#تراتيل_السقوط
#الترتيلة_الاربعون
#روز_الفياض
.
.
.
كان يشبه تحدياً عظيماً ان انجو من قبضة الايام الفائتة ،لم يساعدني شيء عدا معرفتي العميقة بأنني ان استمريت في الركض فسوف انجو.
.
.
.
دخلت للدكتورة اللطيفة الي رحبت بيه بابتسامة جميلة وكلتلي :
اني دكتورة نسائية وحولج عندي لان تحاليج كلها مابيها شي ماعدا انه انت حامل ..
وهسه راح نشوف الطفل حتى نعرف انت بأي شهر ومن بعدها ترجعين للدكتور ..
لثواني بقيت اباوعلها صدى الكلمة بأذني حلو ، من زمان اتمنيت اسمعها ..
شوية وضحكت كتلها :
صدك ؟
الدكتورة :
انت حامل في الشهر الثالث ..
ضحكت حيل مكدرت اسيطر على ابتسامتي لدرجة الدكتورة والممرضه يضحكون على ضحكي ..
بقيت مبتسمه ابتسامة عريضة صبت دموعي ومحسيت بيها ..
حولوني للسونار شفت الطفل !!!
سبحان الله حياة داخل حياة ..
الحمدلله رب العالمين ..
خلصت من الدكتورة رجعت لدكتوري باركلي :
موضوع الحمل مينفي وجود شي ثاني ..
تراتيل :
يعني شنو ؟
الدكتور :
يعني احتمال الدوخة مو بسبب الحمل يمكن يكون الورم رجع لكن حاليا منكدر نسوي شي الا بعد اجهاض الحمل ..
تراتيل :
يعني اكو حمل لو لا مفتهمت شي ؟
اني هسه حامل لو لا ؟
الدكتور :
اكيد حامل .
تراتيل :
والورم رجع ؟؟؟
الدكتور :
منعرف ومنكدر نسوي هسه اي شي الا اذا اجهضتي ..
تراتيل :
خوماكو شي !!!
شنو تريدني انزله علمود الفحوصات ؟
تره هذا روح طفل ...
كلما اتمرض اقتله من كل عقلكم ؟
ويجوز يطلع ماكو ورم ويروح ابني هيجي ؟؟
الدكتور :
القرار قرارج ..
طاحت دموعي ومسحتها :
شكرا ، بس ابني اهم ..
بيومها رجعت للفندق واني طول الطريق دموعي تصب اتمنيت شهاب ويايه ويسمع هالخبر ..
وصلت لغرفتي كبل رحت اتوضيت وصليت ركعتين حمد وشكر لله سبحانه وتعالى .
دعيت الله يتمملي على خير ودعيت لكل محروم من الذرية الله يرزقه ويرضيه ..
خلصت ولزمت تليفوني لثانية نسيت شهاب مسجون ردت اتصل عليه وافرحه ..
بعدين اتذكرت واكتئبت..
اتغديت غدا صحي ورحت اشتريت اشياء صحية حليب وجوز ولوز وفاكهة وغيرها ..
لازم اهتم بتغذيتي منا وهيج .
لازم اول واحد يعرف شهاب ، هو احق واحد بهيج فرحة ..
بس شوكت يكدر يتصل الله اعلم ..
مو مشكلة اتحمل كم يوم بقت على كم يوم ..
بالليل جنت اريد انام طفيت اللايت والتلفزيون وخليت راسي عالمخده واحسب باصابعي اسبح تسبيح السيدة الزهراء عليها السلام ..
وشفت تليفوني يدك لان جان صامت ..
