تراتيل السقوط

الترتيلة السادسة والثلاثون

#تراتيل_السقوط
#الترتيلة_٣٦
#روز_الفياض
.
.
.
‏كأنه كُتب علينا العيش هكذا، مُعلقين في منتصف الأشياء كلها، لا نُحب ما يحدث، ولا يحدث ما نحبه."
.
.
.
اتصل جدو عالولد حتى يجون ومن اجوا حجيتلهم اللي شفته ..
باسل :
جا مو رحنه وسألنه كالوا ماكو احد عدنه بهذا الاسم ؟

تراتيل :
يجوز اتقصدوا ميكولون موجود ، ميريدون نعرف مكانه غير لو يريدونه نعرف هو وين جان خلوه يتصل بينه من اول يوم .

باسل :
على كلٍ .. اليوم جمعة مانكدر نسوي شي ولانكدر نروح ونحاول نتأكد ..
بلكي باجر اخذ هذا الولد صاحب جمال ونروح ونحاول وياهم بلكي نطلع بنتيجة .

تراتيل :
ميكدر يتأكد بالتليفون ؟

باسل :
لاتستعجلين تراتيل .. هاي الامور يحتاجلها تكتيك وترتيب بالتليفون مو مثل اذا واحد يروح بنفسه ..

سكتت ..

العصر كلت لام شهاب :
اريد اروح اشوف عمتي زحمة بعد مسألت عليها .

ام شهاب :
اي روحي ، المره مالها خلك تريد اليجيها ويسال عليها ..

تراتيل :
مابيه حيل البجي ..

ام شهاب :
ياريت عالبجي ، نبجي ماعدنه شي ..
بس العتب واللوم يوجع ..

بقيت كاعده وساكته وصافنه ومخليه ايدي على خدي ..
دنكت ام شهاب يم اذني :
ماكو شي منا مناك ؟

درت عليها :
يعني شنو ؟

ام شهاب :
بطنج مابيها شي ؟

صفنت شوية شنو بطني شبيها ؟؟!!
بعدين استوعبت ضحكت على كيفك :
عبالي ماادري عن شنو تحجين هههههه ..
الله كريم خالة الله ينطي الرزق بالوقت المناسب والاطفال رزق .

ام شهاب :
ونعم بالله العلي العظيم ..
بس اشوف وجهج اصفر اليوم ..
خاف بيج فقر دم ؟

تراتيل :
والله ماادري خالة ..

ام شهاب :
جا اذا انت ماتاكلين شلون مايصير بيج فقر دم ..
مو هلكاعده انت كومي سويلج لفة خبزه حاره وخضره ترسيها كرفس وخلي بيها طماطيه واكليها ..
انه بكدج خدودي جانت تنفط دم من الخبز والخضره ..

تراتيل :
اتمنى ، بس مالي خلك .. من اختفى شهاب واني كارهه كل شي حتى المي احس تلعب نفسي منه واشربه بالكوه ..

ام شهاب :
سوده علي يايمه ياشهاب ..

رجعت دارت علي :
تكومي سويلج لفة اكليها مو اله خضره اي شي لو اودي الجهال يجيبولج لفات من المطعم ؟؟

تراتيل :
والله مااشتهي من اشتهي اكل لاتخافين .

ام شهاب :
ويلي ..
حلكج بايد ماتعرفين تاكلين ..

اتذكرت شهاب من جان يجيبلي لفات الفلافل ..
حصرتني البجية ودرت على ام شهاب :
خل نطلع ...