تراتيل السقوط

الترتيلة الخامسة والاربعون

#تراتيل_السقوط
#الترتيلة_٤٥
#روز_الفياض
.
.
.
تُستبدَل كل المعاناة التي يتعثر بها المرء في يومه بكلمة حانية و كتفًا يمكنه الاتكاء عليه دون أن يستثقله.
.
.
.
وعيت ماادري شبيه على بالي امي بعدها عايشة اتذكر صوتي جنت اسمع نفسي اصيح :
ماما غطيني ..
بردانه ..
ماما غطيني ..
بردانه ..
امي وين ؟
بردانه ..

شوية شوية بديت اسمع الحجي الي حواليه وافهمه بس بطييئ ..
اسمع صوت ام قدوري تحاجيني واحاول افهم شتكول ..
تراتيل :
بردانه ..
ماما وين ؟

ام قدوري :
اني هم امج ، بردانه هسه اغطيج حبيبتي ..

غطتني وباوعت لسما اللي جانت صافنه بوجهي ..
مجنت اعرف اني ليش بالمستشفى تركيزي جان شبه معدوم .

اتذكر اني جنت اريد بنج نصفي بس الدكتور رفض وكلي راح يسببلج صداع شديد واحنه منريد اي مشاكل ثانية لحد منعرف شنو سبب تشوش الرؤية .

حاولت ارفع راسي كالت سما :
شنو تردين حبيبتي ؟
تردين ترحين للحمام ؟

تراتيل :
لا ..
اريد ماما ..

سما :
استغفر الله واتوب اليه ..
هسه تجي حبي ارتاحي ..
ارتاحي صارت عندج بنوته تجنن صغيرونه ..

تراتيل :
اني ؟

سما :
اي صرتي ام ..

تراتيل :
ام منو ؟

سما :
ماادري اختاريلها اسم .. ممفكره بأسم انت ؟

تراتيل :
امي وين ؟

سما :
هسه تجي راحت تشوف بنتج وتجي ..

تراتيل :
بنتي وين ؟

سما :
حبيبتي اسم الله عليج شبيج اليوم ؟

تراتيل :
اريد امي .. امي جانت هنا ..

ام قدوري :
مسكينة ياخالة انت، الله كتبلج عمر جديد.

سما :
اي والله ، الف الحمدلله والشكر ..

تراتيل :
اريد انام ..
بردانه ..

سما :
لا حبي انتظري لا تنامين خل يجي الدكتور ميقبل تنامين هسه .

تراتيل :
نعسانه ..

سما :
حقج والله بس انتظري شوية اتحملي ..

جابولي عصير اشربه واني كوه فاتحه عيوني نعسااانه اريد بس انام ..

كل شوية اغمض عيوني وتكعدني سما تشربني عصير شوية وتسولف ويايه حتى ماانام ..

الى ان وعيت واستوعبت ..
تراتيل :
شفتوها ؟

سما :
اي شفتها وبعدين كبل اخذوها للخدج هسه ام قدوري راحت تشوفها ارتاحي انت .
مفكرتيلها بأسم ؟

تراتيل :
اسميها ياسمين ، على اسم امي ..
ماادري ليش امي على بالي ..

سما :
حبيبتي الله يرحمها ويخليلج ياسمينه الصغيره ان شاءالله وتفرحين بيها .