الفارس والوردة

البارت السابع

الكاتبة : عليا الناصر

الفارس والوردة

البارت : 7

الملثم : ورى ما خلص الشعر اللي گاله لشذر تقرب بسرعة عليها وبحده ليش تريدين تذبحين نفسچ وتموتين كافرة وسحبه للچلاب من إيدها وشمرة بعيد

شذر : صاحت بي وإنتَ شعليك بية عسى ما أروح لجهنم بعدين منو إنتَ وشجابك هنا

الملثم : مو مهم منو أكون أني واحد من هالخلگ والمهم هنا هو إنتِ لأن اللي أعرفة عنچ وحدة شخصيتچ قوية وما تنكسرين ومو إنتِ اللي تستسلمين من أول مشكلة تواجهچ وتفكرين تنتحرين

شذر : وشدراك إنتَ بشخصيتي ومشاكلي أصلاً إنتَ منين تعرفني وسبق وسألتك منو إنتَ جاوبني

الملثم : گعد گدامها على رجليه گتلچ أني مو مهم بس أعرفچ كلش زين وبعدين الدكتورة اللي تمد إيد  المساعدة لكل واحد محتاجلها حتى لو على حساب نفسها ما يصير تضيع بشربة مي لسبب تافه زين ما فكرتي بالناس اللي محتاجتلچ وتحبچ شلون راح يتحملون خسارتچ ولو تصاوبنا منو اللي راح يعالجنه ويداري جروحنا

شذر : إنتَ أخوه لهذا حمزة الحارس بس إنتَ مصاب وما يصير تفرفر وجرحك بعد طري وما برى ولازم تبقى مرتاح وما تطلع الى أن يطيب جرحك

الملثم : دام دكتورتي اللي ساوتلي العمليه شاطرة ما عليه كل خوف وإرتاحيت هواية وما بية شي صحتي زينة والحمدلله

شذر : گامت روح منا مو ناقصني مصايب وماكو داعي تعرفني وأعرفك ومساعدتي إلك تنساها نهائيا ولا إنتَ شفتني ولا أني شفتك ومشت من يمة

الملثم : منعها وهو يوگفها أني إسمي فارس وتشرفت بمعرفتچ دكتورة وإكبري على الجراح ترى محد مرتاح ويا اللي يهواه

شذر: وأني ما تشرفت بمعرفتك اللي ما من وراها غير بس المصايب ووجع الراس وعافته وراحت لبيتها دخلت

الملثم : آآآخ منچ بس لو تسدين لسانچ وما تخلينه فالت چان ما وصلنا لهالحاله هذي وراح للإسطبل غير ملابسة وطلع وإتصل على حمزة ها وينك عوف كل شي بيدك وإعرفلي النقيب علي منين درى بشذر طالعة من البيت وما راجعة غير قبل الفجر ومو على أساس حضرتك منتبه زين ومحد شافك يول شبيك هو علي بالسانة إجى على شذر وسألها تمام راح أنتظرك خلص وتعالي وراح لبيت أبوه دخل 

زينة : من شافته ها شصار ذبحتها إذا بعدك ما ذبحتها همزين لأن خلي تولي لا توسخ إيدك بيها إشمرها لأهلها وخلي همة يطمون عارها ولو ما أتصور راح يسولها شي لأن همة فري زيادة عن اللزوم وما يديرون بال وعادي عدهم إذا صاحبت وطلعت ويا رفيجها ما عدهم غيرة وشرف ومخليها على حل شعرها و..

ساطع : قاطعها إشششش ولا كلمة زايدة ومسكها من متنها وسحبها للمطبخ وسد الباب شوفي ولچ نوب إذا حچيتي كلمة وحده والله العلي العظيم أگصة للسانچ شذر ماكو منها من ناحية الشرف والأخلاق وأهلها هم مثلها ومو إنتِ خلگ وحدة زعطوطة تجين وتحچين عليهم وتهينيهم ولچ حچايتچ هذي تطير رگاب وتطيح زلم مشوربه وشذر يجوز تكون معنطزة ومتكبرة وشايفة روحها ولسانها طويل بس مو خاينة مو خاينة وخلي هالكلام هذا بدماغچ المصدي