مرحبا وياربي تكونون بخيير
اجتني رسائل ع الخاص تسالني بيها ويستفسرون مني واكثر الاسئله الي ما اكدر اجاوب عليها
منو ضياء؟
شنو يشتغل ؟
شنو منصبه ؟
وتساؤلات انو ضياء جاي يستغل منصبه واذا كانت اي وحده غير سوسن يمكن ما يساعدها او يمكن حتى يستغلها طبعا اولا
واخيرا تبقى وجهات نظر
وانا اكتب بالقصه خطرلي نفس السؤال ونفس وجهة النظر وتساءلت بيني وبين نفسي وبعدين سالته الضياء
وكان الرد على لسان ضياء
——-
انا من حاولت اساعد سوسن ساعدتها على انها قضيه انطرحت امامي بعدت جميع العواطف الي يمتلكوها كل الناس
واتناسيت كل شي صار
وانها موجوده ابيتي اتعاملت على انها قضيه ومن اول ساعه قررت انو لازم نجمع جميع الخيوط الي توصلنا للحقيقه
الحقيقه الي اكثر من ثلاث ارباع النساء يعانن منها بمجتمعنا العربي عامه وبمجتمعنا العراقي بصوره خاصه
هاي المعاناة التي تكون على شكل غبن او عنف او تجني
وبعد ان سمعت قصتها سمعتها من جانب واحد منها هي وبس واي شخص متمرس مثلي وماره علي آلاف القضايا
الي يمكن تشبه قضية سوسن ويمكن اصعب من قضيتها فلازم اي واحد مكاني كان اكيد حيدرس القضيه
من جميع النواحي ويسمع جميع الاطراف قبل ان يبلش بالمساعده والحكم
صحيح اتعاطفت ويه سوسن لكن كان ممكن ان تكون تكذب لذلك قررت ان اعرف القضيه من جميع جوانبها واتعرف
على اشخاصها من قرب وبعدين اقرر اذا كنت اساعدها او ان يكون حدي وياها دخيله فقط ممكن اساعدها حسب
الاعراف والتقاليد الي يحتمها علينه مجتمعنا
من سمعت كلام ضيدان الي كاله المصعب من بدا يحقق بيوم ما لكو الجثه
انو ناس جاي تنقتل يوميه ومحد يعرف او يحقق بقضاياهم وكلامه فعلا بي بعض الصحه والكل لامس هذاالشي
سامع او شايف خصوصا ومواقع التواصل الاجتماعي مهمتها توصل هيج اشياء بقصد التنبيه او التشهير
قبل ايام وبجائحة كورونا ولازم الكل يتواجد بالبيت والكل يغسل ويعقم باحدى مناطق محافظة البصره نزاع عشائري
استمر لمدة ست ايام بلياليها الطرفين يستخدمون انواع الاسلحه ما يهمهم وباء ولا حتى اجواء الشهر الفضيل ولا حتى
من اياذن المؤذن وقت الفطور او وقت السحور والي عرفته موجود وياهم ناس واصلين من ناحية الشهاده او المنصب
تعرفون شكد اكو ضحايا وطبعا ما راح اهاليتهم ينطون اي شي عنهم لان لازم يتكتمون حتى ياخذون الثار
وكثير من الحوادث الي تصير بهذا البلد الجريح
اما الي يكولون استغل منصبي او اذا كانت اي وحده بمكانها ما نقدم الها المساعده
لا هذا كلام مغلوط للعلم اي قضيه صغيره كانت او كبيره وتوصل لاي جهه متنفذه لازم تاخذ مجراها بغض النظر
عن بعض الاشياء الي تحصل والي موجوده بالاساس من رشوه او هذا من طرف مسؤول او..الخ
اما الي يكولون ما نقوم بواجبنا لا مووصحيح احنا نقوم بواجبنا لكن بسبب تكتم الناس عن كثير من الحوادث وما تفرضه
علينا العادات والتقاليد تخلينه ننتحي جانبا في كثير من الاحيان ونخلي الطرفين يحلوها بتراضي
صحيح البلد يعيش بدوامة وصراعات داخليه وتدخلات خارجيه وفساد اداري وحرب داعش لكن خلونه ننظر البعض
الاشياء الجيده ومنها
