تراتيل السقوط

الترتيلة التاسعة والثلاثون

#تراتيل_السقوط
#اللترتيلة_٣٩
#روز_الفياض
.
.
.
قررت اروح للزيارة قبل مااسافر لازم اودع بيبي وجدو واهلي ..
حجيت ويه جدو كلي :
خالتج تاخذج كل مره هي واختها يرحن وياخذن وياهن البنات ياهي تريد تروح وياهن تروح ..

بقيت ساكته ام شهاب مطايقتني شلون اكوللها اخذيني للزيارة ..
عالغدا جدو كللها :
تراتيل تريد تروح للزيارة ، يمكن اخذها واروح باجر ..

ام شهاب :
جا وانه ؟ تريد تروح وحدك وين تتحمل الطريق انت ..
ابقى انه اخذها اخابر على ام خالد صاحبتي عدها حملة ونروح وياها وشوف بعد ياهي تريد تروح من البنات .

وره يومين رحنه اني وام شهاب وصاحبتها واختها وعمتي وعزمت انتصار !!!
اتوسلت بغدير امشي ويانه مقبلت :
مااروح مادام انتصار رايحه مااروح .

تراتيل :
لخاطري عفيه ..

غدير :
لا والله ولا اروح ، المن جايبه المغثه لروحي .

تراتيل :
واني ويامن احجي واسولف ؟

غدير :
روحي ساكته لاتحجين ويه احد احسن اخذيها مني .

تراتيل :
هسه خالتي المن ماخذتها ويانه !!

غدير :
خالتج حتى لو شتسوي بيهم انتصار تريدها عود مرت الجبير وام البيت بغيابها .

تراتيل :
وينه الجبير ؟ جبير شنو اشو باسل مشلوع كلبه وحده والجبير يجي بس ياكل ويشرب هو وام البيت مرته ؟!!

غدير :
اي والله .. حظوظ هاي لو باسل مسوي مثله جان شسوت بي .

تراتيل :
يبووو شيجرعها ..

سافرنه ..
كل الموجودين بالباص مااعرفهم كلهم شياب وعجايز ماعداي واكو بنية اصغر مني ..
ام شهاب تعرف كل الموجودين بالباص لان من منطقتهم .
كل شوية وحده تسألها :
هاي جنتكم ؟

ام شهاب :
اي بت اخو الحجي .

-صدك هي مرته القديمة ورجعها ؟

من اسمع هالسؤال ماادري ليش ابقى اتلفت ..
احس بالاحراج رغم جنت طفلة بس احساس بتأنيب الضمير بعده موجود بداخلي ..
طيشي قبل ودلالي ودلعي اذاني هوايه واذى هوايه ناس داير مدايري واولهم شهاب ..

اول شي اخذونه لكربلاء زرنه وارتاحينه وثاني يوم من الفجر اخذونه للنجف ..

رحنه لجدو وبيبي واهلي كلهم بنفس المكان بجيت يمهم لحد محسيت عيوني طفت ..
مكدروا يسكتوني انهاريت من شفت قبر بيبي مكدرت اتمالك نفسي واسيطر على مشاعري اشتكيتلها من نفسي ومن الناس :
حبيبتي بيبي عفتيني وحدي ورحتي ليش ؟
ليش مفكرتي منو الي وراج ؟
اني داموت يومياً اموت ماعندي احد احجيله واشتكيله بيبي ..
شهاب اخذوه وانشلع كلبي وراه ، لو انت موجوده عالاقل احجيلج ، اشتكيلج ، اطلع وجع كلبي يمج ..