I Found My Prince Charming (Season-3) [Completed]

Extra-1

Unicode Version

နှစ်ဦးသား၏ဆန္ဒတစ်ခုဖြစ်ပါသော "ဘဝနှစ်ခုတစ်သားတည်း"ဖြစ်သွားပြီးနောက် ထပ်တူကျစွာလည်ပတ်လေသောနေ့ရက်တို့ဟာ နှစ်ဦးသားအဖို့ ဖြတ်သန်းခဲ့သမျှနေ့ရက်တိုင်းထက် အဆပေါင်းများစွာသာလွန်သော ချိုမြိန်ဖွယ်နေ့ရက်များဖြစ်လာသည်။

တစ်ဦး၏ပျော်ရွှင်မှုဟာ ကျန်တစ်ဦးအတွက်ပျော်မွေ့ရာဖြစ်လာခဲ့ပြီး တစ်ဦး၏ဆန္ဒတို့သည်လည်း ကျန်တစ်ဦးအတွက် လိုအင်များဖြစ်လာသည်အထိ နီးစပ်ခဲ့ချေပြီ။

ထိုကဲ့သို့ပြောင်းလဲလာသောနေ့ရက်တို့မှာ လင်းရိပ်မာန်အတွက် ပို၍အပြောင်းအလဲကြီးမားသည်သာ။

ယခင်က အပေါင်းအသင်းဟူ၍ လက်ညှိုးထိုးပြစရာပင်မရှိခဲ့သော သူဟာ ယခုတော့ဖြင့် လက်ချိုးရေတွက်ဖို့ပင်မလောက်ငှလောက်အောင် အုပ်စုတောင့်သောမိသားစုကြီး၏ တစ်စိတ်တစ်ပိုင်းဖြစ်လာခဲ့သည်။ ချစ်ရသူကလည်း သူ့အား သူမတူအောင်ချစ်မြတ်နိုးပေးသလို ထိုမိသားစုဝင်များကလည်း တစ်​နေ့တစ်မျိုးမရိုးရအောင် ပျော်ရွှင်မှုပေးလေသည်မှာ မေတ္တာငတ်ခဲ့လေသောသူ့အဖို့ အိပ်မက်တမျှပင်။

"အရိပ် ဘာလုပ်နေတာလဲ"

ဖုန်းကိုတွေတွေကြီးငေးကြည့်ကာ သတိလက်လွတ်ဖြစ်နေသော လင်းရိပ်မာန်ကို ရဲရင့်၏အသံက လှုပ်နိုးလိုက်နိုင်သည်။

လင်းရိပ်မာန်လည်း အသံကြောင့်သတိပြန်ဝင်လာပြီးနောက် ဖုန်းကိုဘေးချကာ ရေချိုးခန်းတံခါးရှေ့မှာရပ်နေသောရဲရင့်ကို လှမ်းကြည့်မိသည်။ ရေချိုးပြီးခါစမို့ ဆံပင်ရေစက်လက်ဖြစ်နေသောရဲရင့်ဟာ ခန္ဓာကိုယ်အပေါ်ပိုင်းလည်း ဗလာကျင်းနေပြန်ရဲ့။

ရေမခြောက်သေးသောဆံဖျားဆီမှ ရေစက်တို့ဟာ နာခံမှုကင်းမဲ့စွာဖြင့် ချောမွတ်သောပခုံးသားထက် ခုန်ဆင်း၍ ခန္ဓာကိုယ်ကို ပွတ်သီးပွတ်သပ်ပြုနေလေသည်။ ထိုမှတစ်ဆင့် တောင့်တင်းသောရင်အုပ်တို့ဆီကိုခြေဆန့်ကာ ယစ်မူးတိမ်းညွတ်ရပါသော ဝမ်းဗိုက်ကြွက်သားတို့အကြားခိုအောင်းပြန်သည်။

မဆုတ်မနစ်သောဇွဲဖြင့် အောက်ခြေအထိစီးဆင်းဦးမည့် ရေစက်ရေပေါက်တို့ဟာ မမြင်ကွယ်ရာဆီကိုတိုးဝင်ဖို့ Mermaid Lineကိုဖြတ်သန်းသွားချိန်မှာ လင်းရိပ်မာန်၏လည်ချောင်းသည်လည်း ရုတ်ချည်းဆိုသလို ခြောက်သွေ့ပူလောင်လာရပြီးနောက် ထိုအပူဟာ တစ်ကိုယ်လုံးကို ကူးစက်သွားတော့သည်။