السلام عليكم ورحمة الله وبركاته
طبعا تعجز الكلمات عن وصفكم
هذا يدل على عظم تربيتكم واخلاقكم العاليه 🥰🥰🥰
صدگوني ما گدرت الزم نفسي من البكي وانا اقرا تعليقاتكم 😭😭😭
لمن ما اتگلولي لا استسلم الضعاف النفوس وهاي ناس مهمتها التسقيط والي مثلج لازم يتحمل لان اخذ على عاتقه
ان يوصل مشاكل موجوده ومتعايشين وياها وجاي تنخر بمجتمعنا
انا حالي حالكم وحال جميع العراقيات الا القله القليله طبعا مريت بمآسي وغبن وخذلان ومن اقرب الناس النه
تعرفون مو اول مره اتهاجم يمكن قريتو قصة (فصلية الغربيه )الي كتبتها لوتشوفون حجم الهجوم والغلط الي وصلي
وانو انا اشجع ع الطائفيه واحنا اهل الجنوب والروافض بصوره خاصه همه الي صنعو دا - ع ش
مع العلم انا بالقصه ردت ابين انو الفصليه هي الي يفصلوها فقط اذا واحد قتل الثاني او اذا واحد اعتدى على شرف اخر
فمن يقتلون بنتهم او هي تدخل على ناس راح ياخذون فصل من اهل الولد فاما يقتلون بنتهم او يحكمون عليها ما يشوفوها
باقي عمرها والقتل العمد مو اذا يسوي حادث بسياره او واحد يطلب الثاني فلوس ويبسطوها للقارئ بالبدايه يكرهونها
وبعدين تعيش بقصر وملابس وعطور والكل يحبها وهذا الشي ابد مو صحيح لذلك اكثر علماء الدين وبجميع المذاهب
حرمو الفصل والفصليه وطوو الصفحه الا القله القليله الي بعدهم بعقولهم المتحجره
وبقصة فصلية الغربيه ما خليت للطائفيه طريق بالعكس بينت الحقيقه الي غايبه عن كثير من الناس انو احنا بالجنوب
علاقتنا مع اهلنه بالانبار والموصل من احسن ما يكون ولا توجد تفرقه وبعدين جاوبتهم وگلت بالحرف الواحد
ان ارضنا في الموصل والانبار تزهو وتفخر انها ازهرت ورودا واصبحت خضراء بدماء اهلها بالجنوب
وبعدين عرفت هم مدفوعين من ناس ما يحبون يشوفون الاخوه والصداقه بين قراء من وراء شاشات صماء تجمعهم
الكلمه وصنع الابتسامه من قبل اناس مجهولين صدكوا قصة فصلية الغربيه طلبو مني بمنتدى عربي ان ينشروها
ويطبعوها على شكل كتاب لكن وضعو شرط ما انشرها بالواتبااد الا اكملها الهم بالمنتدى لكن انا رفضت
لان اهم شي عندي قرائي الي همه اهلي وناسي
لكن هالمره غير كان الهجوم صعب من جميع النواحي
مثلا احدهم
—بربك كم دفع لك ضياء حتى تبيضين صفحته
قارئه اخرى كتبت الي تگول بالحرف الواحد
—سوسن انسانه وضيعه وساقطه لان تحملت عشرين سنه لكن قررت تجرب الحرام
اخر
—ضياء من ياحزب ليش هي الدوله بيها واحد شريف
والكثير الكثير من الكلمات
وانا كانسانه مأمنيني على هذي القصه ماكنت اضم عن الابطال شي كنت اصور المحادثه وابعثها
وكان الرد منهم اثنينهم
::لا يهمك شي استمري حتى لو زاد الهجوم علينه لان انتي جاي تعالجين قضيه مو فقط قصة حب ومكياج وملابس
نوم وقضايا اخرى لا انتي تعالجين قضيه موجوده ولحد الان لازالت موجوده وبكثره جاي يعانون منها
(تحرش وعنف اسري واتهامات باطله وتضحية امهات منكسرات ومخذولات )
ومن كتبت الملاحظه وقريت تعليقاتكم عرفت انو انا ابد ما غلطانه من جازفت واخذت هذه القصه هاي التعليقات الي تگلي
—لا تقطعيها احنا قرائج والنا حق عليج
او الي تكول
——لا تقطعيها كثير ناس امثال ضيدان وقبيله يحاربون ناس مثلج ومثل ضياء
واخرى تقول
—-احنا نحبج ونحترمج ونكن الج كل تقدير رجاءا لا تقطعيها
من غير الرسائل الي وصلتني ع الخاص اما المفاجأه فهي جاءت من ضياء وسوسن الي گالو اذا انتي ما تكمليها
مضطرين احنا نكملها رغم انو احنا مو كتاب لكن نكتب ما تبقى منها حتى لو بدون سرد للحوادث
بصراحه فاجؤوني مثل مفاجاتي باولئك الي كانو يتكلمون ويشهرون لكن من قررت اوقف القصه الكل سكت
محد اتكلم اذن كان المهم عدهم اني اتوقف عن نشر القصه او ما تبقى منها
انا اگول الجميع القراء الاعزاء
شكرا الكم الثقتكم واخلاقكم وانا ابد مو من النوع الي ما يشكر اي انسان قدمله لو كلمه
فالكلمه الطيبه صدقه
ومن لم يشكر المخلوق لم يشكر الخالق
انا من قررت اكتب في هذا البرنامج المحترم قررت اكتب قصص تحاكي مجتمعنا عموما ومعاناة المرأه وما تتعرض
اله من سلب حقوق واهانه وغبن وقهر بشكل خاص مو حتى احصل على تصويت وانتم لامسين اختلافي عن جميع الكاتبات
واريد اقول
::انه القاع ممتلئ من امثال ضيدان وقبيله والافاعي تبقى افاعي مهما غيرت من جلدها ::
لذلك انا لعيونكم راح اكمل القصه لكن اريد منكم تتحملون تاخيرها
تعرفون نمر بايام عصيبه والتزام ودراسه وامتحانات
القصه بيها مفاجات لا تستعجلون لكن بالاول من حق باقي الابطال ان ياخذون دورهم تعرفون ما احب اغبن اي شخصيه
مهما كان دورها بسيط ً
احد القراء الاعزاء قام بنشر قصة (لست خائنه )ع الفيس بگروب قصص عراقيه حقيقيه وانا بدوري اقدم اله الشكر والامتنان
والكم يا اجمل وارقى قراء عاجز لساني عن شكركم كذلك احب اسالكم عن احد القارئات العزيزات
الي دائما كانت تقرالي واتعلق لكن الان بهاي القصه هي غائبه فمن يعرف عن العزيزه (يقين الموسوي )شي
يبلغها سلامي وتمنياتي الها بالخير والموفقيه وعسا غيابها خير
❤️💙احبكم واتمنالكم الخير والسعاده يارب ❤️💙
#انيين الليل#
أنت تقرأ
##الشيطان اختي##
ChickLitقد يكون الاسم غريب الا انه مطابق لما سنقرؤه ونعيشه قصه حقيقيه رغم ما فيها من مواقف قد تكون بعيده عن واقعنا لكن تذكرو بان الخير والشر موجود من زمن ابينا ادم حينما ترك الجنه وعندما قتل قابيل هابيل هذه هي الحياة مضطرين ان نتعايش معها رغم ما بها من م...
