تراتيل السقوط

الترتيلة الثانية والاربعون

#تراتيل_السقوط
#الترتيلة_٤٢
#روز_الفياض
.
.
.
أعآن الله قلبا تظآهر بـ القوه وهو آشد المكسورين♥️
.
.
.
مر اسبوع واني بأمريكا وباسل بعد مااتصل زعلان مني ..
ادري حقه بس اني هم حقي ..
اكو شي جان مخوفني من عقيد وسام لان ماانطاني مجال كبل خابر كلي ثاني يوم سافري حتى لو كان عنده حق كان ممكن يتأجل السفر يوم لو يومين لحد مباسل يعرف بالموضوع ويوافق ونتناقش ..

بعد كلام ام شهاب وياي اكو شي بيه اتغير ..
رغم خليت نفسي بمكانها اكثر من مره واتحملت منها كلام وملامه لكن اكو شي بقى عالق بفكري وبمشاعري انه مرات اكو بشر لو شتسوي يبقى ميحبك ..
يحوز ميكرهك ولايأذيك لكن ميحبك وميريدك هيجي بدون سبب ..

حاولت اقنع نفسي هي ام ومن حقها تدافع عن ابنها وتطلع اي شخص تحس اكو اذيه من جانبه تمس ابنها ..
بس اني مو اي شخص اني زوجته ..
ومالي احد ..
كل مشاعر التعاسة والحزن والهظم متنقاس باي مقياس من تكون وحيد رغم وجود عائلة واهل .

من تكون منبوذ والكل خايف منك تجي وتجيب المشاكل وياك ..
صحيح اهلك وصحيح يحبوك بصورة او بأخرى لكن المطلوب منك انه تبقى بعيد حتى يحبوك ..
تبقى وحيد ..
الى ان يجي الوقت اللي همه يحتاجوك بي ..
وقت المصلحة ويكولك تعال..

اتصلت علي سما مرتين جاوبتها بالثانية عزمتني على غدا عدهم بالبيت بس مجنت اريد اتعمق بصداقتي بيهم من هسه ..
حسيتها فضوليه ..

وحتى تكمل السبحة والاتهامات دك تليفوني رقم من العراق جنت رايحة اشوف بيتنه القديم قبل ميطلع المستأجر حتى بس يطلع ابلش بي تصليحات اذا يحتاج .
المستأجر مجان شخص غريب رغم مااعرفه لكن طلع رجال عراقي هو وعائلته ويردون ينتقلون لغير ولاية لذلك راح يتركون البيت بعد شهر تقريباً .

رجعت للفندق رجع اتصل علي نفس الرقم جنت خايفة خاف تكون دينا او عقيد وسام لذلك مجاوبت ..
وره شوية راسلتني غدير :
هلو رتوله شلونج شخبارج ؟
شلون امورج ؟
اكلج حبي جاسم يكول اتصل عليها متجاوب هو يم بيت عمي عمي يريد يحجي وياج .

تأففت وراي شوط ثاني من اللوم والعتب ..

كتبتلها :
هلو حبيبتي شلونج انت ؟
جنت مشغولة رحت شفت بيتنه لان المؤجر يريد يطلع من البيت وتعرفين هذا بيت ورثه عمتي الها حصة بي لازم اطمئن عليه لحد متنحل ونخلص من قصة الورث هاي ..
هسه اتصل عليه ..

مجاوبتني رأساً اتصلت :
هلو حبيبتي شلونج شخبارج ؟
شلون امورج ؟
مشتاقتلج ..

تراتيل :
نحن الاشوق والله كلش مشتاقتلكم متتصورين شكد ..

غدير :
مااريد اطول عليج هذا عمي اليوم عدنه ويريد يحجي وياج ..

جدو :
الو .. ها تراتيل ؟
شلونج يبه ؟

دمعت عيوني :
جدو حبيبي شلونك شخبارك ؟
اني الحمدلله زينة .

جدو :
والله من كالي باسل ولليوم وانه خايف وافكر وشايل همج ..
ليش رحتي يبه ؟
جان رجعتي هنا بينه واحنه نحميج ..
احنه نخليج بينه بالحفظ والصون لحد مايطلع ريلج بالسلامة ..