تراتيل السقوط

الترتيلة الواحده والاربعون

#تراتيل_السقوط
#الترتيلة_٤١
#روز_الفياض
.
.
.
انته تدري عيونك مسويتلي واهس حته اعيش ؟؟❤️‍🔥
.
.
.

معرفت منو نعاسنه :
منو ؟

جاوبني :
خويه انه عقيد وسام وياج .

كعدت عدل فركت عيوني عبالي اتحلم :
منو ؟

وسام :
اخو ام عبدالله دينا ..

صفنت ثواني بعدين اتذكرت :
ها ها عقيد وسام اخو ام عبودي ..

وسام :
شوية الوقت متأخر بس توني راجع من الدوام واتصلت علي دينا وحجتلي عالصاير وياج ..

تراتيل :
اي .

وسام :
من الاخير ...
تكدرين تطلعين من تركيا ؟

تراتيل :
هاا ..؟
شو .. شنو ؟

وسام :
انت وين ؟

تراتيل :
بالفندق بس جنت نايمة فشوية مدااكدر اجمع ..
ممكن لو تسمح تنطيني دقيقتين اغسل وجهي حتى اكدر افتح عيوني ..

وسام :
ماشي ..
ماشي ..

سد التليفون واني كمت غسلت وجهي وكعدت انتظره يتصل واني افكر اخاف هذا هم يطلع واحد مو ثقة ومو امان ؟؟

والله حيره ياربي ..

رجع اتصل جاوبته كلي :
ها صحصحتي ؟

تراتيل :
اي احسن ..
اتفضل ؟

وسام :
اذا تكدرين تطلعين من تركيا طلعي خويه ..

تراتيل :
ليش ؟

وسام :
انه مااكدر اخدمج وانت هناك بس كل الاكدر اساعدج بي اوديلج واحد من جماعتنه مجاز وبتركيا ياخذج من الفندق للمطار لحد ماتصعدين بالطيارة ويتطمن عليج .

تراتيل :
انت متوقع مبين يسويلي شي ؟

وسام :
خويه السالفة مو لعبة ..
ذوله عصابة ، بعدين احنه طلعناج من العراق حتى يفكر انت رحتي يمكن يعوف شهاب بس شكنه طلع بمحله وطلع عده عيون هناك معناها نكمل خطتنه وتطلعين من تركيا ترحين لغير دولة ..

تراتيل :
وشهاب ؟

وسام :
باسل كلي على المكالمة والمسجات ورادني اعرضها على قاضي التحقيق بس كتله ماتفيد ..
يكدر يكول جنت اجذب عليها ، ماتعتبر دليل للاسف والتسجيلات ماياخذون بيها بالمحكمة بالعكس يكدر يشتكي عليج بيها ..

تراتيل :
زين شصار بالقضايا المرفوعه ضد مبين ؟
مو اكو بينه كالوا ابوها مسؤول وصاحب رتبة جبيرة ؟

وسام :
اي خطيه هذا من القهر على بته صارت بي جلطه وحالته كلش مو زينه ..
والبنية جانت بغيبوبة وصارلها يومين من كعدت وبعدهم على اساس يستجوبونها ونشوف شيصير .

تراتيل :
ولشوكت نبقى ننتظر ؟

وسام :
خلي ابالج مبين لحد الان ماعليه اي دليل انه وره موضوع شهاب يعني حتى لو لزموا مبين مايطلع شهاب ..