#تراتيل_السقوط
#الترتيلة_٤٦
#روز_الفياض
.
.
.
- الجَبر الإلهِيّ إذا تأخر . . لا يَأتِي عَادِياً أبداً .🌺
.
.
.
حاول الدكتور يقنعني بضرورة اجراء العملية باسرع وقت بس اني رفضت ..
انطيت لشهاب فرصه شهرين اذا مطلع اسويها ، بس اذا الله فرجها عليه وطلع راح اخذله ياسمينه لتركيا تبقى عنده واني ارجع اسوي العملية ..
على الاقل اذا صارلي شي مااخاف على بنتي لان راح تكون مع ابوها .
الضرر الممكن ينتج عن هالتأخير باجراء العملية ممكن يكون ضرر دائم وممكن يكون مو بس غواش على عيوني لا .. ممكن افقد البصر ..
ممكن مترجع الرؤية عندي مثل قبل ..
الله اعلم لكن اهم شي بالنسبة الي حاليا هو بنتي .
لازم اكون مطمئنة عليها تماما حتى اخطو هيج خطوه .
الدكتور كلي انه احتمال جبير ميكون ورم لان اني صارلي سنة تقريبا من شلته ممعقولة بهالسرعه رجع احتمال يكون شي ثاني كأن يكون الدكتور بالعملية السابقة مااستأصل الورم كله مثلا بقى جزء ولو بسيط جزء صغير جدا سبب التهاب والله اعلم .
لكن بكل الحالات النتيجة وحده وهي انه ممكن ميرجع النظر عندي مثل الاول وممكن افقد البصر اذا تأخرت باجراء العملية لان هاي الكتلة دتنمو وتكبر بشكل جدا سريع ..
بعد مرور (٣) اسابيع من آخر اتصال بيني وبين شهاب
جانت يمي سما جايبة ياسمين يمي .
مااشوف ملامحها واضحه بس الاحساس باصابعها بين اديه جان احساس مااكدر اوصفه ، شعور مو طبيعي .
اتذكر من جنت طفلة وجانت عندي لعابة البسها واسبحها على اساس بنتي هسه هالشعور هذا صار حقيقي تحس اكو كائن حي ، مخلوق ضعيف ، ملاك صغير ، يخصك انت ، انت مسؤول عنه وعن وجوده وحياته الجاية .
شعور البهجة جان مو طبيعي اتمنيت شهاب موجود حتى تكمل فرحتي ..
تمنيت عيوني مابيها شي واشوفها عدل واشوف ملامحها تشبهني لو تشبه ابوها ..
تمنيت اشوف التغييرات اللي تصير بشكلها وحجمها وملامحها كل ميمر يوم جديد عليها ..
تراتيل :
متخليها تبات عندي اليوم؟
سما :
لا بعد ماانطيجياها صارت بتي ، روحي لشهاب جيبولكم طفل ثاني
تراتيل :
هسه بس خل يطلع ..
سما :
هانت ان شاءالله
تراتيل :
زين خليها اليوم تبات يمي عفيه ؟
سما :
يمعوده كعدي راحه انت تحتاجين ترتاحين مو تسهرين بعدين هي هم تحتاج رعاية بعدها لحمه ترفه اذا وصخت متكدرين تغلسيلها واذا ردتي تسويلها حليب متشوفين القياسات و هاي ابسط شي ..
تراتيل :
وانت شذنبج تسهرين وياها يومية ؟
عبد القادر خطية شنو ذنبه متحمل الدوخه بتالي الليل رجال يرجع من الشغل تعبان يريد ينام يريد يرتاح مو يلكي طفلة الليل كله تتنغوص وتبجي ومتخليه ينام .
