طريق كلها و كلامها كيتردد في عقله "نتفارقو" "غادي نتزوج و لكن ماشي معاك" كيفاش تقدر تقول هاد الهضرة و بسهولة، الا ماكانتش ليه فماغاديش تكون لشي حد اخر، كمل طريقه و عازم انه يدير عليها اي حاجة. محمد:" ميي ا مي " دخل محمد لدار و كيغوت على مه باعلى صوته، خرجات لعندو كتجري من الكوزينة فاظمة:" ياك لاباس !!؟ اش كاين ؟ جيتي صباح بلا خبار حد و دابا كتغوت، قول اش عندك ا ولدي و ماتشطنيش عليك" محمد جرها و دخل لبيت كلسو, حك راسه عدة مرات و كيفكر كيفاش يفاتح مه بالموضوع، و اينا كلام ايقول ليها، بقى كيدور على في الهضرة غير باش حتى يعرف اش يقول. محمد:" فين هو با و خوتي بعدا!!؟ " فاظمة:" راه وقت الحصاد هذا، كاع رجال الدوار في بلادهم كيحصدو" رجع كيفكر و باقي متردد و تالف، و فاظمة حسات بيه، حطات يديها على حنكه باش تشجه يهضر. فاظمة:" قول اش ضارك ا ولدي، اش عندك" محمد:" مي انا جيت باش نخطب عايشة، و ماغادي نمشي حتى تكون عايشة ديالي" كلامه خلاها تسحب يديها من وجهه، و تغيرات نظرتها من حنية لغضب، و ندمات كاع علاش شجعاته باش يهضر فاظمة:" واش نتا باقي مابغيتي تبرا من هاد المرض، انا قلت مراهقة و ادوز و لكن نتا بنتي ليا تصطيتي" ناض من بلاصته و حاس ببركان غادي يتفاجر داخله، علاش كلهم واقفين في طريق سعادته، باغي غير عايشة بوحدها لاش رافضينها، سؤال بقى محيره لمدة ست سنين محمد:" بغيت غير نعرف علاش مابغيتيهاش ا مي علاش هي بالضبط !!؟" فاظمة:" هاديك البرهوشة هي لي مادخلش عندي لدار، مابغيتهاش اوو" محمد:" و هي لي غادي ناخد ا مي ، الا بغيتو و الا لا، انا غادي نمشي نخطبها بغيتو تكبرو بولدكم غادي مرحبا، مابغيتوش انمشب بوحدي" فاظمة:" بغيت نعرف غير اش دار ليك ديك الصفريطة !!؟ واش ساخرة ليك حتى كتهتت بيها!؟؟" محمد:" هي لي بغيت ا مي ، ماساحرة ليا ما والو ، انا قلت لي عندي ا مي و نتوما قررو" دمعاتها نزلو، الشيء لي خلا محمد يقرب ليها و يطبب عليها، و يتهدن شوية محمد:" علاش ا مي باغي توقفو في سعادتي !؟ علاش ماتوقفوش جني و تعاونني، واش ماباغيش تشوفوني فرحان ا مي ؟" فاظمة بدات تمسح دموعها:" ماشي معاها اتكون فرحان، مابغيتهاش انا ماشي هي البنت لي بغيت ليك، علاش باغي نتا تعذبني، اش عجبك فيها !؟" محمد:" كنبغيها ا مي، و الا ماتزوجتش بها هي ماغاديش نتزوج بحتى وحدة اخرى ا مي " فاظمة:" و اصلا هي جاو فيها الخطابة و خوتها غادي يقبلو، لاش باقي باغيها !؟ خليها تزوج ووتعيش حياتها و عيش حياتك نتا " "تعيش حياتها و عيش حياتك" نفس كلام عايشة، علاش كلشي كيقول نفس الشيء، هاد الجملة خلات الجنون يركبوه، ايوقف في وجه كلشي علة قبلها، سايس مع دارهم و مابغاوش ايدير شرع يديه. محمد:" عايشة ديالي، و ماغادي يديها مني حتى حد، و انا انعاود نقول ليك ا مي، الا مامشيتوش معايا نمشي بوحدي" فاظمة صوتها ترفع :" هي لي ماغاديش تكون ليك، الا مشيتي تاخدها ما انت ولدي ما انا مك، انسخط عليك حياتي كاملة" كلامها خلاه يجمد في بلاصتو، علاش مصممين يكون عقبة، ضار رمقتها بنظرة باش يتأكد من صدق كلامها، سحب نفس و خرج فحاله.
