I Found My Prince Charming (Season-3) [Completed]

Part-6

Unicode Version

ဘားကောင်တာတွင် ထိုင်နေပြီး သူ့ကိုမမှိတ်မသုန်စိုက်ကြည့်ကာ အသိစိတ်လွတ်နေသလိုဖြစ်နေသည့် လင်းရိပ်မာန်ကို ရဲရင့်မသိချင်ယောင်ဆောင်နေသော်လည်း ဘေးလူများကတော့ဖြင့် မသိချင်မှအဆုံး ရှင်းရှင်းလင်းလင်းမြင်နေရသဖြင့် သတိထားမိနေသည်မှာ အတော်ကြာလေပြီ။

ရဲရင့်ကိုကူနေသော Bartenderလေးသည် မင်သေသေနှင့် ဘာကိုမှသတိမထားမိသည့်အလား ကိုယ့်အလုပ်ကိုလုပ်နေသော ရဲရင့်ကိုတစ်လှည့်၊ သူယောင်မယ်၏ညှို့ယူဖမ်းစားခြင်းကိုခံထားရသည့်နှယ် ခပ်ဖျော့ဖျော့အပြုံးတစ်ပွင့်နှင့်အတူ မျက်တောင်မခတ်တမ်းငေးကြည့်နေသော လင်းရိပ်မာန်ကိုတစ်လှည့်ကြည့်ကာ ကြားထဲက အနေရခက်နေလေ၏။

"ကောင်တာကို မင်းတစ်ယောက်တည်း ခဏတာဝန်ယူထားလိုက်ဦး။ ငါဖုန်းပြောစရာရှိလို့"

Bartenderလေးကို ကောင်တာမှာ တစ်ယောက်တည်းထားရစ်ခဲ့ပြီး ရဲရင့်လည်း ဖုန်းပြောရန် ဘားအပြင်ဘက်သို့ ထွက်လာခဲ့လိုက်သည်။ သူ့အနေနှင့် ယ​နေ့အဖို့ လင်းရိပ်မာန်ကိုအာရုံမစိုက်အားပေ။ အကြောင်းမှာ ယနေ့တစ်နေ့လုံး သူ့အနောက်ကို တကောက်ကောက်လိုက်နေသည်မှာ လင်းရိပ်မာန်တစ်ယောက်တည်းမဟုတ်ပေ။

ကင်မရာတစ်လုံးနှင့် သူ၏လှုပ်ရှားမှုများကို မှတ်တမ်းတင်ရန် ကြိုးစားနေသည့်လူတစ်ယောက်လည်း ရှိနေသည်။ ရဲရင့်၏ခန့်မှန်းချက်သာ မှန်မည်ဆိုပါက ထိုလူသည် ယိမ်းလက်ယာလွှတ်လိုက်သည့်လူသာ ဖြစ်ရမည်။ ယိမ်းလက်ယာ၏လုပ်ရပ်များသည် သူမနှစ်မြို့သည့်အနေအထားအထိ ရောက်လာပြီဖြစ်ရာ ထပ်ပြီးလျစ်လျူရှုမနေနိုင်တော့ချေ။

ဘားအပြင်ဘက်ရှိ မှောင်ရိပ်ကျသောနေရာအထိ လျှောက်သွားကာ blockထားသောဖုန်းနံပါတ်တစ်ခုကို ပြန်ရှာပြီး black listထဲမှထုတ်လိုက်သည်။

ဤနေရာသည် လေတိုးသံမှလွဲ၍ အသံများလုံးဝတိတ်ဆိတ်နေသဖြင့် ဖုန်းဝင်သွားသည့်တတူတူမြည်သံသည် အလွန်ကျယ်လောင်နေသယောင် ခံစားရသည်။ တစ်ဖက်ကိုဖုန်းဝင်သွားသည်နှင့်တစ်ပြိုင်နက် ရဲရင့် ခပ်ကြာကြာမစောင့်လိုက်ရချေ။