الفارس والوردة

البارت الثالث

الكاتبة : عليا الناصر

الفارس والوردة

البارت : 3

بارق : راكب على حصانة لأن هو يحب الخيل من صغره وأبو ما حب يكسر بخاطرة وأول ما جوي وسكنو بالقرية اشتراله حصان وهداه اله وبعدها سوولهم حضيرة او إسطبل وهو إشترى خيل بعد وكل ما چان يجي للقرية ما ينزل عن ظهر الحصان ويطلع يتجول عليه بالقرية لو بگاعهم وبساتينهم تلاگى هو وساطع اللي چان هم راكب حصان وبعد ما ترجلو إثنينهم والقوا السلام  موعد زواجك بعد إسبوع من أختي حسب ما فهمت من أبوية وراح تروح تگطعون مهر بعد يومين

ساطع : اي بعد إسبوع ومثل ماگلت بعد يومين نگطع مهر إن شاء الله ويصير يوم زواجي الموعود

بارق : حدق بي مبين عليك فرحان حيل ومكيف

ساطع : وليش حتى ما أفرح شنو اللي يمنعني من الفرحة

بارق : صدوگ الحق وياك بس شذر مو سعيدة وحتى هي رافضة هالزواج هذا وما راضية علية ولا راغبة بي وراح  يصير غصباً ما عليها وهي مجبورة ترضخ للموافقة لأن التراجع مستحيل والسبب كلمة أبوية اللي نطاها إلك

ساطع : ومبين عليك إنتَ هم مزعوج من زواجنا أني وإختك وما موافق عليه

بارق : إفهمني شذر أختي الصغيرة وأني أحبها أكثر من روحي وهي حيل عزيزة وغاليه مو بس عليه الا على كل العايله وهي فرحت بيتنا وما أريدها تتأذى خصوصاً وهي ما إلها كل إيد ولا ذنب باللي صار وزواجها بطريقة الفصلية مو راهم ولا مستحب وهو ظلم كبير بحقها لأن ميصير هي اللي تدفع الثمن وإنتَ لو كنت بمكاني وعندك أخت أكيد راح تنزعج أكثر مني وما راح توافق تزوجها  بهالطريقة هذي شوف ساطع إحنه أصدقاء ومعرفة قديمة وإنتَ مشهودلك بالمرجلة والكرم فلا تجور على شذر وتظلمها ودير بالك تضايقها لو تزعجها أو تدوس إلها على طرف لأن ساعتها راح تلگاني بوجهك وما راح أسمحلك بهالشي فخليها بالك اليوم اللي تنزل دمعتها لشذر أبچيك دم وأتمنى تفهم وأرجع وأگولك لا تظلمها و...

ساطع : قاطعة من سمعوا صوت إنفجار وسحبة ودفعة بالجرف وتسطح هو وياه دير بالك ترفع راسك وختلو بالحلفا

بارق : شجاي يصير هاي العبوة وين طگت مبينه قريبة

ساطع : عالطريق المختصر اللي يربط الناحية بالقرية

بارق : طگت على الأمريكان لو على جماعتنا وإنتَ شمدريك وين طگت

ساطع : لوعلى جماعتنا چان ما شفت طياراتهم الهليكوبتر تحومي فوگ المنطقة وأني دريت بالصدفة شفت الجماعة من نصبوها

بارق : يسلم إيد اللي خلاها بس حصاني خايف عليه لا يروح يتصاوب ورفع راسة

ساطع : جره بسرعة نزل راسك تريد تبلينه هسة من يلمحونة يزرفونة تزرف والله الخيول ما عليهن شي هسة راحن شردن لو لبستانة لو لبستانكم