Unicode
သူတို့စကားများပြီးနောက်ရက်တွင်
ကိုယ်ပိုင်လေယာဥ်ဖြင့် မြန်မာပြည်သို့
ဆိုက်ရောက်လာကြသည်။
လေယာဥ်ပေါ်ကဆင်းလာသူတွေအကုန်
အနက်ရောင်ဝတ်စုံတွေနှင့်ဖြစ်ကြပြီး
ချောက်ချွမ်လည်း နေကာမျက်မှန်နှင့်
အနက်ရောင်လက်ရှည်ကို
လက်မောင်းထိခေါက်တင်ထားကာ
ပန်ကာသေးသေးလေး ကိုင်ပြီးဆင်းလာသည်။
ချောက်ချွမ်၏နောက်တွင်တော့
ကျန်းသခင်ကြီးက အနက်ရောင်ထီးကို ကိုယ်တိုင်ကိုင်ကာ
ချောက်ချွမ်ကို ဆောင်းပေးထားသည်။
လာကြိုသည့်ကားများအနီးတွင်တော့
ဦးရန်ရှင်းနဲ့ ဇနီးဖြစ်သူက
ပြုံးရွှင်စွာ ရပ်နေသည်။
" မင်္ဂလာပါ ကျန်းအကိုကြီး ......
ပင်ပန်းသွားရပြီ "
ကျန်းသခင်ကြီးအနားရောက်တော့
ဦးရန်ရှင်းက ပြုံးကာ နှုတ်ဆက်သည်။
" မဟုတ်တာ .... သားငယ်တို့အတွက်ပဲ
မပင်ပန်းပါဘူး ..... "
" အားနာလိုက်တာဗျာ ....
ကလေးတွေကလည်း ထပ်စောင့်ခိုင်းတာကို
ပြောမရကြဘူး "
" ဒီလိုအရွယ်ကတော့ ဘယ်လိုပြောပြော
ရမှာမဟုတ်ဘူး ရန်ညီလေးရေ .....
သူတို့စိတ်ထဲမှာ အချစ်ပဲရှိတာ .....
ဘာမှများများစားစား တွေးကြမှာ မဟုတ်ဘူး .... "
" ဟုတ်ပါရဲ့ ....
အခုလည်း ကျန်းအကိုကြီးကို
လာမကြိုပဲ မန္တလေးသွားနေကြတယ် "
" ထားလိုက်ပါဗျာ ....
ကလေးတွေ ပျော်ကြပါစေ .... "
" ဟား ဟား ... ဟုတ်ပါပြီဗျာ...
ကဲ ... ကားပေါ်တက်ပါ နေပူတယ် "
ကျန်းသခင်ကြီးက မှုန်ကုပ်နေတဲ့
ချောက်ချွမ်ကို ကားထဲအရင်ဝင်စေလိုက်ပြီး
သူပါ လိုက်ဝင်လိုက်သည်။
" အရမ်းပူနေလား Baby ....
အဆင်ပြေရဲ့လား "
ကား Airconက စိမ့်နေအောင်အေးပေမယ့်
ပန်ကာဖွင့်ထားဆဲဖြစ်တဲ့
ချောက်ချွမ်ကြောင့် ကျန်းသခင်ကြီး
မေးလိုက်သည်။
" သိပ်မကြာပါဘူး ....
ရက်ပိုင်းလောက်ပဲ သည်းခံပေးပါ .... "
အနားလာကာ ပွစိပွစိရွတ်နေတဲ့
အဘိုးကြီးကို
ချောက်ချွမ်မျက်နှာလွှဲပစ်လိုက်သည်။
