I Found My Prince Charming (Season-3) [Completed]

Part-35

Unicode Version

ချစ်ခြင်း၏နောက်ဆက်တွဲလေးများကြောင့် စောစောစီးစီးအိပ်ရေးပျက်ခဲ့ကြသောလူနှစ်ဦးဟာ ဆိုဖာပေါ်မှာ တစ်ယောက်အပေါ် တစ်ယောက်ထပ်လျက်အနေအထားဖြင့် မနက်ဆယ်နာရီအထိ အိပ်မောကျနေခဲ့ကြသည်။

ရဲရင့်က သူ့ရင်ခွင်ထဲမှာ လင်းရိပ်မာန်ကိုပွေ့ထားပြီး လင်းရိပ်မာန်ကလည်း မှောက်လျက်အနေအထားဖြင့် ရဲရင့်၏လည်တိုင်ကြားမှာ မျက်နှာအပ်ကာအိပ်ပျော်နေလေသည်။ ကျဥ်းကြပ်စွာအိပ်နေရသဖြင့် နှစ်ယောက်လုံးဟာ မျက်ခုံးကို အနည်းငယ်မျှတွန့်ချိုးထားမိကြသော်လည်း ဤအနေအထားက သူတို့ကို စိတ်လုံခြုံမှုပေးလေရာ မည်သူကမှ ခွာထုတ်ပစ်ဖို့မကြိုးစားကြချေ။

တိုက်ခန်း၏ပြင်ပရှိလောကတစ်ခွင်ဟာ သက်ဝင်လှုပ်ရှားမှုများနှင့် စည်ကားသိုက်မြိုက်လာသည့်တိုင် တိုက်ခန်းအတွင်းရှိ လူသားနှစ်ယောက်ကတော့ဖြင့် ကမ္ဘာကြီးနှင့်အဆက်အသွယ်ပြတ်နေသည့်အလား ...။

မနက်အစောပိုင်းက ရုန်းကန်လှုပ်ရှားမှုများကြောင့် ဆိုဖာအောက်ကိုပြုတ်ကျခဲ့လေသော ဖုန်းတစ်လုံးဟာ ထိုအချိန်က သူ၏လျစ်လျူရှုခံရမှုများအတွက် လက်စားချေနေသည့်အလား တိတ်ဆိတ်အေးချမ်းနေသော အခန်းငယ်ထဲ၌ ကျယ်လောင်လှစွာသောနှိူးစက်သံဖြင့် ဆန္ဒထုတ်ဖော်လာလေရဲ့။

"ဟင်း…ဘာလဲကွာ"

အိပ်ရာနိုးစခပ်အက်အက်အသံနှင့် ဗလုံးဗထွေးညည်းတွားလေသူကတော့ လင်းရိပ်မာန်ပင်။ ရဲရင့်၏ရင်ခွင်ထဲမှာလူးလွန့်ကာ သူ့ကို အနှောင့်အယှက်ပေးနေသောတရားခံကို အိပ်မှုန်စုန်မွှားဖြင့်လိုက်ရှာသည်။ စားပွဲပေါ်မှာရော ဆိုဖာတစ်ဝိုက်မှာပါ ရှာမတွေ့ချိန်တွင် ဒေါသတကြီးရေရွတ်ရင်း လဲလျောင်းနေရာမှထလိုက်တော့သည်။

ထိုအခါမှသာ သူသည် ရဲရင့်၏ခါးပေါ်တွင် တက်ထိုင်မိလျက်သားဖြစ်နေသည်ကို သတိထားမိလိုက်တော့သည်။

သာယာနေသော သူ့အိပ်မက်လေးကို နှောင့်ယှက်နေသည့်လက်သည်တရားခံကို ဆိုဖာအောက်မှာတွေ့လိုက်ရသဖြင့် ကုန်းကုန်းကွကွနှင့်လှမ်းယူပြီး နှိုးစက်ကိုပိတ်လိုက်သည်။ ဖုန်းကိုလည်း စားပွဲပေါ်ကို လှမ်းတင်လိုက်ပြီးနောက် အိပ်ချင်စိတ်လည်းမရှိတော့ပြီဖြစ်ရာ မျက်စိရှေ့မှာမြင်နေရသောရဲရင့်ကိုသာ သတိလက်လွတ်ငေးမောနေမိသည်။