#تراتيل_السقوط
#الترتيلة_٣٧
#روز_الفياض
.
.
.
انه الــ باسو عيونه وفارگوهن 💔
.
.
.
اجتماعات يوميا تنعقد عدنه بالبيت بين باسل وجاسم وجدو وبين جمال واخوانه واصدقائهم .
جنت اكعد عالدرج انتظر بالساعات حتى اسمع شنو عدهم من اخبار وشنو ناوين يسوون ..
يبقون لنص الليل يحجون ويسولفون ويخابرون وبعدين كلمن يروح لبيته وابقى اني كاعده للصبح ادعي واناجي ربي ..
من رجعت من بيت باسل بعد معرفنه تهمة شهاب بديت اسأل عن محامي شاطر .
كعدت الصبح كتلهم رايحه للمستشفى اسوي تحاليل وفحوصات بحجة وجهي اصفر ومااشتهي الاكل .
اخذت تكسي ورحت للكلية ..
دورت على دكتور محمد من شافني كلش رحب بيه فكتله:
محتاجة اسماء البنات المشتكين على مبين .
محمد :
شتسوين بيها ؟
تراتيل :
اريد اروح اشهد وياهم ضده .
محمد :
تشهدين ؟
تراتيل هذا مو لعب ..
شفتي شهاب شصار بي من شهد ؟
بعدين انه مااعرف اسماء المتضررين من القضية ..
تراتيل :
سهام اكيد تعرف ..
محمد :
وسهام شمعرفها ؟
تراتيل :
مبين الكلب جان يداوم وياها وعلاقتها بي قوية .
باوعلي محمد :
اي يداوم وياها بس مو لهدرجة علاقتهم قوية مجرد زميل عمل .
تراتيل :
عادي اكو زملاء عمل مقربين .. مو صح ؟
حسيته شك بكلامي الي قصد ..
محمد :
اذا تعرف شي اكيد راح تكلج ..
تراتيل :
منو سهام ؟
ليش انت متدري اني وياها خربت صداقتنه ؟
محمد :
لا والله ماادري ..
تعاركتوا اكيد ؟
تراتيل :
قصة طويلة خليها هي تحجيلك .
المهم تحصلي ارقام البنات ؟
محمد :
شهاب يقبل ؟
تراتيل :
طبعا لا ..
بس اني ماانتظر موافقته حتى اساعده ..
محمد :
تراتيل انت خوش بنية انه اعرفج من سنين وشهاب خوش ولد خلوق ومؤدب وطيب واتمنالكم كل خير ..
بس هاي الخطوه الخطاها شهاب غلط والتردين تسوينه انت هسه اكبر غلط ..
نصيحة مني تركي هالموضوع وركزي على شهاب .
تراتيل :
انت بس حصلي الاسماء وبعدين احجيلك ..
عفته ورجعت بدون مااحجيله شي ومااحتاج اسماء البنات اساساً بس ردت يوصل خبر لسهام اني راح اشهد ضد مبين واكيد اسمها هي راح يجي بالموضوع لان هي عرفتني عليه ..
ردت اخوفها ..
واكيد هي راح تتصل بمبين وتكوله هالحجي .
بالطريق لاكتني دينا البنيه ام عبودي الجانت تداوم وياي بالمسائي ..
سلمنه على بعض وكعدنه شوية كتلها :
شعندج جاية من الصبح ؟ مو داومكم مسائي ؟
