تراتيل السقوط

الترتيلة الاولى

#تراتيل_السقوط
#الترتيله_الاولى
#روز_الفياض

🌷
🌷

المقدمة :

انا اكيدة انكم الان تتسائلون عن معنى ( تراتيل ) وماهو ذلك السقوط الذي يتبعها .
التراتيل :
هي الترنيمات او التنسيقات والترتيبات والتنظيمات التي تسبق فعلاً ما يحتاج الى تنظيم وترتيب .
او
هي مراحل وخطوات للوصول الى شيء ما او فعلٍ ما او حدثٍ ما .

ولها العديد من المعاني الاخرى والتي لاتعنينا ولادخل لها في سياق قصتنا .
اما السقوط فهو نوعان الاول مادي والاخر معنوي وهذا ماعليكم اكتشافه بين طيات هذه الرواية .
اتمنى لكم قراءة ممتعة لترتيلتي الاولى ❤️.
.
.
.
🌹🌹🌹🌹
.
.
.
‏"لا أعرف
إن كانت طريقة تفكيري صائبة
لكنّي أخشى
أن أكون كثيرة على أحدهم،
أخشى أن تكون وجهتي خاطئة،
أن أندفع بشكل كبير لِمن لا يود مجيئي،
أن أحبّه وهو لا يفعل 🖤".
.
.
.

رجعنه للعراق من بعد عشر سنوات عشناها بامريكا بعيدين مرتاحين من الناس ومراقبة الناس واذيه الناس وسموم الناس وحسدهم ونفاقهم ..
والمشكلة انه هاي الناس مو غريبة ، ذوله المفروض اهلي وناسي ، اقاربي ..
جانت بيبي دوم تعيد هالكلام كدامي من بعد الحادث :
راح نرجع للمغثة والهموم والنفاق ..
نرجع للحسد والغيبة والقهر ..

كلما اشوف دموعها اسأل نفسي :
ياترى بداخلها تلومني ؟
تلومني على وفاة جدو ؟؟
اني اتذكر اللي صار كلش زين ..
اتذكر جنت ضايجة وردت اطلع بس جدو مقبل اطلع وحدي وقرر نطلع سوه ..
ماادري منين طلعت السيارة كبالنه ودخلت سيارتنه بيها ..
شلون صار هيجي ؟
ليش جدو جان يسوق سريع وعصبي ماله خلك ؟
جان اكو شي مضوجه ، معقولة اني جنت مضوجته ؟؟
لو بس اتذكر كل شي ارتاح ..

حطت بينه الطيارة بمطار النجف ونزلنه ونزلوا جثمان جدو الله يرحمه مااتذكره قبل هالحادث .
للاسف ماعندي ذكريات عنه حتى ابجي عليه ..
احس بالضياع ..
اني وين ؟
اهلي وين ؟
منو ابوي ؟
منو امي ؟
منو اخواني ؟
ليش مااكدر اتذكرهم ؟
ليش اتذكر مرات بيبي واتذكر سهام صديقتي واتذكر كم شخص من ايام الكلية واتذكر سيارتي قبل ..
جنت بالكلية اتذكر جان عندي سيارة..
اتذكر جنت اشتغل قبل منطلع من العراق بس شوكت طلعنه ؟؟
وليش طلعنه ؟؟
لكينه ناس بالمطار تستقبلنه ناس مااعرفهم ناس بس شافونه ظلوا يبجون وبيبي تبجي وياهم التموا على بيبي واني واكفة اباوع عليهم محد بحالي ..
حسيت واحد واكف على جهه وراي تقريباً بمسافة ويبجي حيل ..
التفتت باوعتله شفت شاب تقريباً بالتلاثينات ..
شوية عنده شيب على الجهتين من الصدغ ..
انتبهلي مسح دموعه كلي بشبه ابتسامه :
الحمدلله عالسلامة
والبقية بحياتج .

مااتذكره منو بس احس شكله مألوف كتله :
البقاء لله .
الله يسلمك .

كلي :
تعبانه ؟ تردين تكعدين ؟