تراتيل السقوط

الترتيلة السابعة عشرة

#تراتيل_السقوط
#الترتيلة_١٧
#روز_الفياض
.
.
.
"في معدتي ألم، يذكرني طيلة الوقت بالكم الهائل من الأمور التي اخترت السكوت عنها وابتلاعها، وكيف ينهش القلق داخلي دون أن يبدو شرسًا من الخارج."
.
.
.

دخلت عمتي لغرفتها تبدل .. عايشة الدور ومصدكة نفسها حنينة ومخلت شي بنفسي ..
وهي فعلاً مخلت شي ..
كل شي حلو بروحي احترك بفضلها بذاك اليوم ..

دخلت للحمام وسديت الباب انتظرتها تسد باب غرفتها وطلعت ..
رجعت للغرفة لفيت حجابي عدل واخذت جنطتي ولابتوبي وبقيت كل شي ثاني اريد بس اخلص بروحي وطلعت بسكوت اتسللت للمطبخ ومن المطبخ اتسحبت بسرعة للحديقة سمعت صوت حسين جوه يحجي بالتليفون يمكن يم الشيخ الظاهر ..

طلعت حافية ..
شردت حافية ..
اركض بالشارع حافية بمجرد حجاب وبجامة ..

شتا ودنيا بدت تظلم وباارده تكص العظم والشوراع شبة فارغة ..
واني اركض ماادري وين اروح اريد اوصل للشارع العام اشوف تكسي ماكو ..
صار الشارع شبعدده ..
رجلية من الخوف مااحس بيها ..
كلت خل اتصل على سهام اروح عدها لان اكيد راح يجون وراي لبيت بيبي ..

دورت جنطتي .. ملكيت تليفوني ..
نسيته ..
بقيت متردده ارجع لو اكمل ..
لا لا ..
ماارجع ..
اكيد يلزموني ..

فجأة شفت سيارة جايه وراي ..

ركضت ختلت وره حاوية زبالة ..
لحد مفاتت السيارة وراحت راح كلبي .. جنت متصورة حسين اجه وراي ..

وين اروح هسه ؟؟

شفت نفسي ضايعة وواكفة اباب بيت ناس مااعرفهم ..
دكيت الباب ..
طلعت مره جبيرة كالت :
منو ؟

تراتيل :
اني ..
اني خاله .

المره :
منو ؟

تراتيل :
اني خاله اني محتاجة مساعده ..

المره :
الله يطيج ..

تراتيل :
لا لا عفيه مااريد فلوس ..

المره :
الله يطيج روحي ..

تراتيل :
عفيه خالة بس فتحي الباب ..
مااريد فلوس اريد اغسل وجهي بس .

فتحت الباب على كيف شافتني وشافت وجهي كله دم خافت :
روحي منا ..
روحي الله يطيج .
تردين تذبين علينه بلوه ..

تراتيل :
لا والله بس اغسل وجهي واريد نعال رجلية اتشككت ..

المره :
روووحيي ..
روحي منا ..

طبكت الباب ودخلت ..

ماكو حل غير اروح لبيت جدو ..
بس بعيد شيوصلني بالليل ومااندل الطريق منين ولاتليفوني عندي ..

مشيت بين البيوت لحد موصلت للشارع احس رجلية اتكطعت جمدت ..
والحصو بالشارع شكك جفوف رجليه من جوه ..
وصلت للشارع وبقيت خايفة ياسيارة اشوفها اتوقعها سيارة حسين ..