"Siraulo lang ang maniniwala sa sumpa na yun. Malabong magkagusto ako sa kanya dahil alam ko sa sarili ko na babae pa rin ang gusto ko. Pero bakit siya na lang lagi ang nasa isipan ko?"
-Gunter
Kaya bang baguhin ng isang halik ang lahat?
Status: Co...
Oops! Ang larawang ito ay hindi sumusunod sa aming mga alituntunin sa nilalaman. Upang magpatuloy sa pag-publish, subukan itong alisin o mag-upload ng bago.
Gunter’s POV
Alam na alam ko ang pinagkaiba sa boses ni Lance at Kei. Hindi ako pwedeng magkamali dahil alam kong si Kei ang kasama ko kagabi at hindi si Lance. Pero hindi ko maintindihan kong bakit nandito si Lance sa loob ng aking unit at siya pa mismo ang umamin na siya ang tumulong sa akin kagabi.
“Teka anong ibig mong sabihin na dito kana titira?” tanong ko habang patuloy pa rin siya sa pagbibihis.
“Hindi pa tapos yung renovation ng condo unit ko kaya dito muna ako” tugon niya matapos niyang makasuot ng polo.
“Gaano katagal?” dugtong ko na siyang nagpahinto sa kaniya sa kaniyang ginagawa na para bang hindi niya nagugustuhan ang pamamaraan ng pagtanong ko.
“A month, I guess?” sagot niya at saka ako tinalikuran para ayusin ang kaniyang bag.
“Isang buwan? Anong klaseng renovation ba ang gagawin sa unit mo at ganun katagal?” pangungulit ko dahil hindi talaga ako komportableng makasama siya sa iisang kwarto.
“Pinapalitan ko lahat ng furnitures at mga appliances. Pinapaayos ko ang wiring ng internet connection at maging ang set-up ng gaming station ko dahil plano kong maging game vlogger gaya ng idol ko na si James Wells” biglang nanumbalik sa aking alaala kung gaano kataas ang paghanga ni Lance kay James dahil dati ang mga videos niya madalas nitong panoorin kapag hindi niya matapos ang mission ng kaniyang nilalaro. Hinihikayat ko pa siya dati na maging game vlogger ngunit wala raw siyang panahon pero ngayon ay tila unti-unti na niyang inaabot ang mga bagay na matagal na niyang nais.
“Masyado naman atang matagal ang isang buwan?” hindi ko mapigilang magkomento.
“Kung kaya mong gawin yun in less than a month ay matutuwa akong i-hire ka” paghamon niya sa akin at siya’y naupo sa couch habang abala sa kaniyang cellphone.
“You can call dad kung may reklamo ka” dugtong niya at inabot sa akin ang cellphone niya na tumatawag kay Papa Kendrick. Mabilis kong pinindot ang end-call dahil ayokong maabala ang aming ama dahil sa kung ano-ano lang ang babanggitin ni Lance.
“Papasok na ako sa school and please save some space for me dahil maglalagay na rin ako ng mga damit ko sa drawer” huli niyang sabi bago siya lumabas ng pinto.
Naiwan ako sa loob ng aking condo unit na tulala at tila hindi maiproseso ng aking isipan ang lahat ng mga nangyayari. Una nalaman kong may nobyo pala ang babaeng matagal kong nililigawan at yun ay ang kapatid ko sa ama na si Lance. Pangalawa, ang labis na pinag-aalala ko na magkaroon kami ng ilangan ni Kei dahil sa nangyari kagabi ay hindi mangyayari dahil si Lance din ang taong tumulong sa akin para makaraos. At ngayon malalaman kong titira kami sa iisang kwarto?
Hindi ko alam kung ilang minuto akong nakatunganga bago ko mapansin na 20 minutes na lang ang natitira bago magsimula ang una kong klase. Mabilis akong nagtungo sa banyo upang makaligo. Hindi ko na binigyan ng pansin ang tumatawag sa aking cellphone. Dumagdag pa sa kamalasan ko ay ang madulas sa banyo dahil sa labis na pagmamadali. Hindi ko napigilang mapahiyaw dahil sa labis na sakit na nadarama. Ang sama ng pagkakabagsak ko at ang balakang ko ang napuruhan. Halos hindi ko na magawang maligo ng maayos dahil sa kirot. Iika-ika akong lumabas ng banyo matapos kong maligo ng pahapyaw. Halos hindi ko maisuot ang aking pantalon dahil sa pananakit ng balakang ko. Hindi ko na mabilang kong ilang beses akong nagmura habang binabanggit ang pangalan ni Lance. Tila wala ng magandang nangyari simula nang magkita kaming muli.
