I Found My Prince Charming (Season-3) [Completed]

Part-19

Unicode Version

ပါတီပွဲထဲမှာမို့ ရုပ်ပျက်ဆင်းပျက်မဖြစ်လိုသောရဲရင့်ကပင် အိန္ဒြေဆည်ကာ မသိကျိုးကျွံပြုလိုက်ရသည်။ သို့သော် သူ၏အကြည့်ကတော့ လင်းရိပ်မာန်နှင့် သံစဥ်လှိုင်းတို့ထံမှာသာ ခေါက်တုံ့ခေါက်ပြန်ရစ်ဝဲနေလေသည်။

သူ့အဖေကလည်း သူ့ကို အခြားသောလုပ်ငန်းရှင်များနှင့် အဆက်မပြတ်မိတ်ဆက်ပေးနေ၍ ဤနေရာမှထွက်ရန် နည်းလမ်းမရှိချေ။ စိတ်ရှုပ်စရာကောင်းသောမိတ်ဆက်ခြင်းများ မြန်မြန်ပြီးဆုံးရန်သာမျှော်လင့်ပြီး ဝတ်ကျေတန်းကျေမျှသာ ပြောဆိုဆက်ဆံနေသဖြင့် သူ့အဖေမှာ မျက်စိပျက်မျက်နှာပျက်ဖြစ်ရလေပြီ။ အဆုံးမှာတော့ စိတ်မပါလက်မပါဖြစ်နေသောရဲရင့်ကို လွှတ်ပေးလိုက်ရန်ဆုံးဖြတ်ရတော့သည်။

ရဲရင့်လည်း လွတ်လပ်ရေးရသွားသူတစ်ယောက်နှယ် ထိုလူအုပ်ကြီးထဲမှ အမြန်ထွက်ပြီး လင်းရိပ်မာန်နှင့်သံစဥ်လှိုင်းတို့ကိုရှာဖွေရန် သိမ်းငှက်တစ်ကောင်လိုစူးရဲသော သူ၏အကြည့်တို့ကို ခန်းမတစ်လျှောက်ဖြန့်ကျက်ရတော့သည်။

သိပ်မကြာလိုက်သောအချိန်အတွင်းမှာပင် သူနှင့်အတော်အလှမ်းဝေးသော လူအုပ်ကြီးတစ်စုအကြား ပြုံးပျော်ရွှင်စွာစကားပြောနေကြပါသော ထိုနှစ်ယောက်ကိုမြင်လိုက်လေရာ ထိုနေရာသို့ ချက်ချင်းလှမ်းသွားလိုက်သည်။

သူလျှောက်လာနေသည်ကိုမြင်သည်နှင့် လှောင်ရယ်တတ်သော ထိုကောင်စုတ်လေး၏နှုတ်ခမ်းစွန်းများက သိသာစွာမြင့်တက်သွားသည်ကို ရဲရင့်အတိုင်းသားမြင်နေရသည်။ လှောင်ရိပ်သမ်းသောထိုအပြုံးတို့သည် ရဲရင့်ကို မရိုးမရွဖြစ်စေသည်။

ရဲရင့်မှာ အချိန်ကိုက်ထွက်ပြူလာသော သူ၏ဒေါသအဟုန်ကိုချိုးနှိမ်ကာ လင်းရိပ်မာန်ကို သီးသန့်စကားပြောလိုသောအရိပ်အယောင်ပြလိုက်သည်။ လင်းရိပ်မာန်ကလည်း အထာနပ်ပါသည်။ ချက်ချင်းဆိုသလို သူ၏အနားမှလူများကို ပါးနပ်စွာနှင်ထုတ်လိုက်သည်ကို သူမြင်နေရသည်။

ရဲရင့်လည်း သန့်စင်ခန်းရှိရာဘက်သို့ လျှောက်သွားလိုက်သည်။ ဤနေရာမှာတော့ လင်းရိပ်မာန်နှင့် သူအချင်းမများလိုပေ။