الفارس والوردة

البارت التاسع والثلاثون

الكاتبة : عليا الناصر

الفارس والوردة

البارت ال : 39

شيخ صقر : تنحنح وجلى صوته إگعدي بنتي وأشرلها بصفة ومن گعدت شذر وكان مبين عليها ما مرتاحة شوفي أكيد جاي تتسائلين بداخلچ عن السبب اللي خلاني أدز عليچ حتى أحچي وياچ

شذر : عدلت گعدتها الصراحة إي لأن ماكو شي حتى نحچي بي

شيخ صقر : حگچ تگولين هيچ لن المفروض چان من زمان أنة أحچي وياچ بس تأخرت ولني عندي مشاغل هواية وما فضيت بالفترة الأخيرة شوفي بنيتي أنة ظلمتچ هواية وجرت عليچ خاصةً من جبرت ساطع يتزوجچ وياخذچ فصلية حتى ننتقم من أبوچ لنه يحبچ هواية وعند إنتِ عدال روحة ودومة بكل مجلس وبكل مكان يفتخر بيچ فأنة قررت أستغل هالشي ولصالحنا وأدمرة عن طريق الضغط عليچ وإحنة نهينچ ونحرقچ ونقلل من شانچ بس هالشي كله صار هسة من الماضي وأنة ما أريد أزودها وأفتح الدفاتر القديمة لني إكتشفت غلطي وخطاي بحگچ وبحگ أهلچ وأنة على هاي أعتذر منچ وأعاهدچ وأگلچ محد راح يتجرىء عليچ بعد ويمس لو شعراية وحدة منچ وإنتِ گدرچ ومقامچ عندي چبير وأنة ما عندي بنية وإنتِ بنيتي

شذر : بس شيخ اللي سويتو بيه ما ينغفر بمجرد إعتذار لأن إنتو مو بس دمرتوني إنتو حطمتوني بإنتقامكم وبراعة لأن مسحتوا بكرامتي الأرض ومن شيخ صقر حدق بيها كملت بس أني ما حچيت لا لبابا ولا لأي أحد من أهلي على كل اللي سويتو بيه لأن أدري لو حچيت وخبرتهم بابا راح يموت بحسرته عليه وبارق وعزام أكيد ما راح يسكتون وراح يتدخلون وواحد منهم راح يجي ويقتله لساطع ويموتة وبعدين إنتو تروحون وتقتلون واحد منهم هاي إذا ما قتلتوهم إثنينهم والوضع راح يصير كلش سيء وأسوىء من قبل بهواية وأني على هاي ضميت عليهم وعلى هاي بقيت صورته لساطع ملمعة بعيونهم وما نزلت قدره بينهم لو شوية ولطالما إعتبروا الرجال الشهم صاحب الأخلاق والمروة العالية والنفس الكريمة

شيخ صقر : رفع حاجبة مستغرب ليش بنيتي ساطع مو هيچي وهذا هوطبعة

شذر : يجوز بس مو ويايه وأتمنى تتفهم وما تواخذني على اللي گلته

شيخ صقر : تنهد أنة أتفهمچ بس تراه ساطع معذور وچان مسير ومو مخير لنه مجبور ينفذ الوعد واليمين اللي أنة جبرته عليهن ينفذهن بنيتي إنسي الماضي وسامحينا أنة وياه ومن سكتت شذر ها بنيتي لهدرجة صعب عليچ هالشي يعني ما راح تسامحيني وتغفريلي اللي سويته بيچ

شذر : عمو إذا كان الله يسامح ويغفر فأني منو حتى ما أسامحك وأغفرلك خلاص مسامح

شيخ صقر : الحمدلله والله هسة يله إرتاحيت والله ريح گلبچ مثل ما ريحتي گلبي وصدگ إنتِ بنت حمولة وبنت أصل وعلى هاي أنة طمعان بعد وعندي رجاء يمچ