تراتيل السقوط

الترتيلة الثامنة عشرة

#تراتيل_السقوط
#الترتيلة_١٨
#روز_الفياض
.
.
.
-‏من اقوى الحروب ، ان تحارب شوقك لشخص "❤️
.
.
.
بعد العشا باسل هو وجماعته اتجمعوا بالديوانية يتابعون مباراة الريال وبرشلونه وكل شوية نسمع الهوسة مالت التشجيع مالتهم .

تراتيل :
هههههه هاي كل مره هيجي ؟

غدير :
كل مره هيج واذا فازوا يلعبون لعب بالركص ويتراهنون من عشا لو مرات سفره لاربيل .

تراتيل :
هههههه بالعافية عليهم .
مونسين نفسهم .
اتذكر من جنة صغار وجان نص العراق يشجع الزوراء والنص الثاني يشجع الطلبة ههه والله ايام ..

غدير :
تتمنين الماضي يرجع ؟

تراتيل :
مو كله ..
اتمنى الماضي يرجع بس اكون بوعي هسه واكدر اختار الايام والتجارب اللي اريد احذفها حتى مااكرر نفس الاخطاء .

غدير :
اي والله .

تراتيل :
يلا لاتضيعين علي الموضوع احجيلي عمتي الفريدة من نوعها شحاجيه علي ؟؟

غدير :
شوفي ..
باسل كلي مالج شغل بس انت اخيتي مااريد اضم عليج لان اول وتالي تره راح تتحاسبين على هذا الحجي وهنا ناس صعبين عمي رجال امي لايقرا ولايكتب يعني جاهل وعنده هيج سوالف خطيرة وحتى الولد ليش اجذب عليج تره هم اكيد يشكون بعد هالحجي ..

تراتيل :
ياحجي ؟ دفهميني ؟
خوفتيني تره .

غدير :
من واصل جاسم عمتج مدستره السالفة ويه ابنها واجانه جاسم مثل الثور الهايج يريد يكتلج ..

تراتيل :
يكتلني !!!
على شنو ؟؟؟

غدير :
عمتج من داخل جاسم مسويه روحها مغمى عليها وطايحه لان حسين طاكج وحسين يصير الا اكتلها الا اذبحها وهي تكله مااخليك تمد ايدك عليها ، اتبرى منك اذا عدتها وطكيت بت خالك .

تراتيل :
خررب غدير احجي تره نشف دمي ..
شصاير ؟؟

غدير :
كايلتله لكيت بجنطتها حبوب مانع ، بنية مامتزوجة شتسوي بالمانع بجنطتها ؟؟
ومن داري على اساس حسين طاكج وانت مهزومه عند الجوارين وفاضحتهم وبعدين شارده .

تراتيل :
هااا ؟؟؟
شنو هالخريط هذا ؟؟
هههههه هاي مخرفة مو عاقله ..

غدير :
شوف هاي تضحك ..
اكلج جاسم اجه مناك مستشر الا اذبحها يصيح ..

تراتيل :
مع احتراماتي الج بس خل يطير شنو فوضى هي وشنو هالعذر السخيف شنو حبوب مانع مدري شنو!!
واذا شربتها يعني ؟؟
تره اني مو طفله ولاقاصر حتى يتحكمون بيه لهدرجة شنو هالتخلف والجهل هذا ؟؟
فرضاً فعلاً لاكيه هي حبوب منع حمل بجنطتي ..
شنو الجريمة البيها ؟؟
مو يمكن عندي قضاء صيام واريد اكمل شهر ؟!! مو يمكن عندي خربطة بالهرمونات او الشهرية واريد اتعالج ..؟
يعني هواية اكو اسباب فبعد على شنو مستر جاسم يريد يضربني ؟؟؟
هذا اليكلك ردتك عون طلعت علي فرعون ..