تراتيل السقوط

الترتيلة التاسعة عشرة

#تراتيل_السقوط
#الترتيلة_١٩
#روز_الفياض
🍃
🍃
🍃

كتلي كـل ناسج مشو ياهو البقالج؟!.
- كتلك انتَ♥!
.
.
.
بادت رجليه من الخوف ..

وبقيت مصدومه ساعات واني اباوع على مكان الطلقة اصبعين مو اكثر الفرق بيني وبين الموت ..
أثاري الموت مرات هم ينقاس بالمسافة ..

صارت هوسه واجو بيت جدو محمود وانكلبت الدنيا للفجر كلها متجمعه هواية ناس مااعرفه كلما اسمع صوت واحد يحجي لو يصيح اسأل غدير وتكلي هذا فلان وتنطيني صلة القرابة ..

ام شهاب كلش جانت ضايجة وعصبية لدرجة اتصلت على هدى نزلت عليها نزله اخذت حقي بيها وزيادة :

هن هذني صاحباتج العار ، واهلهن العارات ، مالكيتي غير هاي ام لسان زفر لاخوج حتى ياخذها ؟؟
شطولج شعرضج ماتعرفين تختارين صاحبات بيهن حظ ..
امداج وامده حظج ..
وامداني لان ماعرفت اربي ..
تمد لسانها علي هالطوله زهيره ؟؟!!
وامها انوب فوكاها ؟؟
هاي تاليتي انه ام جاسم هاي الزعطوطه توكف كبالي تعد وتصف هي وامها وانوب اخوانها المخانيث يدكونه ؟؟
امداج وامداهم ..
ولج لو ميت واحد بينه اليوم بهذا الرمي ؟؟
البنيه عبرت الطلقة يم راسها جا راحت بيها ووين اودي وجهي من ابوج واخوج ؟؟
هديووووه الله لايوفقج على هاي العمله ..
خاارمه ..
خاررمه ..
خليتيها وصلت للزلم انوب والرشاشات انت وياها ؟؟
بسيطه هديوه بسيطه يجي شهاب لو مايجي ..
اذا ماخليته يمدج مد على طولج بالبلوعه مااطلع انه..

عصرتلها عصير ليمون شوية واخذته الها شفتها كلش منفعه ومتأذيه من هدى رغم هي مدلله هدى بس مقبلت عليها ..

انطيتها كلاص العصير دفعت ايدي بدون كلام ..

تراتيل :
شربي شويه حتى ترتاحين مو زين عليج كل هالانفعال .

باوعتلي ورجعت دارت وجهها ومبين على وجهها كلش متضايقه وكأنما تريد تبجي جاوبتني :
شلون ارتاح والزلم راح تتكاتل من وره زهراء وهديوه ؟؟
منين ارتاح ؟
هذا اللعب مال شهاب كل مره ..
كل مره هالدكة باخر لحظه وكال بطلت ..
آخخخخ يااربي ..

صفنت بحجيها وسألتها :
ليش شهاب جان خاطب قبل هالمره ؟

باوعتلي بطرف عليها :
خالة عوفيني بحالي ماتشوفيني بيا حال .. انه متمرمره وعلى يا ساعة تصير كاتل ومكتول ووليداتي يرحون بيها لو يكتلون واحد وانه شمحصله من النسوان ؟؟
جنت بالعه موس وساكته ادري بيها برعه وصلفة ولسانها طويل بس كلت ميخالف مادام هو قابل ومرتاح اتحمل ، خليه بس يعرس اندري منين رجعت علي تراتيل ...

انقهرت :
تراتيل لاحجت ولاكالت دافعت عن نفسي وبس ، ليش اليدافع عن نفسه يعتبر مجرم بقانونكم ؟
خالة حبيبتي اني لا حبيت شهاب ولا اتقربت منه ولاحجيت وياه الا بعدما هو اجاني بنفسه وبشخصه وكدام بيبي الله يرحمها شاهده جان يجي تقريبا يومية وحتى من داومت بالكلية ...