A Moon Shines In The World Over Yonder (Book - 2) (Completed)

Chapter : 33

အဲလက်စ် ဤနေရာကို ရင်းရင်းနှီးနှီး သိနေပါသည်​။ လေးဖက်လေးတန် ကွန်ကရစ်ထူကြီးများဖြင့် ကာရံထားကာ ပြတင်းပေါက်မရှိ၊ အလုံပိတ်လျက် အပူချိန်မှာ သာမန် အခန်းအပူချိန်ထက် အများကြီး ယုတ်လျော့နေပြီး အလင်းအမှောင်မှာမူ အခန်းအလယ်၌ ခပ်မှိန်မှိန်သာ ထွန်းလင်းနေသည့် မီးသီးတစ်လုံးသာရှိသည်။ ဤနေရာသည် သူ့အမေ​၏ အလောင်းကို နောက်ဆုံးအကြိမ်အဖြစ် သူတွေ့ခဲ့ရသည့် နေရာပင်ဖြစ်လေသည်။

အဲလက်စ် ဘာကြောင့်ဤနေရာသို့ ရောက်နေသည်လဲတော့မသိ။ သူ အခန်းမှ ထွက်ရန်ကြိုးစားလိုက်ပေမဲ့ သူ့ခန္ဓာကိုယ်က ထိုအခန်းအလယ်၌ ရပ်မြဲ ရပ်နေသည်။ တစ်ခဏကြာတော့မှ အဲလက်စ်​၏ခန္ဓာကိုယ်သည် သူ့အလိုအလျောက် ရွေ့လျားသွားကာ အခန်းပြင်သို့ တရွေ့ရွေ့ ထွက်ခွာသွားလေတော့သည်။

အဲလက်စ် သူ့ပါးပြင်ပေါ်မှ နွေးထွေးသော စိုစွတ်မှုတချို့ကို ခံစားလိုက်ရသည်မို့ သူ့လက်ဖဝါးနှင့် ပါးပြင်ကို သုတ်လိုက်မိပါသည်။ ထိုအခါ မိုးရေကဲ့သို့သော အရည်ကြည်တချို့က သူ့လက်ဖဝါး၌ ကပ်ကာ ပါလာသည်။

သူငိုနေတာလား။

အဲလက်စ် နားမလည်နိုင်စွာဖြင့် လက်ဖဝါး၌ ကပ်ကျန်နေခဲ့သော မျက်ရည်များကို ကြည့်ရင်းတွေးလိုက်သည်။ သူရပ်မနေတော့ပဲ ကော်ရစ်ဒါ​၏ ဘယ်ဘက်ကို ချိုးကာ ထွက်လာခဲ့မိသည်။ ထိုအခိုက် သူ့ခြေထောက်မှ ပြင်းထန်သော ဝေဒနာတချို့ကို ခံစားလိုက်ရလေသည်။ ခြေဖဝါးတစ်ခုလုံးက ထုထောင်းဒဏ်ရာ ရထားသလို နာကျင်နေပြီး ခြေသလုံးတွေက တောင့်တင်းကာ နာကျင်နေသည်။ ခြေထောက်အစုံမှာ နာရီပေါင်းများစွာ မာရသွန်ပြေးထားသည့် အပြေးသမား​၏ ခြေထောက်တစ်စုံကဲ့သို့ ညောင်းညာကိုက်ခဲနေသည်​။

အဲလက်စ် ထို နာကျင်နေသော ခြေထောက်ကို အားအကုန်သုံး၍ တရွတ်တိုက်ဆွဲကာ ဆေးရုံဒုတိယထပ်မှ မြေညီထပ်သို့ ဆင်းလာခဲ့သည်။ ဆေးရုံအောက်သို့ ရောက်သောအခါ ကောင်တာမှ သူနာပြုမလေးက သူ့ကို ထူးဆန်းသော မျက်လုံးဖြင့် စိုက်ကြည့်လေသည်။ အဲလက်စ် ထိုသူနာပြုမလေးကို ဂရုမစိုက်ပဲ ဆေးရုံတံခါးဝသို့သာ ဦးတည်လိုက်ပါသည်။