I Found My Prince Charming (Season-3) [Completed]

Part-42

Unicode Version

အတိတ်တွေမှာ တစ်ဖန်ပြန်ပိတ်မိတိုင်း သူဟာ ထိုစဥ်ကခံစားခဲ့ရသည့်မွန်းကြပ်မှုကြီးသည် အရိပ်မည်းကြီးနှယ် သူ့အနောက်ကိုတကောက်ကောက်လိုက်လာနေသည်ဟုပင် ထင်မှတ်မှားမိသည်။

အတိတ်မှာဖြစ်စေ လက်ရှိမှာဖြစ်စေ သူသည် အချိန်ကာလဘယ်လောက်များများကို ကျော်ဖြတ်ခဲ့သည်ဖြစ်စေ ထိုမွန်းကြပ်မှုဒဏ်မှ ရုန်းမထွက်နိုင်သေးပေ။ အတိတ်နှင့်ပစ္စုပ္ပန်သည် နည်းနည်းမျှမကွာခြားလှ။ အနည်းဆုံးတော့ ရဲရင့်နှင့်ပတ်သက်သမျှသည် ယခင်ကအတိုင်းသာ လည်ပတ်နေဆဲပင်။

"အဂ္ဂ ဒီမှာဘာတွေဖြစ်.."

အဆုံးမှာ ကြီးလှစွာသောအရှုပ်အထွေးကြီးကို သတိပြုမိသွားဟန်တူသည့် ရဲရင့်သည် အဂ္ဂနှင့်စိုင်းညီတို့ရပ်နေကြသောနေရာကို ရောက်ချလာပြီး အခြေအနေကိုမေးမြန်းလာချိန်မှာပင် တင်းမာသည့်လေထုအကြားပိတ်မိနေဆဲဖြစ်သော ဟန်မင်းစေရာနှင့်လင်းရိပ်မာန်တို့ကို ရှင်းရှင်းလင်းလင်းမြင်သွားသည်။

သူဟာ လင်းရိပ်မာန်ကိုမြင်သည်နှင့် မယုံကြည်နိုင်ခြင်းတချို့နှင့် တုန်လှုပ်ချောက်ချားမှုတစ်ဖုံပေါင်းစပ်ထားသော အကြည့်တစ်မျိုးဖြင့် တုံ့ပြန်လာလေရာ လင်းရိပ်မာန်မှာ ထိုတဒင်္ဂလေးတွင် ကိုယ့်ကိုယ်ကိုယ်လှောင်ရယ်ဖို့ပင် အင်အားမရှိတော့ချေ။

"ဟန်မင်း ဘယ်လိုဖြစ်ကြတာလဲ"

သူက လင်းရိပ်မာန်ကို ငေးတိ​ငေးကြောင်စိုက်ကြည့်မနေပါဘဲ ဟန်မင်းစေရာကိုသာ တည်ငြိမ်စွာမေးခွန်းထုတ်လိုက်သည်ကိုကြည့်၍ လင်းရိပ်မာန်ခမျာ မျက်လုံးကိုသာစုံမှိတ်လိုက်မိတော့သည်။

ရဲရင့်သည် သူ့အတွက်နှင့် သူ၏သူငယ်ချင်းများကို အတိုက်အခံလုပ်မည့်လူမဟုတ်ပေ။ သေချာလွန်းမကသေချာနေခဲ့သည့် ထိုအကြောင်းအရင်းကြောင့် သူသည် ယနေ့အတွက် မူလရည်ရွယ်ချက်ဖြစ်သော ရဲရင့်နှင့် သူစိမ်းတစ်ယောက်လိုဟန်ဆောင်လိုက်ဖို့သာ တတ်နိုင်ခဲ့သည်။

"ရှိုင်းယံက စတိုးဆိုင်မှာတစ်ခုခုဝယ်ချင်တယ်ဆိုလို့ ကားရပ်ပေးလိုက်တာ။ လမ်းကူးနေတုန်းမှာပဲ ဒီကောင်က ကားကို လူလိုမမောင်းဘဲ ဗရမ်းဗတာမောင်းနေလို့ ရှိုင်းယံကို တိုက်မိတော့မလိုဖြစ်သွားတယ်လေ။ ကံကောင်းတာက သူရှောင်တာမြန်ပေလို့ပေါ့။ မဟုတ်လို့ကတော့..."