I Found My Prince Charming (Season-3) [Completed]

Part-29

Unicode Version

သူ့အတွက် ဟင်းချက်ကျွေးရန် ကြိုးစားမည်ဟုဆိုခဲ့သောစကားအတိုင်း လင်းရိပ်မာန်သည် ဤရက်ပိုင်းတွေအတွင်းမှာ အမှန်တကယ်ကြိုးစားနေလေသည်။ ယခင်ကဆိုလျှင် သူသည် ရဲရင့်၏အားလပ်ချိန်တိုင်းမှာ ရဲရင့်အနားမှာသာကပ်နေ၍ အမြဲလိုလိုစနောက်ကာအချိန်ဖြုန်းတတ်ပြီး ရဲရင့်မအားသည့်အချိန်မျိုးမှာပင် အနားမှာမသိမသာနှောင့်ယှက်တတ်သည်။

သို့သော် ယခုနောက်ပိုင်းမှာ သူ၏ဟင်းချက်စွမ်းရည်ကိုမြှင့်တင်ရန်အတွက်နှင့် ​ယခင်ကလိုပြောင်ချော်ချော်မလုပ်တော့ဘဲ တည်ကြည်စွာကြိုးစားနေလေရာ ရဲရင့်မှာ ထိုအဖြစ်ကြောင့် မျက်ခုံးမပင့်မိဘဲမနေနိုင်တော့ချေ။

ရဲရင့်ဟာ ဧည့်ခန်းထဲရှိထိုင်ခုံမှာ ကျောမှီကာထိုင်နေပြီး မီးဖိုချောင်ထဲတွင် အလုပ်များနေလေသောလင်းရိပ်မာန်ကို ငေးကြည့်ရင်းအတွေးများနေသည်။ သူထိုင်နေသောနေရာကကြည့်လျှင် သူ့ကိုကျောပေးကာ တကုပ်ကုပ်အလုပ်ရှုပ်နေသော လင်းရိပ်မာန်၏နောက်ကျောကို တစ်ဝက်မျှသာမြင်ရသည်။

မြင်နေရသောပခုံးလေးတစ်ဖက်သည် လှုပ်လီလှုပ်လဲ့..။ ဘယ်ညာလှုပ်ရှားသွားလာနေသော ခရစ်စတယ်တို့၏တောက်ပခြင်းကို ယှဥ်ဝံ့သည့် အသားအရည်၏ကောင်းခြင်းနှင့်ပြည့်စုံပါသောလက်မောင်းတစ်သွယ်ကလည်း ဆန့်ချည်ကွေးချည်...။ ခေါင်းကိုငုံ့လိုက်ချိန်တိုင်း ထင်းခနဲထွက်ပြူလာသောဂုတ်ပိုးဖြူဖြူလေးသည်လည်း မက်မောတပ်မက်ချင်စဖွယ်အတိ..။

ရဲရင့် ယခုမြင်နေရသည့်လင်းရိပ်မာန်၏ပုံစံမှာ အမှန်တကယ်ဆန်းသစ်နေသည်။ သင်ယူလေ့လာနေသည့်အရာအပေါ် အပြင်းအထန်အာရုံစူးစိုက်ထားသဖြင့် တည်ကြည်ပြတ်သားနေသောလင်းရိပ်မာန်၏အသွင်အပြင်မှာ ပုံမှန်အချိန်ထက် ပို၍ကြည့်ကောင်းနေသည်ကိုတော့ ငြင်းမရချေ။

ယောကျ်ားတစ်ယောက်ဟာ အလုပ်အပေါ် အာရုံစိုက်ထားချိန်တွင် ဆွဲဆောင်မှုရှိသည် ဟူသောစကားသည် တကယ်မှန်လွန်းသည်ဟုသာ ရဲရင့်တွေးမိတော့သည်။

ဤသည်မှာ သူမမြင်ဖူးခဲ့သည့် လင်းရိပ်မာန်၏တစ်ဖက်ခြမ်းဖြစ်ရမည်။