A Moon Shines In The World Over Yonder (Book - 2) (Completed)

Chapter : 34

ဓူဝံ မမြင်ရသော အားတစ်ခု​၏ တွန်းကန်မှုကို ခံလိုက်ရပြီးနောက် အလင်းရောင် စိုးစဉ်မျှ မရှိသည့် ဟင်းလင်းပြင်ကြီးတစ်ခုထဲ မျောလွှင့်သွားလေသည်။ ထို ဟင်းလင်းပြင်ကြီး၌ သူ ဘာဆိုဘာကိုမှ မခံစားရ။ ဘာကိုမှ အမြင်ရ။ ဘာကိုမှ မကြားရ။ ဘာအနံ့မှ မရပဲ အချိန်အတန်ကြာ မျောလွင့်နေခဲ့သည်။

ထိုစဉ် ပြင်းထန်သော ဆွဲအားတစ်ခုက လေထဲ မျောလွင့်နေသော သူ့အား ရုတ်တရက် အောက်သို့ စုပ်ယူချလိုက်လေတော့သည်။ မာကျောသော အရာတစ်ခုနှင့် သူ့နောက်ကျောတို့ ရိုက်ခတ်ပြီးနောက် သူ မှိတ်ထားသာ မျက်လုံးကို ဖွင့်ကြည့်လိုက်သည်။

အချိန်အတန်ကြာ အမှောင်ထဲတွင် နေခဲ့ရကား သူ့မျက်လုံးက အလင်း​၏ ဒဏ်ကို မခံနိုင်၊ စူးခနဲ သူ့မျက်ကြည်လွှာ နာသွားရသဖြင့် သူ မျက်လုံးကို ပြန်မှိတ်လိုက်ပါသည်။ ထိုစဉ် "ရှူး" ဆိုသည့် စူးစူးဝါးဝါး အော်သံကို ကြားလိုက်ရလေသည်။

ဓူဝံ ဒီတစ်ခေါက်တော့ အားတင်းကာ မျက်လုံးကို ကြိုးစားဖွင့်လိုက်ပြီး သူရောက်နေသော အရပ်ကို ဝေ့ကာ ကြည့်လိုက်သည်။ သူ ခပ်မှောင်မှောင် အခန်းတစ်ခုထဲ ရောက်နေသည်။ ကြည့်ရတာ ထမင်းစားခန်းဖြစ်မည်ထင်ပါသည်။ အခန်းအလယ်၌ ထမင်းစား စားပွဲတစ်ခုရှိပြီး ထိုစားပွဲခုံပေါ်တွင်မူ နှင်းဆီပန်းပုံရိုက်ထားသော ပလတ်စတစ် စားပွဲခင်းတစ်ခုအား အတိုင်းသာ ခင်းထားသည်ကို တွေ့ရလေသည်။ ထို စားပွဲပေါ်၌ အပြာရောင် အုပ်ဆောင်းတစ်ခုရှိပြီး ထိုအုပ်ဆောင်းအောက်တွင်တော့ ပန်းကန်လုံးတစ်လုံးသာ ရှိနေသည်ကို သူ အတိုင်းသား မြင်နေရသည်။ အခန်းသည် ရှုပ်ပွ၍မနေသော်လည်း သန့်ရှင်းသပ်ရပ်၍လည်းမနေ။ အခန်း​ဝင်ပေါက်​၏ ဆန့်ကျင်ဘက် နံရံတွင်တွင်တော့ စားပွဲခုံပုတစ်လုံးကို ချထားကာ ထိုအပေါ်၌ရွှံ့မီးဖိုတစ်ဖိုတင်ထားသည်ကို တွေ့ရသည်။ ရွှံမီးဖိုသည် အက်ကွဲရာတချို့ပင် ထင်နေပြီး အရောင်မှာ ရွှံ့ရောင်ပင်မထွက်တော့ပဲ မည်းညစ်ညစ်ဖြစ်နေသည်။ ထို မီးဖိုပေါ်၌မူ ရေနွေးအိုးတစ်လုံးကို တည်ထားကာ ထိုရေနွေးအိုး​၏ နှုတ်ခမ်းက ရေနွေးငွေ့တွေ တစီစီထွက်နေပြီး အိုးထဲရှိ ပြင်းထန်သောလေဖိအားကြောင့်ထွက်ပေါ်လာသော "ရှူး" ဆိုသည့် နာကလောဖွယ် အသံက မီးဖိုချောင်တစ်ခုလုံးတွင် ပဲ့တင်ထပ်နေသည်။