အနန္တဆောင်ခန်းများမှ လွတ်‌မြောက်ရာ [ မြန်မာဘာသာပြန် ]

《 Chapter 15 》

^Unicode^

တစ္ဆေသင်္ဘောမှလွတ်မြောက်ခြင်း

အခန်း (၁၅) : တစ္ဆေသင်္ဘောမှလွတ်မြောက်ခြင်း (အပိုင်း ၂)

"ငါသော့သွားယူလိုက်မယ်။ မင်းဒီမှာနေခဲ့၊ မလှုပ်နဲ့နော်!" မှတ်စုစာရွက်ကို သူဖတ်ပြီးတဲ့နောက် လော်ကျန့်က ဖုန်းယွီလန်အား လက်ရန်းကို သေချာကိုင်ခိုင်းထားပြီး ပိုက်ကွန်ကြိုးအနားက ကျီးကန်းအသိုက်ရဲ့အစွန်အဖျားမှာ မတ်တပ်ရပ်ခိုင်းထားခဲ့တယ်။ ထို့နောက် လော်ကျန့်က ရွက်ဖျင်စအောက်မှာ မြုပ်နှံထားတဲ့ အကြွင်းအကျန်နံဘေးမှာ ဆောင့်ကြောင့်ထိုင်ချလိုက်ပြီး အဝတ်စကို ဖြည်းဖြည်းချင်း ဆွဲဖယ်လိုက်တယ်။

အဝတ်စအောက်မှာရှိနေတာက လုံးလုံးပုပ်ပွနေတဲ့ ရုပ်ပျက်ဆင်းပျက် အလောင်းတလောင်းပဲဖြစ်တယ်၊ အဲ့ဒီသေတ္တာတွေထဲက အသေကောင်တွေနဲ့ ထူးမခြားနားပင်။ သို့ပါသော်ငြား သူဒီအလောင်းကို မြင်လိုက်ရတဲ့တခဏ လော်ကျန့်တကိုယ်လုံး စိတ်သက်သာရာရသွားသလို လျော့ရိလျော့ရဲဖြစ်သွားခဲ့တယ်။ "သော့ကိုထိန်းသိမ်းစောင့်ရှောက်သူက သင်တို့နှစ်ဦးအပေါ် လွန်စွာစက်ဆုပ်ရွံရှာခြင်းနှင့် မုန်းတီးခြင်းတွေ ပြည့်နှက်နေပါတယ်" မှတ်စုစာရွက်ပေါ်မှာ ရေးထားတဲ့ အဲ့ဒီစာကြောင်းတကြောင်းကို လော်ကျန့်ဖတ်မိလိုက်တဲ့အခါ ပထမဆုံးဆောင်ခန်းထဲမှာ မမျှော်လင့်ဘဲ သူကြုံတွေ့ခဲ့ရတဲ့ Stalker လိုမျိုး ဖြစ်လာနိုင်ဖွယ်ရှိတဲ့ ဖြစ်နိုင်ချေအားလုံးကို လော်ကျန့် အလိုလို တွက်ဆကြည့်နိုင်ခဲ့တယ်၊ ဒါကြီးက သေပြီဆိုပေမဲ့ သူသတိလက်လွတ်ဖြစ်နေချိန်မှာ ရုတ်တရက် အသက်ပြန်ရှင်လာခဲ့ရင် သူ့ကို သေစေနိုင်လောက်တဲ့ ထိုးနှက်ချက်တခု ဖြစ်သွားစေလိမ့်မယ်။ ဒီလိုမထင်မှတ်ထားတဲ့ တိုက်ခိုက်မှုမျိုးက လူတယောက်အတွက် ကြောက်စရာအကောင်းဆုံးပါပဲ။

ဒါကြောင့်ပဲ ဒီလိုကြောက်စရာကောင်းပြီး၊ ပုပ်ပွနေတဲ့အလောင်းကို မြင်ပြီးသွားတဲ့နောက် လော်ကျန့်က ထိတ်လန့်သွားရမဲ့အစား စိတ်သက်သာရာရစွာ သက်ပြင်းချလိုက်မိတာဖြစ်တယ်။ ပြီးနောက် သော့ရှာဖို့အတွက် တဖက်လူရဲ့အိတ်ကပ်ထဲကို စတင်လှန်လှောရှာဖွေခဲ့တယ်။ ဒီလိုအသေကောင်တွေနဲ့ အမြဲကြုံနေရတာကြောင့် သူက ပုပ်စော်နံတာတွေ၊ လောက်တွေတက်နေတာတွေကို နည်းနည်းလေးမှ ဂရုမစိုက်ဖြစ်တော့ဘဲ ကျင့်သားရနေခဲ့ပြီဖြစ်တယ်။ အမှန်တော့၊ သူက တိုက်ခိုက်ခြင်းနဲ့ သတ်ဖြတ်ခြင်းတို့မှာ အတော်လေး အသားကျလာရုံသာမကဘဲ ဒီလိုအခြေအနေမျိုးမှာတောင် စိတ်မလှုပ်ရှားဘဲ နေနိုင်နေပြီဖြစ်တယ်။ လော်ကျန့်အနေနဲ့ ဒီအခြင်းအရာကို သတိမထားမိသော်ငြား ဖုန်းယွီလန်ကတော့ လော်ကျန့်ရဲ့ပြောင်းလဲမှု သေးသေးလေးအစ သိသိသာသာကြီးကို ခံစားမိနေတယ်။