تراتيل السقوط

الترتيلة التاسعة والعشرون

#تراتيل_السقوط
#الترتيلة_٢٩
#روز_الفياض
.
.
.
-

‏منذ أن عَرفتك حتى الآن كُنتُ على يقينٍ بأنني لن أُحب أحداً بهذا العمق والأنتماء.❤️

.
.
.
بمرور الايام اتعلمت فن التجاهل تجي هدى وتروح مااحاجيها ولااشوفها وسحر تحجي مرات وتبسمر وهم مااسمعها ..
صرت اعرف انه اليكره ميحب .. والحب مو بالغصب ومادام اني ممأذيتهم اذا خليهم يحجون ويخففون ذنوبي ..
يحجون من الغيرة وهذا شي زين ..
اتذكر حجايات بيبي من كلتلي ميحجي عليج الا العنده احساس بالنقص ..

عمتي خسرت القضية الي رفعتها ضدي تطعن بعقد البيت اللي سجله جدو باسمي بعدما استدعوا جدو محمد ابو شهاب وشهاب ابوجمال وناس مااعرفهم للشهاده وكلهم شهدوا بسلامة جدو العقلية الى ان اتوفى .

اما بقية الاملاك فهي جانت رافضة تبيع حتى اني مااخذ حصتي لذلك قررت ارفع قضية ازالة شيوع يعني المحكمة تبيع غصبا عن الكل ..
صحيح الموضوع بي خسارة لقيمة الاملاك والعقارات بس ماعندي حل وتعبت كل شهر اروح للمحكمة اريد اخلص ..

رحنه اني وشهاب جبنه صور المهر والعرس من الاستوديو :
احلى لقطة هاي ..

شهاب :
اي وحده ؟

تراتيل :
اللي لفيتني بيها ووياك بالبشت .. تجنن .

شهاب :
انه حلو هي كوه .

تراتيل :
هاي هم حلوه اللي اثنين بيها تحت الاكليل .

شهاب :
شلون بالله مااسوق .. لانندعم لاتحاجيني عالصور .

تراتيل :
ههههه الله شهاب هاي تجنن .

شهاب :
وينها ؟

من وصلنه للبيت صارت ضجة عالصور سحر وهدى وانتصار سمعت من سحر كتلتلها صوري الصور ودزيهن .
تراتيل :
لا متصوريها .

سحر :
تريد تشوفهن ..

تراتيل :
لا اذا تريد تشوف تجي هنا للبيت وتشوف بس صوري مااقبل تتصور بالموبايلات ولاتطلع من البيت .

سحر :
هي ماتجي .

تراتيل :
براحتها .

هدى :
وشدعوه عليج ؟ فد نمونه هنه صور .

كتلها بدلع :
والله عاد نمونه مو نمونه هذا شي راجعلي صوري وبكيفي انت تشوفيهم مو نمونه اني عندي تجنن كافي شهاب وطوله بيها بالبشت والعگال ..

هدى :
اي بالله شهاب معروف حلو وكلما يكبر يحلى ..

دخلت ام شهاب ووياها جيرانهم جايه تباركلنه :
هاي عروستنا شوفيها .

سلمت عالمره وكعدت تسولف وكل شوية تدور تباوعلي بعدين كلت لام شهاب :
ماتشبهكم مو تكولين بت عمه ؟

ام شهاب :
اي طالعة على امها الله يرحمها امها جانت شگره .

المره :
شهاب حلو وهي هم حلوه ، الله يسعدكم خالة .