تراتيل السقوط

الترتيلة العشرون

#تراتيل_السقوط
#الترتيلة_٢٠
#روز_الفياض
.
.
.
"لن يؤذيك عدوّ ستُصاب من الأماكن الصديقة دائماً ."
.
.
.
مجان سقف توقعاتي عالي بالنسبة لخوالي بعد مشفت عمتي اللي من دمي ولحمي شلون تفكر ، بس هم مجنت متوقعتهم واصلين لهالمرحلة من المادية وقطع صلة الرحم ..
طلعوا مثل عمتي ويمكن اكثر شوية .

خليت بيد خالتي مبلغ بسيط ورجعت لبيت خالو ضايجة ومقهوره ليش ميساعدها وهو عنده خير من الله ؟؟
ادري شلون ينام الليل ويدري اخته محتاجة ويكدر يساعدها بس ميساعدها ..

هالايام المضت شهاب مراسلني بيها بعد مااعرف ليش بس جنت اعرف الاخبار من غدير .
تراتيل :
يعني مااتنازلوا عن الدعوه ؟

غدير :
لا خيه شيتنازلون هو شارد وعمي شرط عليهم مايتنازلون الا بعد مايلزمونه الشرطه او هو يروح يسلم نفسه ويجي يعتذر هو واهله ..

تراتيل :
شيعتذرون اذا همه هيج اخلاقهم!!

غدير :
لا اهله ماقبالين عليه باسل يكول وشافوا طلعوا بالوجه الاسود كدام الناس كلها ظلت تلوم بيهم ظلوا يتوسلون ويومية مودين ناس بس اتنازلو ..
خيه هو واحد زعطوط عمره عشرين مدري ( ١٩) .

تراتيل :
شهالمزعطه !!
والله ...
على فكره تره هي مو بالعمر غدير ..
مرات جبير وتصرفاته مال زعاطيط ومرات صغير وعقله وتصرفاته مال كبار وفاهمين .

غدير :
اي والله صدك ..

تراتيل :
اي شنو الاخبار؟

غدير :
اخبار منو ؟

تراتيل :
اخباركم ؟

غدير :
خيه اخبارنه شتسوين بيها .. دوري اخبار ذولاك الناس هههه .

تراتيل :
ذولاك الناس كاطعين كلبي ، احس مضيعه شي بدونه ..

غدير :
امس رجعوا ومن امس لليوم كلما يصيرله مجال يصيح علي يسألني عنج .

تراتيل :
كولي والله ؟؟

غدير :
ههههه هي مال حلفان بعد الولد جاي طاك كلبه يريد بس يصير زين حتى يتزوج ..

استحيت من غدير وهي حست بيه :
تره مابيها شي لاتستحين مني انه هم اختج ..

تراتيل :
هههههه لا مااستحي منج انت اختي واكثر ويمكن اقرب وحده الي بهالفتره ..
وانت تعرفين كل شي من الاول للاخير بسس ..

غدير :
بس شنو ؟
بلا بسبسه انت تحبينه وهو يحبج وباقي الناس هباء منثور ..
دعيشي يمعوده وطز بيهم .

تراتيل :
مااريد اعيش بمكان احس نفسي بي مكروهه ، مااكدر ..
احبه واريده بس مااكدر .

غدير :
ماتكدرين على شنو ؟
جدج يحبج وباسل والولد كلهم هديوه مامحسوبه متزوجة واول وتالي من تشوف اخوها شكد فرحان تتعدل ، واذا على خالتي تره خالتي مره حقانيه انه اكلج هي مرات تحجي حجايات يجوز تزعل بس تره كل احنه مرات من نتقهر لو نضوج نحجي ، مو كل الحجي طالع من الكلب ..