تراتيل السقوط

الترتيلة الثالثة والعشرون

#تراتيل_السقوط
#الرتيلة_٢٣
#روز_الفياض
.
.
.
انا من الطراز الشديد البراءة والجرأة معاً ... ♥️
.
.
.
رحنه الصبح اشترينه حلقات اني وشهاب وغدير ..
رجعنه لكيت اخت سحر جايه حتى تشتغل للكل .

خالتي اصرت الا اعقد بالفستان الوردي حتى تكون ايامنه ورديه على كولتها وآمال أخت سحر سوتلي مكياج واني بشرتي تتحسس من المكياج كل شوية امسحه على كيف بالكلينكس وتظل تصيح هي وسحر وغدير وترجع تلطخ بوجهي ..

سحر :
غدير اطيني حبل خل اشبك اديها هاي ثالث مره نعيد المكياج وهي تخربه .

تراتيل :
وجهي يحكني ..

غدير :
اتحملي حبيبة هي كلها ساعتين تلاثه .

تراتيل :
هاااا ؟؟
شلون اتحمل ساعتين ..

سحر :
جذب جذب بس على كد العقد خيه بس اتحملي لاتحكين ولاتمسحين ويخرب ..

وحده تسشور بشعري ووحده تلطخ بوجهي وخالتي خنكتنه بالبخور دخت ..

مصدكت من خلصت واصرت خالتي ابقى كاعده بالغرفة مااطلع خاف انحسد على كولتها بقيت كاعده واحس بخوف ..
مااتذكر قبل من عقدت شنو جان احساسي بس حالياً احس بخوف رغم هالخطوه هي الوحيدة الي ممكن تحسسني بالاستقرار .
شهاب الوحيد الي بقى وياي ولااتخلى عني حتى من اتعارك وياه واجفص ..

وصلني مسج من سهام :
هلو شلونج شخبارج وين غاطه صار يومين ؟
ولج غير سمعتج مصايب عن مبين ، مو كتلج داك الناقصة ويه طالبه وهاي الظاهر اهلها عدهم علاقات بالحكومة وتحقيق وسين وجيم لان يكولون البنية جا ميته لوما ملحكين عليها ماادري شمسويلها وهسه داخله بغيبوبة ومتانينها تصحى حتى يستجوبونها ويعرفون شصاير .

بقيت صافنة عالمسج عدت قراءته اكثر من مره واني اتذكر اللي سواه الحقير مبين بيه ..
اكيد هاي هم اغتصبها لو حاول ياخذ كليتها هذا مو فارغ عذا وراه عصابة ..
الحمدلله الي الله نجاني منه وخلصني ..
بس شلون هسه خاف يظل مكابلني بالشركة ؟؟
اففف ..
اني لازم ابطل من الشغل مااريد مشاكل ويه شهاب لااكدر اكله مبين طلع يداوم وياي وهو مشغلني ولااكدر ابطل كبل هيجي بدون عذر مقنع وبدون مااحصل شغل بغير مكان ..
حسبي الله عليك يامبين ..
الله يفضحك ويدمرك مثلما دمرت حياتي وحياة هواية بنات مثلي ..

ضاگ صدري لدرجة محسيت بغدير من سحبتني من ايدي للصالة ..
فجأة انتبهت اني كاعده بالصالة وداير مدايري نسوان وبنات اغلبهم مااعرفهم ..

بقيت صافنة وفكري شارد ممركزه ابد ..
احس شي كاتم على نفسي حاولت افكر بشي حلو بشهاب مثلاً حتى امسح صورة مبين والي سواه من راسي ..

فجأة كوموني حتى الشيخ يلقني واني اعيد وراه ماادري شيكول ماعندي تركيز ظل يكرر اكثر من مره واني مااعرف شكول ..
حسيت ام شهاب اتوترت :
احجي خاله عيدي وره الشيخ شبيج ؟