iya lalu nitih. Datai ba Mua pintu dia Misi nya bejaku Baru. "Aya, nya pesakit nama Suri, tau tama aya tang anang lama" ku Misi nya lalu ninggal ka sida iya.

Ba Rumah Indai Leya.

   Angkat Indai Leya ka nurun ka baruh. Terus iya nuju Bilik Stor endur iya nyimpan Suri. Jampai iya kunchi di kait ka iya ba dinding lalu di buka iya bilik nya. Sekali tekenyit iya meda Suri nadai di bilik. "Nadai guna dik Suri, pandai amai dik lari!" Ku iya ngentak ka pintu ngena jari. "Kini ka tunga Anak Ampang nya lari, anang iya pulai ka rumah panjai aja udah!!" Ku Indai Leya. "Manah aku pulai ka rumah Leya dulu, enda ulih aku ditu, takut ka iya ngeripot ka balai tauka pulai ka rumah panjai" ku iya lalu niki ka bilik lalu nyimpan semua gari ka di guna.

   Udah ka tembu dia iya lalu nurun baru ka baruh, giga iya kunchi kereta nadai di temu alai nyimpan. "Ahhh kini kunchi kereta aku!" Ku Iya meradak. Abis utai di kusai alai iya ngiga kunchi pemuas di temu iya ba selepak bangku. Iya pan beguai guai    nuju pagar lalu di buka udah nya iya lalu tama kereta. Lalu mupuk pagai nadai di kunchi bai iya berumban lari. Ngelebus iya ka mupuk nya baru bala polis datai.

      Datai bala polis ba depan rumah Indai Leya peda sida kereta nadai pagar telenga pia aja. "Suspek melarikan diri " ku Polis siku nya bejako. "Kita balik balai dulu tunggu Tuan Mikai aturkan macam mana" ku siku ga, sida iya pan lalu pulai ngagai balai baru. Datai Indai Leya ba rumah anak iya ngaga diri nadai besalah ngereja pengawa. "Eh tumu dik kitu indai" ku Leya nanya indai iya meda tumu. "Eh enda betah uchu mih nya" ku Iya nyaut. Nadai mih Leya di tipu indai iya.

Ba Sepital

  Tama sida iya Empat ngagai ward Suri. Dia dih Aki iya lalu nyabak merap Suri ka benung tinduk laban udah di beri misi ubat pemenat. "Kasih uchu aku deh, nama mih ibu dik sanggup ngaga baka nya" ku Aki iya. Ninga Suri nyawa baka Aki iya peda iya Aki ia. Ngenyit iya angkat lalu malik ngagai Mikai enggau Lenta. "Kati aki tau ditu? Sapa madah ka aki aku bisi di sepital?" Ku Suri nanya.

    "Kami nganjung indai ku, udah nya aki dik meda dik benung asur ka orang ngena katil nya mih alai kami nemu" ku Janin nyaut. "Pulai dik kumang badu diau ditu dik, pedis di sayau nadai kami nemu" ku aki iya. "Aki ukai aku enggai pulai, biar mih aku gawa ditu, kena nupi seduai ini, kandang ka aku sakit tu, aku pulai udah gerai aku gawa ditu begulai enggau bakih aku" ku Suri. "Au mih uchu ni ku dik, tang anang enda pulai dik kasih ka tua ini dik irau ka dik, patut mih dua tiga ari tu aki seilu ilu ngenang dik tu pengawa ibu dik" ku Aki iya.

     Udah sida iya berandau dia dih nyau chukup jam ga alai mulai ka diri. "Uchu aki pulai dulu, bisi ari kenduai ini ngabas dik kitu, nyaga diri dik uchu" ku Aki Suri merap uchu asi iya. Keberai ai mata meda pemerinsa uchu iya enda kala nyamai. Mupuk mih sida iya tiga pulai ka baruh baru. Tinggal Suri, Lenta enggau Mikai. "Dik tinggal dulu Ri lemai aku datai baru" ku Lenta merap Suri. Nyadi Mikai enda beilap meda gamal Suri nyau tegenung iya enda perasan ka seduai nya meda ulah iya.

    "Bajik taja mua abis litan" ku Mikai ngerandau diri. "Ehmm abang nibuh nyau tegenung meda anak dara orang au" ku Lenta, Nyau tekenyit tudah Mikai ninga Lenta ka munyi nya "sengapa dik nya mang, bah mupuk tua" ku iya ngelari ka diri meda Suri. "Au mih, mupuk ku Ri,Lemai ku datai baru" ku Lenta. Seduai iya pan pansut. Sebedau pansut Mikai malik ka belakang. "Legi ku mandukka dik bubur nyaga diri au" ku Mikai. Kebatang iya Mikai lama udah naruh ati ngagai Suri kenyau iya ngambi Lenta pulai kereja.