تراتيل السقوط

الترتيلة السادسة عشرة

#تراتيل_السقوط
#الترتيلة_١٦
#روز_الفياض
.
.
.
- من سيفهم ضجيج روحك وانت في أتم هدوئك ؟؟!!
.
.
.
كسروا الباب ..
وسحبوه سحب مني ..
جان فاقد ..
ميدري بنفسه شسوه ..

نزلتني تهاني جوه غسلت وجهي ودلكت رجليه واديه حتى استقر واهدا بس اخذتني الرجفه ..
كل جسمي ينتفض .

تهاني :
اسم الله .. اسم الله شبيج ..

اتذكرت مبين واللي سواه ..
ظليت ابجي بشكل هستيري .
كعدت تهاني يمي وحضنتني ..

تهاني :
اششش .. اششش تراتيل ذكري الله ..
شجاج ؟
حسسنن ..
حسسسن ..

اجه حسن كلتله :
الحك البنية مدري شصار بيها اختنكت من البجي ماتكدر تسكت ..

وكف على راسي ضربني على كيف على وجهي :
تراتيل ..
تراتيل ..
رتوله .. شبيج ؟؟
تراتيل ..

مد ايده لزمني من زندي نزيت ..
وجه مبين من شفته طفرت من مكاني ..
تراتيل:
لاااااا .. لاااا
لاااا

حسن :
شبيج ؟

تهاني :
كعدي حبيبتي لاتخافين انه يمج وهذا حسن يمج ..
انت يمنه لاتخافين .

تراتيل :
جدوو ..
جددو وين ..

لزمني حسن حيل وكل لتهاني جيبي مي بارد بسرعة ..
تراتيل :
لاا عوفني .. حرام عليك ..

جابت تهاني المي ..

تهاني :
اجفي بوجهها خل تصحى هاي فاقدة ..

جفت المي بوجهي فزيت حسيت نفسي مثل الغركان وانكطع عنه الهوا ..
شهكت حيل بدخلت عمتي :
شبيها ؟

تهاني :
ماادري شصارلها ..

لزمت بعمتي :
عمه ..
لاتعوفيني هنا ..

دارت علي لزمت كصتي عبالها مصخنه :
شبيج اتخبلتي انت الثانية علي بهالليل هو سكران انت شبيج ؟

تراتيل :
مبين شسوه بيه .. مبين اذاني ..
خاصرتي تنزف ..

تهاني :
خطيه .. تتذكر السواه رجلها الجلب ..

حسن :
استغفر الله..

عمتي :
جيبلي القران تهاني هاي مخترعة وخايفة ..
الزمها حسن لاتروح تسوينه مصيبة تالي الليل .
خل اروح اتوضى .

كعدت بالركن مال الغرفة بالزاوية وادور بعيوني وين راح ؟؟
وين اختفى مبين ؟
هسه اكيد يطلع من وراهم ..

تراتيل :
هسه يطلع وراك .

حسن :
منو ؟
محد وراي لاتخافين ..

تراتيل :
جان يريد ياخذ كليتي .. وجرحني والله .

تهاني :
هذا شسوه بيها ؟

حسن :
لو مامتذكره شي احسن ..

تهاني :
انه احجي على حسين ، هي اول وتالي تتذكر .