تراتيل السقوط

الترتيلة الواحد والعشرون

#تراتيل_السقوط
#الترتيلة_٢١
#روز_الفياض
.
.
.
وافيضك بالحچي و گلبك ولا چنه
‏يشِالع گلبي من سنين هلبت تنشلع منه .❤️
.
.
.
بعد الغدا سوت غدير جاي واني نظفت المطبخ وكل شوية شهاب طاب طالع للمطبخ لدرجة امه انتبهت آخر مره دخل بحجة يشرب مي دخلت وراه كلتله :
شجاك اليوم اليوم كاتلك العطش شنو الشمر جان كاطع عنك الماي ؟

ضحكت وكتمت الضحكه لدرجة عيوني دمعت وهو ضحك بصوت عالي ..

باوعتلي امه :
خلصي وتعاي وراي اريدج بشغله ..

سكتت وخفت التفتت على شهاب باوعتله كلي :
شبيج صوفرتي ماراح تكص راسج تره ههههه .
بس من تعرفين الموضوع كليلي .

تراتيل :
يعني انسحبت من هسه وخليتني بوجه المدفع ؟

شهاب :
انه رجال گلت كل العندي وحجيت كل الحجي وانتهى دوري وهسه الكره بملعبج ..

تراتيل :
ياحجي ؟
كرتيش ؟

شهاب :
دخلصي بسرعة وروحي شوفيها شتريد منج .

تراتيل :
بسيطة شهاب ..

رجع دار علي :
تهددين ؟

تراتيل :
ههههه دروح مو والله فضحتنه هسه اكو واحد خلال ساعة يشرب مي خمس مرات شنو جنت كاطع الصحراء ؟

راح وهو يضحك ..
كملت تنظيف ورحت ادور ام شهاب لكيتها بغرفتها دكيت الباب وفتت كالت :
دخلي وسدي الباب وراج ..

جانت كاعده عالجرباية ويمها علبه صغيره ..
رحت وكفت يمها كالت :
كعدي ليش واكفة ..

كعدت فتحت العلبة بيها ذهب كالت :
هاي الگردانه مال جدتج الله يرحمها ، ضمتها الج عندي ..

كلاده قديمه بس كلش حلوه ..

ام شهاب :
هاي من ايام الكويت جدج ابو جاسم جابها الها وجابلي مثلها سوار .
اخذيها بعد ضميها عندج .

تراتيل :
عندي فلوس وعندي ذهب وعندي بيوت بس ماعندي احد ..

بقت ام شهاب ساكته بعدين كالت :
انه مااكرهج تره ، ولا اريدلج الاذيه والتعب ..
واذا حجيت حجي يضوجج فانا ماعندي بس هالوليدات واخاف عليهم ومااريدهم يتكاتلون بيناتهم ..

تراتيل :
حقج .

ام شهاب :
يمكن عبالج رضيت بالسوته وياج هدى لو زهراء وانتصار وسحر ، بس يشهد الله اخذتلج حقج هدى صدك بتي الوحيده ومدللتها بس انه مايعجبني الغلط حتى اذا بتي هي التغلط لازم احاسبها وروحي سأليها كليلها امج من اجتج لبيتج شسوت ؟
طيحت حظها وخليت رجلها طيح حظها اشتكيت عليها عد رجلها وخليته بالصوره حتى اذا عادت الغلط مره ثانية كلها تدري بي .
وزهراء خابرت لامها وعاتبها وهم خابرتها ورزلتها .
انتصار جدج ماقبل تجي لهنا بعد وسحر بعدها لهسه عد اهلها لاخابرنه عليها ولارحنه وراها .