#تراتيل_السقوط
#الترتيلة_٤٤
#روز_الفياض
.
.
.
وجودَك مُطَمئِن ،
- ( حتى لو كان بيننا ، مُدن واناس ومَسافات ) .
.
.
.
دخلت بالشهر السابع ..
من اول اسبوع بديت اتعب حيل ونسبة دمي نزلت لحد ( ٦ )
انطوني كومه علاجات واخذ شكد عصاير فرش واكل صحي كله مشوي ومسلوك ومع ذلك النسبة مقبلت تصعد ..
بقيت بالبيت مااكدر اطلع اتعب بسرعة جانت سما تمر علي يومية وهي راجعة من الشغل تتسوكلي وانطيها قائمة شغلات محتاجتهم تشتريلياهم وهي راجعة ثاني يوم وهكذا ..
اول يوم بالاسبوع الثاني كعدت الصبح سويت جاي وطلعت من معجنات سما سخنتها بالمايكرو وكعدت اشتم ريحة الهيل يفور بالجاي تذكرني بايام بيبي الله يرحمها ، وايام ام شهاب وجدو من يكعدون الصبح بعد الصلاة للريوك ..
صبيت الجاي واخذت صينيتي للغرفة وكعدت اتريك بهدوء بعد مشغلت سورة البقرة بالتلفزيون ..
اكلت بهدووء جنت احس براحة وهدوء لاول مره من كم شهر ..
مااعرف شنو سبب هذا الشعور بس المهم جنت مرتاحة ماعندي اي مشاعر قلق او خوف او حزن او تفكير بأي شي كأنما الله مسح على كلبي وراح كل الهم والتفكير والحزن والقلق مره وحده ..
اختفى ..
خلصت كمت اتوضيت وقريت سورة يوسف اللي من انسجن شهاب لليوم مقطعتها ..
فتحت التليفون شفت مسج من سحر !!
من يوم مااجيت لامريكا مراسلتني ولااتصلت علي شعجب اليوم مراسلتني ؟؟
كلت خلي بعدين افتحه اليوم جمعة خليني اكوم اغتسل غسل الجمعة وابخر البيت بحرمل حتى احس بالانتعاش والنظافة الجمعة يوم خاص احسه واله طقوس خاصة بي ..
دك التليفون سما :
هلو اكلج شدتسوين ؟
تراتيل :
ماكو اليوم كعدت متأخره اتريكت وقريت قرآن وهسه خليت حرمل شوية واريد اتفرج فلم او شوف شنو ..
ليش ؟
سما :
اليوم عازمتج على على سمج شوي تجين لو اجي عليج ؟
تراتيل :
والله توني متريكة شبعانه بس السمج مينرفض فد ساعتين واجي ماشي ؟ منو عدكم ؟
سما :
محد بس اني وخالتي ام قدوري عمو وقدوري والجهال طلعوا لجماعة اصدقائهم فاقترحت خالتي علي نشوي سمج وتعرفيني اي مشروع بي اكل مااكدر اعترض عليه ههههه .
تراتيل :
اوكي ، اني اليوم حالتي النفسية والعقلية مستقرة اكدر اطلع واتونس بس حظرلي طرشي السمج يحب الطرشي وخبز حار اريد ولبن ..
شويه وتلكيني عندج .
سما :
ههههه تدللين .
انت بس تعاي كل شي موجود .
وره ساعتين تقريبا يالله رحت اخذت تكسي ومن وصلت اتصلت عليها طلعتلي .
ريحة السمج معبيه البيت بس شميتها حسيت نفسي جعت رحت مباشرة للمطبخ لكيت ام قدوري واكفة تسوي تمن شبنت خلت احساس الجوع عندي فوول :
خالة دتعذبيني ، هم سمج وهم تمن شبنت !!
شيصبرني ..
