A Moon Shines In The World Over Yonder (Book - 2) (Completed)

Chapter : 21

"🎵🎶I wanna hold your hand.."

စာကြည့်စားပွဲပေါ်တွင် တင်ထားသော ရေဒီယိုဆီမှ ထွက်လာသော The Beatles ​၏ သီချင်းသံက အခန်းတစ်ခုလုံးကို ပကတိမျက်လုံးဖြင့် မမြင်နိုင်သော ခြုံလွှာတစ်ခုပမာ လွှမ်းခြုံထားသည်။

အခန်းတွင်း အပူချိန်ကတော့ သိသိသာသာ လျော့နည်းကာ အေးစက်နေပါသည်။ ပတ်ဝန်းကျင်တစ်ခုလုံး အရောင်က မှိုင်းညို့ညှို့နှင့် တပ်ဆင်ထားသော မီးသီးမှ အလင်းရောင်က ခပ်မှိန်မှိန်။ ကုတင်ခေါင်းရင်းက ပြတင်းပေါက်ကတော့ ပွင့်လျက်ရှိနေပြီး အခန်းထဲသို့ တိုးဝင်လာသော လေအေးတွေက သူတို့ကို ဟန့်တားနေသည့် လိုက်ကာကို အံတုကာ ဟိုဟိုဒီဒီ တိုးဝှေ့ဝင်ရောက်လာကြသည်။

နိုအယ် အခန်းတံခါးဝတွင် ရပ်နေရင်း သူ သက်ပြင်းချမိလိုက်သည်။ ခုနကမှ သူ ခံစားခဲ့ရသော ပျော်ရွှင်မှုတွေသည် တင်းကျပ်ဆို့နင့်သော ခံစားချက်အဖြစ် ရုတ်ချည်း ပြောင်းလဲသွားသည်။ ရုတ်တရက် အိမ်မက်မှ လှုပ်နိုးခံလိုက်ရပြီး မရင်ဆိုင်ချင်သော လက်တွေ့လောကထဲသို့ အတင်းတွန်းပို့လိုက်ခံရသူပမာ သူ့စိတ်ထဲ နှမြောတသဖြစ်နေမိလေသည်။

သူ အခန်းကို ဝေ့ကာ ကြည့်လိုက်သည်။ အဲလက်စ်ကိုတော့ သူမတွေ့ရပါ။

နိုအယ် စာကြည့်စားပွဲမှာ တင်ထားသမျှ ပစ္စည်းတွေကို မွှေနှောက်ကြည့်လိုက်သည်။ စာအုပ်တချို့နှင့် The Beatles ​၏ စီဒီချပ်ပြား တွေကလွှဲပီး ဘာမှမတွေ့ရ။ စင်ပေါ်တင်ထားသမျှတွေထဲမှာလည်း The Beatles ​၏ ဓာတ်ပြားချပ်တွေနှင့် စာအုပ်တွေသာရှိသည်။ ကြည့်ရတာ အဲလက်စ်တစ်ဘဝလုံး စာအုပ်ဖတ်လိုက် သီချင်းနားထောင်လိုက်ဖြင့်သာ ကုန်ဆုံးခဲ့ပုံရသည်။ သို့နှင့် နိုအယ် အိပ်ရာဆီသို့ ဦးတည်လိုက်သည်။

အိပ်ရာဘေးတွင်တော့ ဘာမှ မတွေ့ရပါ။ နိုအယ် ခေါင်းအုံးကို ဖယ်လိုက်တော့ ခေါင်းအုံးအောက်မှာ CD player အဟောင်းတစ်ခုကိုတွေ့ရပါသည်။ အရင်တစ်ခါ အဲလက်စ် ဒီ CD player ကို ခေါင်းအုံးအောက်ထဲ ထည့်လိုက်တာ မြင်ဖူးသည်။ နိုအယ် ထို CD player ကို ကိုင်ကြည့်လိုက်သည်။ ပုံစံကတော့ တော်တော်ဟောင်းနေပုံပေါက်ပေမဲ့ ရိုရိုသေသေ ကိုင်ထားလို့လားတော့မသိ။ ပွန်းရာ ပဲ့ရာ တစ်ခုတစ်လေတောင်မတွေ့ရ။ နိုအယ် ဘေးမှာ ခလုတ်လေးတစ်ခုကို တွေ့သည်နှင့် နှိပ်ကြည့်လိုက်တော့ အဖုံးပွင့်သွားသည်။ အထဲမှာတော့ CD တစ်ချပ်ထည့်ထားသည်ကို တွေ့ရလေသည်။