الفارس والوردة

البارت الواحد والأربعون

الكاتبة : عليا الناصر

الفارس والوردة 🥀

البارت : ال 41

سرمد : الصبح فتح الباب ودخل لغرفة شذر على كيفة وهو يمشي على روس إصابيعة ومن شاف ساطع نايم راح على شذر وتقرب عليها وخلى إيده على خدها وباسها من عنده ومن فتحت عيونها وناظرته همسلها صباح الخير ماما حبيبتي

شذر : ردت عليه بنفس الهمس صباح الخير يا عيون ماما إنتَ وباستة من كفوف إيديه إثنينهم بعدين زاحت الغطى وگعدت تعدلت ونزلت من السرير تعال ويايه وگادته من إيده وطلعت هي وياه برى الغرفة

سرمد : بيبي گالت بابا إجى البارحة بالليل متأخر وگالتلي لا تروح عليه هسة وعوفة نايم لا تگعدة بس أني إشتاقيتله هواية زين هو ليش ما إجى علينة قبل وليش عافنا هلگد هنا يم بيت جدو وما إجى ياخذنا وأني مو كومة خابرت عليه وگتله تعال وكل مرة يگولي عندي شغل شوكت يخلص شغلة لو هو زعلان علينة وبعد ما يريدنا ويگولي عندي شغل

شذر : منين جبت هالحچي هذا لا هو ما زعلان شوف ماما حبيبي إنتَ بابا ما كذب عليك وصدوگ عند شغل ومن خلصة إجى وإنتَ البارحة چنت نايم فما حب يگعدك ويزعجها لنومتك وهسة تعال وخلي نتريگ وياهم لجدو وبيبي وخالو عزام

سرمد : وبابا ليش ما نگعد حتى يتريگ ويانا

شذر : لا بابا عوفة هسة نايم لأن خطية تعبان فخليه يرتاح وعود من يگعد يتريگ وأخذته وراحت للمطبخ صباح الخير وگعدوا هي وياه

حجية أمينة : بعد ما ردوا كلهم تحية الصباح لشذر ساطع وينة بس لا راح منا بدون ما يتريگ

شذر : لا ماما ساطع بعد نايم وما رايح لان تعبان والبارحة چان ضغطة صاعد ونطيتة علاج فما گعدته وگلت أحسن شي خلي ينام ويرتاح

حجي عبدالله : اي بنيتي زين سويتي  لنة خطية بس يركض وما گعد أبد والله يساعدة فخلي يرتاح شويه

حجية أمينة : جابت كوب حليب وخلتة گدام سرمد هاك بيبي إشرب وتقربت على شذروهمستلها ها أشوفچ دايرة بالچ على ساطع وتخافين عليه لازم الله هداچ وحنيتي عليه اي كون دايماً يبقى الله هاديچ هيچي وشحلاتچ من ما تيبسينه لراسچ ومن شذر كشرت ما عاجبها الحچي عافتها وراحت گعدت بصف عزام تتريگ أگول حجي بارق ما نزل لهسة وهاي راس الشهر وهم جي

عزام : يابا ترى أمي جاي تسمعك حچي وتگولك يعني وين الوعد مالتك

حجي عبدالله : أدري وتراني ما ناسي والله بس هاي شوفة عينچ يعني بعد اللي صار وياهم لبيت الشيخ صقر ترى موحلوة بحگنة نگلهم نريد نسوي العرس هسة والله أنة أشوفها زحمة وواگفة لن العالم بيا حال نجي إحنة ونزودها عليهم ونخبصهم بعرسنا