اكو جهود مبذوله ورجال مجهولين يعملون ليل ونهار حتى يدافعون ويحمون هذا الوطن من الداخل والخارج
ومن غير الممكن ان يتخاذلون او يبيعون ذممهم والدليل ما فعلوه بعمليات تحرير مناطقنا العزيزه بالموصل والانبار
ولحد الان هؤلاء الرجال الي ما همهم طائفه او مذهب او دين كل همهم ان يحررون ارضهم
نفسهم همه الرجال الي يعملون من اجل العداله وكشف السيئيين والقتله والمهربين
نفسهم الي يقدمون المساعده للي تستجير بيهم وهاي مو جديده على العراقيين اهل الغيره والنخوه هواي اكو ناس
كل همهم حماية الوطن ومساعدة الناس الي تعبت والي وكع عليها ضيم وقهر
الي يگول لا ما كو هيج شي انا اكلهم لا اكو واكو ناس يعملون بالخفاء كل همهم حماية الوطن وكشف المجرمين
الجريمه تبقى واحده وان اختلفت في مستوياتها الي يبيع وطن ويسمح الناس اغراب ان يدخلونه ويحطمون كل شي
حلو بي ويقتلون ويغتصبون ويسرقون الضحكه من وجوه الاطفال ما يقلون خسه ونذاله من اولئك المجرمين
الي يرمون المحصنات ويتهموهن بشي ما صاير حتى يحققون ماربهم الدنيئه نفس الجريمه الي تخلي امراه
تغرك بالنهر ومحد ينطي خبر عن اختفائها نفسها الجريمه الي تخلي شاب يغتصب طفله عمرها خمس سنوات ويقتلها
الجريمه الي تخلي ناس مسالمين يمشون بالطريق وفجاه تنفجر يمهم سياره تقتل الشيخ والطفل والشاب والمره
اذن الجريمه جريمه لكن تختلف نسبتها من واحده لاخرى
بالمناسبه
لمن بديت اشتغل لارجاع حق سوسن ما استخدمت منصبي كان عملي فردي وراح تشوفون الاشياء الي سويتها حتى
احارب شي اسمه طغيان وعنف وباطل ——
احبائي هذا كان رد ضياء 👆او وجهة نظره وانا حفاظا على الثقه الي انطاها الي هذا الرجل راح اوقف القصه على
الرغم من انه هو ما قبل اوقفها بالعكس كلي انشريها خلي القراء يعرفون شنو سويت وحتى ما ينطوون احكامهم جزافا
لكن تدرون من اول ما بديت انشر بعض القراء ع الخاص يدخلون يغلطون ويسبون طبعا ما ارد عليهم لان بصراحه
ما احب انزل المستواهم شفتوني شگد اتعب بالكتابه رغم ظروفي
لكن ما اقبل الا انطي البارت حقه
راجعوا البارتات السابقه ولا بارت كتلكم صوتو لان هاي القصه بالذات اعتبرها فريده من نوعها وما اتصور كاتبه اتطرقت
الى هكذا موضوع وعندي قناعه راح تكبر يوم بعد يوم لكن الي صار ما اعرف شسميهم
ضعاف نفوس او ناس مهمتهم التسقيط بس كاعدين يتكلمون ويقلون ادب وهي مابيها اي شي يدل على قلة الادب
لذلك انا حفاظا على وضع ضياء ومركزه وايضا على وجود سوسن راح انسحب رغم رفضهم الانسحاب
ارجو المعذره وشكرا الكم والسعة صدركم واتمنى ان اكون خفيفة ظل عليكم اتقبلو تحياتي وامتناني الكم
فعلا كنتم خير صحبه واخوه اعزاء
انتظروني بقصه جديده
تحياتي
#انيين الليل #
أنت تقرأ
##الشيطان اختي##
Chick-Litقد يكون الاسم غريب الا انه مطابق لما سنقرؤه ونعيشه قصه حقيقيه رغم ما فيها من مواقف قد تكون بعيده عن واقعنا لكن تذكرو بان الخير والشر موجود من زمن ابينا ادم حينما ترك الجنه وعندما قتل قابيل هابيل هذه هي الحياة مضطرين ان نتعايش معها رغم ما بها من م...
