#تراتيل_السقوط
#الترتيلة_الخامسة
#روز_الفياض
🥀
🥀
🥀
-مثل الشَيب عِايش أبيض ومذمَوم🍃
.
.
.
مرت كم يوم حاولت اغلس مااتصل على حسين حتى بيبي متحجي وياه وتصير السالفة بوجهي ..
ولااتصلت برواء لان بصراحة بعد التفكير مردت اكون طرف بالمشكلة بيناتهم هي وحسين وهدى ..
لكن ...
المشاكل هي تجيني .
بدخلتي للكلية شفت محمد اجه سلم علي ووياه واحد مااعرفه وراحوا .
وره يومين رحت اتمشى كلت يمكن اشوف شهاب صار مده مشايفته امشي واباوع عالبنايات اتذكرت اكو كشك صغير بالطريق بين الاداب والادارة واقتصاد جنت اكعد بي اني وصديقاتي ونظل نحشش عالطلاب ونخترعلهم اسماء ونشبع ضحك ..
فجأة من بين الذكريات الراكدة طلع كبالي مبين !!!
معرفت شتصرف ..
مااتذكر بالضبط شنو اللي صار بيني وبينه حتى اتصرف على اساسه ومحد يقبل يذكرني ..
وكلما احاول اتذكره احس بخنكه وضيق بصدري مااعرف سببه ..
ابتسم بوجهي :
السلام عليكم ..
جاوبته بتردد :
وعليكم السلام ..
مبين :
تسمحيلي اخذ من وقتج دقيقتين ؟
التفتت مثل الطفل الضايع ويدور على امه حتى تنقذه من غريب يسأله تروح وياي اشتريلك حاجة حلوه من الدكان ؟؟؟
دورت بعيوني على شهاب او سهام او محمد او اي احد اعرفه حتى ينقذني من هذا الشرير الي مااعرف شنو جريمته وياي غير انه انسان عليه علامة استفهام ابالي شخص من اتذكره اتضايق مااعرف شنو نوع الشر اللي مارسه ضدي وخلاني اشعر بهالطريقة .
للاسف محد موجود ..
حسيت بالخوف ، رغم الوسامة البحته بملامحه وابتسامته الجذابة واناقته الفوق العادية ..
هز راسه يسألني :
شكلتي ؟
هزيت راسي بالموافقة لان ماعندي حل ثاني خلي يحجي يمكن يذكرني حجيه بجريمته .
سحبلي كرسي كعدت وهو كعد مقابل الي حول طاولة مدوره صغيره .
مُبين :
شتحبين تشربين ؟
تراتيل :
ولا شي .
مُبين :
مايصير .. راجعة من امريكا بعد هالسنوات ومانضيفج !!
لازم اطلبلج شي ..
اتذكرت بهالحظة كلاص العصير الي شربته بالشقة وبعدها اتخربطت احوالي وفقدت الوعي .
تراتيل :
شتطلبلي جاي لو كهوه ؟
لووو .. عصير ؟
مبين :
اللي يعجبج ..
تراتيل :
وشتخلي بي هالمره ؟
اتغيرت شوية ملامح وجهه وابتسم جذب :
بعدج بافكارج وتخيلاتج ؟
تراتيل :
وانت بعدك تدور صيدات ؟
ضحك على كيف :
الصراحة ؟؟
اي ..
لان مالكيت وحده تسد مكانج .
