#تراتيل_السقوط
#الترتيلة_٣٥
#روز_الفياض
.
.
.
يارّب البِدايات والنِهايات
يارب كل مُحاول رغم المتعثرات
هَب لـي هذهِ المرة القوة فقط💔
.
.
.
معرفنه وين اخذوا شهاب ومنو اخذه ..
كلها اتجمعت عدنه بالبيت بعد مجدو اتصل على الكل ..
جاسم وباسل وبيت جدو جمال وحتى حسن ابن عمتي هو وابوه اجو ..
اتوزعوا كل واحد راح يسال بمركز معين وكل واحد يعرف احد بالشرطة او الامن اتصل عليه ..
يومين مرت علينه لانوم لااكل لاراحة ..
ام شهاب تبجي من الصبح لحد الليل هي وهدى .
واني وغدير بالمطبخ مبتعدين عن التجمعات لان انتصار وسحر اجتمعن بحجة الظروف واشتغل الحجي والنفاق .
غدير :
رحوا هسه لولد صاحب جمال ابن عمه بالامن يداوم .
بقيت ساكته كالت :
احاجيج ؟
تراتيل :
اسمعج ..
بس مالي خلك احجي ..
غدير :
ماكو شي ان شاءالله لاتخافين ..
تراتيل :
شلون مااخاف ..
مختفي صار يومين ومحد يعرف وينه ولالكوه باي مكان شلون مااخاف غدير ؟
اذا ماخاف عليه اخاف على منو ؟
سكتت غدير ..
بالليل كعدنه كل احنه بالصالة ننتظر خبر .
والرياجيل كلهم بالديوانية .
يتناقشون ويسولفون وسحر تسوي جايات وترجع ..
وره شوية طلع باسل كلتله امه :
ها يمه ؟
ماحصلتوا شي ؟
باسل :
ماكو شي بعدنه ..
بس انه اكول خاف ....
وسكت ..
ام شهاب :
خاف شنو ؟
باوعلي ورجع باوعلها :
خاف راح شهد من ورانه ؟...
ام شهاب :
ماادري ..
هو كال مالي علاقة من حجينه عليه كال بعد مااشهد ومالي علاقة ..
شوكت راح ؟!!
تراتيل :
يشهد على شنو ؟
بقى باسل ساكت .
وام شهاب انطتني ظهرها ودارت على باسل تسولف وياه بصوت ناصي ..
سألت غدير كالت ماادري نكرت اي معرفة الها بالموضوع رغم اني متاكده باسل ميضم عليها شي .
كل يوم يمر جنت اخاف اكثر ومرات جنت اخاف لدرجة افكر يمكن يكون مبين وره الموضوع ، بس ليش ؟
شيريد بعد مبين ؟
وشعليه شهاب حتى يسوي بي هيج ؟
معقولة لان اتعارك وياه شهاب وضربه ضمها اله ؟!!
لا ممعقولة .. اي ليش لا ليش مو معقولة هو مبين شنو غير واحد حيوان وصارت عنده فلوس وسلطه ..
مر اسبوع وماكو شي
اسبوع ثاني وهم ماكو شي
مر شهر وماكو اي خبر .
جنت يومية اقرا سورة يوسف واقرا سورة البقرة واصلي ركعتين صلاة لقضاء الحاجة ..
يومياً ..
جنه نبقى بالليل منكدر انام لااني ولاجدو ولاام شهاب عبالك لازمين دوريات ،.
كلما انزل الكاهم كاعدين ..
واذا منزلت تصعد ام شهاب تشوفني :
ها بعدج كاعده ؟
عبالي نمتي .
