I Found My Prince Charming (Season-3) [Completed]

Part-26

ဘားထဲကိုခြေချလိုက်သည်နှင့် သူ့ကို စိတ်မကြည်လင်စေသောမြင်ကွင်းမျိုးကို မြင်ရလေသည်။ မျက်လုံးကိုမှေးကျဥ်းထားရင်းမှ ရေခဲထုပမာ အေးစက်တောင့်တင်းသောအကြည့်တစ်ချက်သည် လင်းရိပ်မာန်၏မျက်ဝန်းများထဲ ပြိုးပြိုးပြက်ပြက်လင်းလက်၏။ အမူအရာအရရော အကြည့်တစ်ချက်အရပါ သူ၏စိတ်အခြေအနေသည် ဆိုးဝါးနေကြောင်း လူတိုင်းသတိပြုမိနိုင်သည်။

သူ၏ဒေါသတို့အရင်းတည်ရာနေရာရှိ လူနှစ်ယောက်ကတော့ ခရမ်းလွန်ရောင်ခြည်ထက် ပိုပြင်းထန်သောထိုအကြည့်ကို နည်းနည်းမျှပင် သတိမမူမိကြချေ။

ကောင်တာတွင် မျက်နှာသေနှင့်မတ်တပ်ရပ်နေသောရဲရင့်သည် မျက်နှာချင်းဆိုင်ရှိလူငယ်လေး၏ ကလူ၏သို့မြှူ၏သို့အပြုအမူများကို စိတ်ဝင်စားမှုမရှိသောအမူအရာနှင့် ရင်ဆိုင်နေသည်။ သို့သော် တစ်ဖက်ကောင်လေးက မျက်နှာပျက်ရသည်ကိုဂရုမထားဘဲ ရဲရင့်ကိုကြည့်ကာ ခပ်ညုညုဟန်ပန်များဖြင့် ဆက်လက်သွေးဆောင်​နေသေးသည်။

ရဲရင့်က ထူးမခြားနားသောအမူအရာကိုသာ ချိတ်ဆွဲထားသော်လည်း လင်းရိပ်မာန်ကတော့ဖြင့် ပြဿနာအကြီးကြီးရှာချင်စိတ်ပေါက်လာလေပြီ။ သို့သော် ရဲရင့်၏ပိုင်နက်တွင် ရဲရင့်ကိုမျက်နှာပျက်အောင်မလုပ်သင့်ကြောင်းလည်း ဆင်ခြင်မိသည်။

"တကယ်တော့ ကျွန်တော်က ဒီလိုဘားမျိုးကိုလာရတာမကြိုက်ဘူး။ သူငယ်ချင်းတစ်ယောက်က ခင်ဗျားအကြောင်းကို အရမ်းညွှန်းနေလို့ သိချင်တာနဲ့ လာခဲ့လိုက်တာ"

သူတို့ရှိရာကို တိုးကပ်သွားလေ လင်းရိပ်မာန်ကို ဒေါသမွှန်စေသောစကားများကို ပိုပီသစွာကြားရလေပင်။ အလုပ်တစ်ဖက်နှင့်အာရုံများနေခဲ့သော ရဲရင့်ကလည်း အနားကိုရောက်လာသောသူ့ကို မြင်သွားလေပြီ။

သားရဲကောင်လို စူးရဲသောအကြည့်တစ်စုံနှင့် အသရေတင့်တယ်မှုများစွာဖြင့် တောက်ပသောခရစ်စတယ်လို ကြည်လင်နေသောမျက်ဝန်းတစ်စုံတို့ အကြည့်ချင်းတွယ်ညှိသွားချိန်မှာ လင်းရိပ်မာန်တစ်ယောက် ဒေါသထွက်နေသည့်ကြားက မျက်လုံးတစ်ဖက် မှိတ်ပြဖြစ်အောင် မှိတ်ပြလိုက်သေးသည်။