I Found My Prince Charming (Season-3) [Completed]

Part-5

Unicode Version

သူ၏ဖွင့်ဟဝန်ခံချက်ကို မယုံသင်္ကာအကြည့်တစ်ချက်နှင့်သာ တုံ့ပြန်ပြီး ကျောခိုင်းကာထွက်သွားသူကို စိတ်မဆိုးသည့်အပြင် လင်းရိပ်မာန်မှာ ထိုသူ၏ကျောပြင်ကို နင့်နင့်နဲနဲငေးကြည့်နေမိသည်။ ကျယ်ပြန့်သည့်ပခုံးပြင်၊ ကျစ်လျစ်သောခါး၊ ရှည်လျားသောခြေတံလက်တံများနှင့် ထုဆစ်ထားသော ထိုလူ၏နောက်ကျောပုံစံကပင် သူ့ကိုအရူးအမူးစွဲလမ်းစေသည်အထိ ဆွဲဆောင်နိုင်သည်။

ထိုလူကို မြင်မြင်ချင်းစွဲလမ်းမိခဲ့ရသည်မှာ မည်မျှအထိပြင်းထန်လေသလဲဆိုသည်ကို သူသာလျှင်သိသည်။ လင်းရိပ်မာန်အနေနှင့် ယောကျ်ားတစ်ယောက်ကို ဤမျှအထိစွဲစွဲလမ်းလမ်းမဖြစ်ဖူးခဲ့ချေ။ သူသည် မိန်းမများနှင့်ရော ယောကျ်ားများနှင့်ပါ ပတ်သက်ဆက်ဆံဖူးပြီး မိန်းမများနှင့်ဆိုလျှင် အိပ်ရာပေါ်ကကိစ္စများပါ အတွေ့အကြုံရှိထားသူဖြစ်သည်။ သို့သော် ယောကျ်ားတစ်ယောက်က သူ့အား လိင်စိတ်တက်ကြွအောင် တစ်ခါမျှပင် မစွမ်းဆောင်နိုင်ဖူးပေ။

အထူးသဖြင့် မျက်နှာပင်သေချာမမြင်ဖူးခဲ့ဘဲ ခန္ဓာကိုယ်ကောက်ကြောင်းမျှသာ မြင်ဖူးထားသူတစ်ယောက်က သူ၏လိုချင်တပ်မက်မှုအဟုန်ကို ထိုးဆွနိုင်သည်မှာ ရှားပါးလှသည်။ မိန်းမများပင် သူ့ကို ယခုလိုဖြစ်အောင် လွယ်လင့်တကူမလုပ်ဆောင်နိုင်ကြပေ။

"ခင်ဗျားက ထူးခြားပုံရတယ်"

လင်းရိပ်မာန်သည် သူ၏ဖုန်းကိုထုတ်ယူလိုက်ပြီး ကားနားကိုသွားနေသောရဲရင့်၏ နောက်ကျောပုံလေးများကို ရသလောက်ရိုက်ယူထားလိုက်သည်။ ဓာတ်ပုံထဲတွင် ည၏မှောင်မိုက်မှုနှင့် လမ်းမီးရောင်တို့၏ တောက်ပမှုတို့က ရောယှက်နေရာယူထားပြီး ထိုသူ၏အသွင်အပြင်ကို ပိုကြည့်ကောင်းအောင် အထောက်အပံ့ပေးထားသည်။

လင်းရိပ်မာန်သည် သူပြောချင်ရာပြောခွင့်ရခဲ့ပြီး လုပ်ချင်ရာလည်း လုပ်ခဲ့ပြီးပြီမို့ ယနေ့အတွက် ရဲရင့်ကိုမနှောင့်ယှက်တော့ဘဲ လမ်းပိတ်ကာရပ်ထားသည့် သူ့ကားကို နေရာရွှေ့ကာ တစ်ဖက်လူအတွက် လမ်းဖယ်ပေးလိုက်လေရာ ရဲရင့်ကလည်း ဤနေရာတွင် တစ်ခဏလေးမှရှိမနေချင်တော့ပုံနှင့် တဟုန်ထိုးမောင်းထွက်သွားလေရာ သူလည်း ခပ်သော့သော့ရယ်မောလိုက်မိသည်။