تراتيل السقوط

الترتيلة الحادية عشر

#تراتيل_السقوط
#الترتيلة_١١
#روز_الفياض

🍃
🍃
🍃.

اقول في نفسي دائما ربما هذه ليست حياتي، حتماً انها ليست حياتي ، ربما هي حياة شخص آخر نسيها كما ينسى الناس مفاتيحهم على الطاولة ، ويجب ان انتظر ..
انتظر عودته ليأخذها ويعفيني من تحمل مسؤوليتها وعليه ان يعتذر ..
فحياته اتعبتني جداً..

.
.
.
من رجعت البيت لكيت بيبي نايمة كلت خطية خليها اتغديت وحدي ورحت اصلي اتذكرت هاي البنية وربطتها برواء معقولة بت عم رواء ؟!!
احتمال ..
صليت وخلصت وخدرت جاي وكلت خل اكعد بيبي تكعد تشرب وياي جاي واريد نطلع اني وياها نغير جو شوية لان هي هالايام لان اشتغلت تبقى وحده طول النهار خطية ..

دك تليفوني شهاب :
السلام عليكم

تراتيل :
عليكم السلام

شهاب :
شلونج ؟

تراتيل :
الحمدلله ، انت شلونك ؟

شهاب :
مشتاقلج ..

ابتسمت ..

تراتيل :
اممم .. صحيح .

شهاب :
مامصدكة يعني ؟

تراتيل :
تؤ .. شنو الدليل ؟

شهاب :
الدليل انه ابابكم هسه .

تراتيل :
جذب !!!

شهاب :
لا صدك هههه والله جبتلج شغلة خليتها بالباب طلعي اخذيها ورجعي ..

تراتيل :
شغلة شنو ؟

شهاب :
ماادري انت طلعي اخذيها وشوفي شنو هي .

تراتيل :
ماشي ..

طلعت بس ملكيت شهاب ..
بس بالباب اكو علاكة معلكة ..
اخذتها فتحتها لكيت لفات فلافل ضحكت كتبتله :
تصدك عاد جنت داسوي جاي والجاي محتاج لفات اجت بوقتها .

شهاب :
دسألي علي عالاقل وينك وين رحت ماشفتك ؟

تراتيل :
صدك وين رحت ؟

شهاب :
للبيت ، توني راجع من الكلية كلش تعبان ونعسان من الدوام للبيت بدلت ملابسي رحت للكلية وهسه راجع للبيت .

تراتيل :
الله يساعدك ..

شهاب :
يلا نحجي بعدين ..

تراتيل :
ان شاءالله .

صبيت الجاي وخليت اللفات بصحن ورحت اكعد بيبي :
بيبي ..
بيبي ..
فوفو ..
فوفو ...

ندهتها .. ماكو .. ندهتها حيل هزيتها ..
ماكو استجابه ...

ثواني مرت واني صافنة وخلال هالثواني مرت براسي افكار مو فكره ..
مباشرة اتصلت على شهاب بس كال :
الو
كتله واني ابجي :
الحكنييي ..

شهاب :
شبيج ؟ شصار ؟

تراتيل :
بيبي متحجي ولاتكعد .. اندها متكعد ..